ຊຽງຂວາງ ສອບເສັງຄັດເລືອກເອົາລັດຖະກອນຄູ ປະຈຳປີ 2020 - Laoedaily

ຊຽງຂວາງ ສອບເສັງຄັດເລືອກເອົາລັດຖະກອນຄູ ປະຈຳປີ 2020

ໃນວັນທີ 16 ມີນາ 2020 ຜ່ານມາ ທີ່ແຂວງຊຽງຂວາງ ໄດ້ມີພິທີິສອບເສັງຄັດເລືອກເອົາລັດຖະກອນຄູ ແລະ ບໍລິຫານຂະແໜງການສຶກສາ-ກິລາ ປະຈໍາປີ 2020 ຂຶ້ນທີ່ໂຮງຮຽນ ມສ ໂພນສະຫວັນ ພາຍໃຕ້ການເປັນປະທານຂອງທ່ານ ບົວລີ ພັນນາວົງ ຫົວໜ້າພະແນກສຶກສາ-ກິລາແຂວງ (ສກຂ), ເຂົ້າຮ່ວມມີ ທ່ານ ສີຈັນ ຈິດຕະປັນຍາ ພະນັກງານກໍ່ສ້າງຮາກຖານ ກະຊວງສຶກສາທິການ ແລະ ກິລາ ຕາງໜ້າໃຫ້ກະຊວງສຶກສາທິການ ແລະ ກິລາ, ມີຜູ້ຕາງໜ້າຈາກພະແນກພາຍໃນແຂວງ, ຜູ້ຕາງໜ້າຫ້ອງການສຶກສາທິການ ແລະ ກິລາເມືອງ 7 ເມືອງທົ່ວແຂວງ ຕະຫຼອດຮອດຄະນະຮັບຜິດຊອບການສອບເສັງ, ກໍາມະການກວດບົດ, ກໍາມະການຍາມຫ້ອງສອບ ແລະ ນັກສຶກສາທີ່ເປັນຄູອາສາສະໝັກເຂົ້າຮ່ວມເກືອບ 200 ຄົນ.

ທ່ານ ນາງ ດາວອນ ເດດລົງສອນ ຫົວໜ້າຂະແໜງຈັດຕັ້ງ-ພະນັກງານພະແນກ ສກຂ ໄດ້ກ່າວລາຍງານວ່າ: ນອກຈາກເປັນການປະຕິບັດຕາມຄໍາສັ່ງແນະນໍາຂອງທ່ານລັດຖະມົນຕີກະຊວງສຶກສາທິການ ແລະ ກິລາ ສະບັບເລກທີ 272 ລົງວັນທີ 20 ກຸມພາ 2020 ນີ້ແລ້ວ, ຍັງເປັນການຄັດເລືອກເອົາບຸກຄະລະກອນຜູ້ທີ່ມີຄວາມຮູ້ຄວາມສາມາດ ແລະ ມີຄຸນສົມບັດສິນທໍາປະຕິວັດ, ຮັກມັກອາຊີບທີ່ຕົນເອງຮຽນມາ ເພື່ອປະກອບເຂົ້າເປັນລັດຖະກອນຄູ ແລະ ລັດຖະກອນບໍລິຫານ ໃຫ້ຖືກຕ້ອງຕາມເງື່ອນໄຂມາດຖານ ເພື່ອຮັບໃຊ້ສັງຄົມ ແລະ ປະເທດຊາດ, ນອກນັ້ນ ຍັງເປັນການຈັດແບ່ງທຶນເປັນໄປດ້ວຍຄວາມໂປ່ງໃສ ບໍລິສຸດຍຸດຕິທໍາ ແລະ ສາມາດກວດສອບໄດ້.

ສໍາລັບສົກປີ 2020 ນີ້ ແຂວງຊຽງຂວາງໄດ້ຮັບໂກ້ຕາລັດຖະກອນຄູ ແລະ ບໍລິຫານຂະແໜງການສຶກສາ-ກິລາ ທັງໝົດ 43 ທຶນ, ໂດຍມີຄູອາສາທີ່ສອນມາແລ້ວເປັນເວລາ 6 ປີ ແລະ ນັກສຶກສາຄູຈົບໃໝ່ຈໍານວນໜຶ່ງສະໝັກເຂົ້າມາສອບເສັງຄັດເລືອກທັງໝົດ 190 ຄົນ, ຍິງ 114 ຄົນ, ເພາະອີງຕາມຄໍາແນະນໍາຂອງທ່ານລັດຖະມົນຕີກະຊວງສຶກສາ ໃຫ້ຄັດເລືອກຈາກຄູອາສາສະໝັກ 90% ແລະ ນັກສຶກສາຄູທີ່ຮຽນຈົບໃໝ່ 10%.

ໃນນັ້ນ: ໄດ້ແບ່ງອອກເປັນ 6 ຫ້ອງສອບເສັງ ເພື່ອສະດວກໃນການຕິດຕາມກວດການັກສອບ, ການສອບເສັງຄັດເລືອກຈະຈັດຢູ່ 3 ຮອບ, ຮອບທໍາອິດແມ່ນສອບເສັງພາກທິດສະດີ, ຮອບທີ່ສອງແມ່ນເຂົ້າສູ່ພາກປະຕິບັດຕົວຈິງ ໃຫ້ນັກສອບແຕ່ງບົດສອນ ແລະ ສອນສາທິດຕົວຈິງ ແລະ ຮອບທີສາມ ແມ່ນຮອບສໍາພາດນັກສອບ ໂດຍຈະໃຊ້ເວລາທັງໝົດ 3 ວັນຈິ່ງສໍາເລັດ. ຫຼັງຈາກນັ້ນ, ຄະນະຮັບຜິດຊອບຈະສັງລວມຜົນຂອງການສອບແລ້ວລາຍງານໃຫ້ກະຊວງສຶກສາທິການ ແລະ ກິລາ ໃນທ້າຍອາທິດນີ້ ເພື່ອຕັດສິນຜົນຂອງການສອບເປັນທາງການ.

ໂອກາດນີ້ ທ່ານ ບົວລີ ພັນນາວົງ ໄດ້ຍົກຍ້ອງເຖິງນໍ້າໃຈຂອງຄູອາສາທີ່ໄດ້ສະຫຼະສິດຜົນປະໂຫຍດຂອງຕົນເພື່ອຜົນປະໂຫຍດຂອງປະເທດຊາດເປັນເວລາຫຼາຍປີ ໂດຍບໍ່ຫວັງຄ່າຕອບແທນ. ພ້ອມນີ້, ທ່ານຍັງໄດ້ຮຽກຮ້ອງໃຫ້ນັກສຶກສາທຸກຄົນຈົ່ງມີຄວາມອຸ່ນອຽນທຸ່ນທ່ຽງ, ເຖິງຈະໄດ້ ຫຼື ເສຍ ກໍໃຫ້ສືບຕໍ່ເຮັດໜ້າທີ່ຕໍ່ໄປ, ພ້ອມທັງຮຽກຮ້ອງໃຫ້ທຸກຄົນຈົ່ງພ້ອມກັນເອົາໃຈໃສ່ຕໍ່ບັ້ນການສອບເສັງໃຫ້ມີຜົນສໍາເລັດ.

(ໂດຍ: ຄານສີສະຫວັນ)

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ