ຍັງອີບໍ່ພໍເທົ່າໃດອາທິດ ກໍ່ໃກ້ຈະຮອດງານສະເຫຼີມສະຫຼອງບຸນປີໃໝ່ລາວປະຈຳປີ ພ.ສ 2563 ແລ້ວ ດັ່ງນັ້ນ, ເພື່ອເຮັດໃຫ້ບັນຍາກາດການຫຼິ້ນບຸນດັ່ງກ່າວໃນສະຖານທີ່ຕ່າງໆ ມີຄວາມເບີກບານມ່ວນຊື່ນ, ມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ ໂດຍສະເພາະແມ່ນຢູ່ນະຄອນຫຼວງວຽງຈັນ ມີຄວາມສະອາດ ແລະ ຮັກສາໄວ້ປະເພນີອັນດີງາມ. ສະນັ້ນ, ການນຳເມືອງຈັນທະບູລີ ຈຶ່ງໄດ້ແຈ້ງສາມຂໍ້ຫ້າມ ໃນການສະຫຼອງ ຖ້າລະເມີດ ຈະປະຕິບັດມາດຕະການຕາມລະບຽບການຢ່າງເຂັ້ມງວດ.
ອີງຕາມແຈ້ງການຂອງເຈົ້າເມືອງຈັນທະບູລີ ສະບັບເລກທີ 371/ຫວກ.ຈລ ລົງວັນທີ 10 ມີນາ 2020 ເຖິງບັນດາທ່ານ ຫົວໜ້າກອງບັນຊາການ ປກສ ເມືອງ, ຫົວໜ້າຫ້ອງການ ຖວທ, ຍທຂ, ຫົວໜ້າ ປກສ ເຂດI ເມືອງຈັນທະບູລີ; ທ່ານ ນາຍບ້ານ ອານຸ, ບ້ານສີຫອມ, ບ້ານມີໄຊ, ບ້ານຫາຍໂສກ ແລະ ບ້ານຊຽງຍືນ; ບັນດາຫົວໜ່ວຍທຸລະກິດຫ້າງຮ້ານ, ຊາວຄ້າ-ຂາຍ ແລະ ຄອບຄົວພໍ່ແມ່ປະຊາຊົນທີ່ອາໄສຢູ່ແຄມຖະໜົນສາມແສນໄທ ແລະ ຖະໜົນເສດຖາທິລາດ ເລື່ອງ: ການກະກຽມຄວາມພ້ອມ ແກ່ການສະເຫຼີມສະຫຼອງວັນບຸນປີໃໝ່ລາວ ພສ 2563 ທີ່ຈະມາເຖິງນີ້ ໃຫ້ມີຄວາມເປັນລະບຽບຮຽບຮ້ອຍ, ສະອາດງາມຕາ.
ເຊິ່ງເນື້ອໃນລະບຸໄວ້ວ່າ: ຫ້ອງວ່າການ ເມືອງຈັນທະບູລີ ນະຄອນຫຼວງວຽງຈັນ ຂໍຖືເປັນກຽດ ແຈ້ງການມາຍັງບັນດາທ່ານທຸກພາກສ່ວນທີ່ກ່ຽວຂ້ອງ, ຫ້ອງການ, ບ້ານ ແລະ ຄອບຄົວພໍ່ແມ່ປະຊາຊົນ, ທຸລະກິດ, ຫ້າງຮ້ານ ທີ່ອາໄສຢູ່ ແຄມຖະໜົນສາມແສນໄທ ແລະ ຖະໜົນເສດຖາທິລາດຊາບວ່າດັ່ງນີ້:
1 ບໍ່ໃຫ້ມີການອະນຸຍາດຈັດກິດຈະກໍາຕັ້ງບຸດ, ຕັ້ງເຕັ້ນ, ໜ້າຮ້ານ ຢູ່ຕາມແຄມທາງທັງສອງຟາກ ຂອງຖະໜົສາມແສນໄທ ແລະ ຖະໜົນເສດຖາທິລາດ.
2 ບໍ່ອະນຸຍາດໃຫ້ມີການຈັບຈອງ, ເຊົ່າສະຖານທີ່ໜ້າເຮືອນ, ຫ້າງຮ້ານ, ທາງຟຸດບາດ ເປັນບ່ອນຈັດກິດຈະກໍາ, ກາງເຕັ້ນ ຫຼື ອື່ນໆ ເພື່ອສະເຫຼີມສະຫຼອງປີໃໝ່ລາວ ທີ່ພາໃຫ້ເກີດມີສະພາບການສັນຈອນ ແອອັດ ຕາມເສັ້ນທາງຄືປີຜ່ານມາ.
3 ສໍາລັບເຈົ້າຂອງສະຖານທີ່ບໍລິສັດ, ຫ້າງຮ້ານ, ເຮືອນທີ່ ເລາະລຽບຕາມຖະໜົນສາມແສນໄທ, ຖະໜົນເສດຖາທິລາດ ບໍ່ໃຫ້ບຸກຄົນອື່ນມາເຊົ່າສະຖານທີ່ໜ້າເຮືອນ, ໜ້າຮ້ານຂອງຕົນ ເພື່ອຈັດກິດຈະກໍາການ ຫຼິ້ນທີ່ບໍ່ເໝາາະສົມ ໃນການສະເຫຼີມສະຫຼອງບຸນປີໃໝ່ລາວປີນີ້.
ສ່ວນພໍ່ແມ່ປະຊາຊົນ ທີ່ມີຄວາມຈໍາເປັນຈັດງານຕ່າງໆ ແມ່ນໃຫ້ຈັດຢູ່ພາຍໃນເຮືອນຂອງຕົນ, ບໍ່ໃຫ້ເກີນອອກມາທາງຟຸດບາດ ແລະ ເສັ້ນທາງ, ແຄມທາງຢ່າງເດັດຂາດ ແລະ ບໍ່ໃຫ້ມີການຈອດລົດຊະຊາຍແອອັດການສັນຈອນ ພ້ອມທັງບໍ່ໃຫ້ອອກມາມ່ວນຊື່ນຕັນເສັ້ນທາງ ເພື່ອຫົດນໍ້າ. ຖ້າຫາກມີການລະເມີດ ຈະໄດ້ປະຕິບັດມາດຕະການຕາມລະບຽບການຈັດງານສະເຫຼີມສະຫຼອງບຸນປີໃໝ່ລາວ ພສ 2563 ຢ່າງເຂັ້ມງວດ.
ສະນັ້ນ, ຈຶ່ງມອບໃຫ້ ກອງບັນຊາການ ປກສ ເມືອງ, ຫ້ອງການ ຖວທ ເມືອງ, ຍທຂ ເມືອງ, ປກສ ເຂດ I ແລະບັນດາທ່ານນາຍບ້ານທີ່ກ່ຽວຂ້ອງ ເປັນເຈົ້າການນໍາພາປະຊາຊົນຕິດຕາມປະຕິບັດຕາມແຈ້ງການສະບັບນີ້ໃຫ້ໄດ້ຮັບຜົນດີ.
