ໄຊຍະບູລີ ຄາດຈະມີ 5 ພັນກວ່າຫົວໜ່ວຍໃຫ້ຂໍ້ມູນແກ່ນັກສຳຫຼວດ - Laoedaily

ໄຊຍະບູລີ ຄາດຈະມີ 5 ພັນກວ່າຫົວໜ່ວຍໃຫ້ຂໍ້ມູນແກ່ນັກສຳຫຼວດ

ແຂວງໄຊຍະບູລີ ໄດ້ເລີ່ມຕົ້ນເດີນສໍາຫຼວດເສດຖະກິດທົ່ວປະເທດ ຄັ້ງທີ III ຂັ້ນແຂວງ ມາແຕ່ຕົ້ນເດືອນມີນາ ຄາດຈະມີຫົວໜ່ວຍທຸລະກິດປະມານ 5 ພັນກວ່າຫົວໜ່ວຍ ໃຫ້ຂໍ້ມູນແກ່ນັກສຳຫຼວດ.

ທ່ານ ເພັງນິລັນ ຄໍາພັນເພັງ ຮອງເຈົ້າແຂວງໄຊຍະບູລີ ທັງເປັນຫົວໜ້າຄະນະຊີ້ນໍາການເດີນສໍາຫຼວດເສດຖະກິດທົ່ວປະເທດ ຄັ້ງທີ III ຂັ້ນແຂວງໄຊຍະບູລີ ໃຫ້ສໍາພາດຕົ້ນອາທິດຜ່ານມາ ວ່າ: ປັດຈຸບັນແຂວງໄຊຍະບູລີແມ່ນມີຄວາມພ້ອມ ແລະ ລົງປະຕິບັດຕົວຈິງແລ້ວໃນການສໍາຫຼວດເສດຖະກິດທົ່ວປະເທດ ຄັ້ງທີ III ໃນຕົ້ນເດືອນມີນານີ້ ແລະ ຄາດວ່າຈະສໍາເລັດໃນທ້າຍເດືອນມີນາ ປີ 2020 ໃນຈໍານວນຫົວໜ່ວຍທຸລະກິດຂອງການສໍາຫຼວດ 5.095 ຫົວໜ່ວຍທົ່ວແຂວງ.

ການສໍາຫຼວດເສດຖະກິດທົ່ວປະເທດ ຄັ້ງທີ III ມີ ຄວາມໝາຍສໍາຄັນໃນການສະໜອງຂໍ້ມູນໃຫ້ແກ່ການຕິດຕາມ ແລະ ປະເມີນການຈັດຕັ້ງປະຕິບັດແຜນພັດທະນາເສດຖະກິດສັງຄົມແຫ່ງຊາດ ຄັ້ງທີ VIII ເປັນຂໍ້ມູນພື້ນຖານສໍາລັບການສ້າງແຜນພັດທະນາເສດຖະກິດ – ສັງຄົມແຫ່ງຊາດ ຄັ້ງທີ IX ຂອງລັດຖະບານ ກໍຄືແຂວງໄຊຍະບູລີ, ທັງເປັນການຕິດຕາມເປົ້າໝາຍການພັດທະນາແບບຍືນຍົງ ( SDG ) ຮອດປີ 2030 ເວົ້າລວມ, ເວົ້າສະເພາະເປັນທີ່ສໍາຄັນ ແລະ ຈໍາເປັນພື້ນຖານ ເພື່ອຕີລາຄາສະພາບການຈັດຕັ້ງປະຕິບັດແຜນພັດທະນາເສດຖະກິດສັງຄົມມະຫາພາກຂະຫຍາຍຕົວ ລວມທັງສະພາບການເຄື່ອນໄຫວຂອງບັນດາຫົວໜ່ວຍທຸລະກິດ ແລະ ວິສາຫະກິດ – ຫ້າງຮ້ານ ເປັນຕົ້ນແມ່ນການປະຕິບັດພັນທະອາກອນ ລາຍຮັບ – ລາຍຈ່າຍຂອງການດໍາເນີນທຸລະກິດ, ການນໍາໃຊ້ແຮງງານ, ສະພາບການວ່າງງານ, ການປະກອບທຶນ, ການຈົດທະບຽນ ແລະ ການເຂົ້າເຖິງແຫຼ່ງທຶນຕ່າງໆ ນັບທັງການນໍາໃຊ້ເຕັກນິກ – ເຕັກໂນໂລຊີເຂົ້າໃນຂະບວນການຜະລິດ.

ອີກດ້ານໜຶ່ງຖືເປັນປີມ້ວນທ້າຍຂອງການຈັດຕັ້ງປະຕິບັດແຜນ 5 ປີ ຄັ້ງທີ VII ຂອງແຂວງເພື່ອຕີລາຄາສະພາບການຈັດຕັ້ງປະຕິບັດແຜນພັດທະນາເສດຖະກິດສັງຄົມຂອງແຂວງ, ສະພາບການເຄື່ອນໄຫວຂອງບັນດາຫົວໜ່ວຍທຸລະກິດ, ຜູ້ປະກອບການບັນດາຫ້າງຮ້ານ ເພື່ອເປັນພື້ນຖານໃຫ້ແກ່ການສ້າງແຜນພັດທະນາເສດຖະກິດສັງຄົມ ຕິດພັນກັບການປັບປຸງຖານລາຍຮັບ ແລະ ການແກ້ໄຂຄວາມທຸກຍາກໃນຕໍ່ໜ້າ ແລະ ອະນາຄົດ. ທັງໝົດນັ້ນຍ້ອນວ່າພວກເຮົາຄັດເລືອກ ແລະ ໄດ້ແຕ່ງຕັ້ງນັກກວດກາ ແລະ ນັກສໍາຫຼວດ ເພື່ອເຂົ້າຮ່ວມຝຶກອົບຮົມຢູ່ຂັ້ນສູນກາງ ແລະ ຂັ້ນແຂວງ.

ທ່ານກ່າວຕື່ມວ່າ: ເພື່ອເຮັັັັດໃຫ້ການສໍາຫຼວດໃນຄັ້ງນີ້ໄດ້ຮັບຜົນຮຽກຮ້ອງມາຍັງທຸກພາກສ່ວນ, ອົງການຈັດຕັ້ງພາກລັດ ເອກະຊົນບັນດາຫົວໜ່ວຍທຸລະກິດ, ຫ້າງຮ້ານ, ພໍ່ຄ້າຊາວຂາຍ ແລະ ພໍ່ແມ່ປະຊາຊົນບັນດາເຜົ່າພາຍໃນແຂວງ ຈົ່ງໃຫ້ການຮ່ວມມືຊ່ວຍເຫຼືອສະໜັບສະໜູນອໍານວຍຄວາມສະດວກໃຫ້ແກ່ນັກເດີນສໍາຫຼວດເສດຖະກິດທົ່ວປະເທດ ຄັ້ງທີ III ພວມປະຕິບັດໜ້າທີ່ໃນປັດຈຸບັນ. ພິເສດແມ່ນການສະໜອງຂໍ້ມູນດ້ວຍຄວາມຈິງໃຈ, ຖືກຕ້ອງຕາມຄວາມຈິງ, ຄົບຖ້ວນຊັດເຈນຄືພັນທະ ແລະ ໜ້າທີ່ຂອງໝົດທຸກຄົນ.

[ ຂ່າວ: ບຸນທີ ]

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ