ທ້າຍອາທິດຜ່ານມາ ໜ່ວຍພັກພະແນກອຸດສາຫະກຳ ແລະ ການຄ້າ ແຂວງສາລະວັນ ໄດ້ເປີດກອງປະຊຸມໃຫຍ່ ຄັ້ງທີ IX ຂຶ້ນ ແລະ ສຳເລັດລົງໃນວັນດຽວກັນ ໂດຍການເປັນປະທານຂອງ ສະຫາຍ ຄໍາຜ່ານ ສີລາວີ ເລຂາໜ່ວຍພັກ, ຫົວໜ້າພະແນກອຸດສາຫະກຳ ແລະ ການຄ້າແຂວງ, ໃຫ້ກຽດເຂົ້າຮ່ວມຂອງ ສະຫາຍ ບຸນທຽມ ແກ້ວໄຊຍະວົງ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ, ມີຮອງເລຂາໜ່ວຍພັກ, ສະມາຊິກພັກສົມບູນ – ສຳຮອງ ພ້ອມດ້ວຍແຂກທີ່ຖືກເຊີນເຂົ້າຮ່ວມ.
ສະຫາຍ ຄຳຜ່ານ ສີລາວີ ເລຂາໜ່ວຍພັກ ຫົວໜ້າພະແນກອຸດສາຫະກຳ ແລະ ການຄ້າ ໄດ້ຜ່ານບົດລາຍງານການເມືອງໃນໄລຍະ 5 ຜ່ານມາ ເຊິ່ງສາມາດຍາດໄດ້ຜົນສຳເລັດຫຼາຍດ້ານທັງດ້ານດີ, ດ້ານອ່ອນ ແລະ ບົດຮຽນທີ່ຖອດຖອນໄດ້ ໂດຍສະເພາະດ້ານການເມືອງແນວຄິດ ຄະນະໜ່ວຍພັກ, ສະມາຊິກພັກພາຍໃນໜ່ວຍ ໄດ້ນຳພາດຳເນີນຊີວິດການເມືອງປະຈຳເດືອນ ເພື່ອແນໃສ່ສຳຫຼວດກວດກາ, ຕຳໜິສົ່ງຂ່າວເພື່ອກໍ່ສ້າງຊ່ວຍເຫຼືອເຊິ່ງກັນ ແລະ ກັນ.
ອັນພົ້ນເດັ່ນແມ່ນໄດ້ຈັດຕັ້ງປະຕິບັດຄຳສັ່ງເລກທີ 15/ນຍ ເຮັດໃຫ້ການດັດສົມບັນດາໂຮງງານປຸງແຕ່ງໄມ້ ແລະ ເຟີນີເຈີ 158 ແຫ່ງ ດັດສົມ ແລະ ຮັກສາໄວ້ຍັງ 38 ແຫ່ງ; ໃນນັ້ນ, ໂຮງງານປຸງແຕ່ງໄມ້ 27 ແຫ່ງ, ໂຮງງານເຟີນີເຈີ 11 ແຫ່ງ. ຊຸກຍູ້ສົ່ງເສີມໂຮງງານປຸງແຕ່ງພືດກະສິກຳ, ອາຫານ ແລະ ເຄື່ອງດື່ມ. ນອກນັ້ນ, ຍັງໄດ້ຊຸກຍູ້ໃຫ້ໂຮງງານຊີມັງ ປັບປຸງ ແລະ ຍົກສະມັດຖະພາບການຜະລິດໃຫ້ຫຼາຍຂຶ້ນກວ່າເກົ່າ, ການຜະລິດແຜ່ນແພໃນ 4 ກຸ່ມບ້ານ ສາມາດຜະລິດໄດ້ 1.205 ຜືນ/ເດືອນ ມູນຄ່າ 48 ລ້ານກວ່າກີບ.
ຈາກນັ້ນ, ໃນກອງປະຊຸມຜູ້ເຂົ້າຮ່ວມຍັງໄດ້ຮັບຟັງການຜ່ານແຜນພັດທະນາຂະແໜງການ, ບົດສຳຫຼວດການນຳພາລວມຂອງຄະນະພັກຊຸດເກົ່າ ພ້ອມທັງຜ່ານມາດຖານເງື່ອນໄຂຜູ້ສະໝັກເລືອກຕັ້ງຄະນະພັກຊຸດໃໝ່. ຜ່ານການປ່ອນບັດເລືອກຕັ້ງເອົາຄະນະໜ່ວຍພັກຊຸດໃໝ່ ມີຜູ້ສະໝັກ 5 ສະຫາຍ, ເລືອກເອົາ 3 ສະຫາຍ.
ກອງປະຊຸມຄັ້ງປະຖົມມະລືກເລືອກໄດ້ ສະຫາຍ ຄຳຜ່ານ ສີລາວີ ເປັນເລຂາ, ສະຫາຍ ບຸນຊູ ລັດສະໝີ ເປັນຮອງເລຂາ ທັງເປັນປະທານກວດກາ ແລະ ສະຫາຍ ນາງ ກຸແກ້ວ ທອງມະນີລາ ເປັນຄະນະ.
[ ຮູບ – ຂ່າວ: ທິດລນີ ໂຄດໂຍທາ ]
