ວາດສະໜາ ຈະເກັບກ່ຽວເອົາທຸກຄວາມຮູ້ມາພັດທະນາຕົນເອງ - Laoedaily

ວາດສະໜາ ຈະເກັບກ່ຽວເອົາທຸກຄວາມຮູ້ມາພັດທະນາຕົນເອງ

ປັດຈຸບັນແມ່ຍິງລາວຫຼາຍຄົນມີຄວາມກ້າສະແດງອອກຫຼາຍຂຶ້ນ ເຊິ່ງ ວາດສະໜາ ສາວນ້ອຍຈາກເວທີນາງສາວນະຄອນຫຼວງວຽງຈັນ 2020 ກໍເປັນແມ່ຍິງທໍາມະດາຄົນໜຶ່ງທີ່ຢາກສະແດງຄວາມສາມາດອອກມາ ແລະ ເຮັດໃຫ້ດີທີ່ສຸດໃນເວທີນີ້ ເພື່ອເປັນອີກໜຶ່ງປະສົບການໃນການປະກວດຕໍ່ໄປ.

ວາດສະໜາ ສິມມະກອນ ຫຼື ວາດ MVT 14 ໃຫ້ສໍາພາດວ່າ: ປັດຈຸບັນຢູ່ບ້ານທົ່ງຂັນຄຳ ເມືອງຈັນທະບູລີ ນະຄອນຫຼວງວຽງຈັນ, ກໍາລັງສຶກສາທີ່ຄະນະນິຕິສາດ ແລະ ລັດຖະສາດ ພາກວິຊາພົວພັນສາກົນ ປີ 1, ຕົນເອງຮູ້ສຶກດີໃຈຫຼາຍທີ່ໄດ້ເຂົ້າມາເຖິງຮອບ 20 ຄົນສຸດທ້າຍ ເພາະເປັນອີກໜຶ່ງປະສົບການທີ່ສາມາດຍ່າງຕາມຄວາມຝັນໃຫ້ໃກ້ຂຶ້ນມາອີກກ້າວໜຶ່ງ ເຊິ່ງເປັນບາດກ້າວທີ່ປ່ຽນແປງຊີວິດຫຼາຍຢ່າງ ເພາະຮອບ 20 ຄົນສຸດທ້າຍ ເຮັດໃຫ້ຕົນເອງໄດ້ຮັບປະສົບການຫຼາຍຢ່າງ ພ້ອມທັງມິດຕະພາບອັນດີງາມຈາກໝູ່ເພື່ອນຜູ້ເຂົ້າປະກວດ, ເອື້ອຍອ້າຍທີມງານ ແລະ ອີກຫຼາຍໆຄົນ.

ເວທີນີ້ເປັນເວທີອັນຊົງກຽດຂອງແມ່ຍິງລາວ ແລະ ຕົນເອງກໍຢາກເຮັດໃຫ້ຄົນອື່ນໆ ໄດ້ເຫັນວ່າແມ່ຍິງທຳມະດາຄົນໜຶ່ງກໍສາມາດເປັນໃນສິ່ງທີ່ຕົນເອງຢາກເປັນໄດ້, ພຽງແຕ່ມີຄວາມກ້າ ແລະ ຄວາມພະຍາຍາມພຽງພໍທີ່ຈະເຮັດມັນ ລວມທັງເປັນການເກັບກ່ຽວປະສົບການ ແລະ ສ້າງມິດໄມຕີກັບທຸກໆຄົນໃຫ້ຫຼາຍຂຶ້ນ.

ທຸກຄົນຕ່າງຄາດຫວັງກັບການໄດ້ຕຳແໜ່ງ, ແຕ່ສຳລັບຕົນເອງການໄດ້ຮັບປະສົບການ, ຄວາມຮັກແພງ ແລະ ມິດຕະພາບທີ່ດີຈາກທຸກຄົນນັ້ນຖືວ່າເປັນຜົນໄດ້ຮັບທີ່ລ້ຳຄ່າ. ສຳລັບການກຽມຄວາມພ້ອມຕ້ອງງາມທັງພາຍໃນ ແລະ ພາຍນອກ ເຊິ່ງຕົນເອງໄດ້ກຽມຈິດໃຈໄວ້ແລ້ວບໍ່ວ່າຜົນຈະອອກມາເປັນແບບໃດກໍເຄົາລົບການຕັດສິນໃຈຂອງທຸກຝ່າຍ ແລະ ພ້ອມເກັບຈຸດບົກພ່ອງຂອງຕົນເອງມາພັດທະນາໃຫ້ດີຂຶ້ນ.

ໃນດ້ານຮ່າງກາຍກໍໄດ້ກຽມພ້ອມເຊັ່ນກັນ ໂດຍການຄວບຄຸມອາຫານ, ກິນອາຫານທີ່ມີປະໂຫຍດຫຼາຍຂຶ້ນ ແລະ ບໍ່ກິນຕາມໃຈປາກຫຼາຍເກີນໄປ ພ້ອມທັງອອກກຳລັງກາຍເພື່ອເຮັດໃຫ້ຮ່າງກາຍແຂງແຮງກຽມພ້ອມໃນການປະກວດຄັ້ງນີ້. ສຸດທ້າຍ, ກໍຢາກຝາກມາເຖິງທຸກຄົນຢ່າງທີ່ຮູ້ກັນວ່າປັດຈຸບັນນີ້ໄດ້ມີການແຜ່ລະບາດພະຍາດ Covid – 19 ເຖິງປະເທດລາວຍັງບໍ່ພົບຜູ້ຕິດເຊື້ອ, ແຕ່ກໍຢາກໃຫ້ທຸກຄົນມີຄວາມຕື່ນຕົວ ແລະ ຮັກສາສຸຂະພາບປ້ອງກັນຕົນເອງໃຫ້ອອກຫ່າງຈາກບ່ອນທີ່ມີຄວາມສ່ຽງໃຫ້ຫຼາຍທີ່ສຸດ.

ສິ່ງທີ່ຈະໄດ້ໃນເວທີນີ້ນອກຈາກຄວາມຮູ້ຕ່າງໆກໍຍັງໄດ້ຮັບໂອກາດດີໆໃນການເກັບກ່ຽວປະສົບການ ແລະ ມິດຕະພາບດີໆຈາກໝູ່ເພື່ອນ ເຊິ່ງຕົນເອງຈະເອົາຄວາມຮູ້ທີ່ໄດ້ມາພັດທະນາຕົນເອງໃຫ້ດີຂຶ້ນກວ່າເກົ່າ ລວມທັງການເກັບກ່ຽວຄວາມຮູ້ ແລະ ປະສົບການຕ່າງໆທີ່ໄດ້ມາ ບໍ່ວ່າຈະເປັນການເຮັດວຽກຮ່ວມກັບຄົນອື່ນ ຫຼື ຜູ້ໃຫຍ່ຫຼາຍໆຄົນ, ການຢູ່ຮ່ວມກັນນຳໝູ່ເພື່ອນ ແລະ ສົ່ງຕໍ່ຄວາມຮູ້ເຫຼົ່ານັ້ນໃຫ້ຄົນອື່ນຕໍ່ໄປ.

ສາມາດຕິດຕາມການເຄື່ອນໄຫວ ແລະ ກິດຈະກຳຕ່າງໆຂອງນາງສາວທັງ 20 ນ້ອງ ໄດ້ທີ່: Facebook page: Miss vientiane ນາງສາວນະຄອນຫຼວງ ຫຼື ຝາກເຊຍ ແລະ ເປັນກຳລັງໃຈໃຫ້ນ້ອງ ວາດ MVT 14 ໄດ້ທາງ Facebook: Vadsana simmakone.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ