ໝາກເຫຼ່ນອົບກະທຽມສາມາດປຸງດ້ວຍເຄື່ອງເທດສຳເລັດຮູບແບບເອີຣົບໄດ້ ແຕ່ໃນບ້ານເຮົາອາດຈະຫາຍາກ ແລະ ລາຄາອາດຈະສູງ ເຊິ່ງຫຼາຍຄົນກໍອາດຈະບໍ່ມັກກິ່ນເຄື່ອງເທດ ເພາະມັນຈະມີກິ່ນແຮງ. ສະນັ້ນ, ເພື່ອຄວາມສະດວກຈຶ່ງນຳໃຊ້ວັດຖຸດິບທີ່ມີໃນບ້ານເຮົາມານຳໃຊ້ກໍມີປະໂຫຍດເຊັ່ນກັນ.
ສ່ວນປະສົມ:
1 ໝາກເຫຼ່ນໃຫຍ່ ຫຼື ນ້ອຍ 300 ກຣາມ.
2 ກະທຽມສັບ ຫຼື ຊອຍບາງໆ 1 – 2 ບ່ວງແກງ.
3 ເກືອເລັກໜ້ອຍ.
4 ພິກໄທເລັກໜ້ອຍ.
5 ນ້ຳມັນໝາກກອກ 1 ບ່ວງແກງ.
6 ຜັກບົວລະພາສັບ 1 ບ່ວງແກງ ( ສໍາລັບໂຮຍໜ້າ ຫຼື ແຕ່ງຈານ ).
ວິທີປຸງແຕ່ງ:
ລ້າງໝາກເຫຼ່ນໃຫ້ສະອາດແລ້ວນຳມາຜ່າເຄິ່ງ ( ຈະຜ່າລວງຍາວ ຫຼື ລວງຂວາງກໍໄດ້ ) ແລະ ນຳມາທາດ້ວຍນ້ຳມັນໝາກກອກໂຮຍຫົວກະທຽມສັບໃສ່ພ້ອມປຸງລົດຊາດດ້ວຍເກືອ ແລະ ພິກໄທໃຫ້ຮຽບຮ້ອຍ.
ເມື່ອຮຽບຮ້ອຍແລ້ວກໍກຽມນຳໄປອົບດ້ວຍອຸນຫະພູມ 160 ອົງສາ ປະມານ 2 – 5 ນາທີ ຫຼື ຈົນກວ່າໝາກເຫຼ່ນສຸກຈຶ່ງນຳອອກມາ. ຈາກນັ້ນ, ຈັດໃສ່ຈານໂຮຍໜ້າດ້ວຍຜັກບົວລະພາສັບ ແລະ ໃຊ້ແຕ່ງຈານ ຫຼື ຈະໃຊ້ເປັນຜັກຊະນິດອື່ນກໍໄດ້.
( ຂໍ້ມູນຈາກ: rasa-malaysia.com )
[ ຮຽບຮຽງ: ນຸ້ມນິ້ມ ]
