ພິທີມອບ – ຮັບເຂົ້າຊ່ວຍເຫຼືອໃຫ້ປະຊາຊົນຜູ້ທີ່ໄດ້ຮັບຜົນກະທົບຈາກໄພພິບັດ ປີ 2019 ຢູ່ແຂວງສະຫວັນນະເຂດ ຈັດຂຶ້ນໃນຕອນເຊົ້າຂອງວັນທີ 27 ກຸມພາ 2020 ທີ່ສະໂມສອນເມືອງໄຊບູລີ ໂດຍການເຂົ້າຮ່ວມຂອງ ທ່ານ ໂພໄຊ ໄຊຍະສອນ ຮອງເຈົ້າແຂວງສະຫວັນນະເຂດ, ທ່ານ ນາງ ໃບຄຳ ຂັດທິຍະ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ມີບັນດາທ່ານເຈົ້າເມືອງ, ຮອງເຈົ້າເມືອງທີ່ໄດ້ຮັບຜົນກະທົບໃນທົ່ວແຂວງ, ຫ້ອງການແຮງງານ ແລະ ສະຫວັດດີການສັງຄົມເມືອງເຂົ້າຮ່ວມ.
ເຂົ້າທີ່ນຳມາມອບໃນຄັ້ງນີ້ປະກອບມີເຂົ້າຊ່ວຍເຫຼືອຈາກກະຊວງແຮງງານ ແລະ ສະຫວັດດີການສັງຄົມ ຈຳນວນ 1.108 ໂຕນ ມູນຄ່າ 9,9 ຕື້ກວ່າກີບ ມອບໂດຍ ທ່ານ ນາງ ໃບຄຳ ຂັດທິຍະ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ຮັບໂດຍ ທ່ານ ໂພໄຊ ໄຊຍະສອນ ຮອງເຈົ້າແຂວງສະຫວັນນະເຂດ. ຈາກນັ້ນ, ກໍໄດ້ມອບຕໍ່ໃຫ້ບັນດາເມືອງທີ່ໄດ້ຮັບຜົນກະທົບຈາກໄພພິບັດປີ 2019.
ໃນນີ້, ປະກອບມີເມືອງໄຊບູລີ 85 ໂຕນ, ເມືອງສອງຄອນ 120 ໂຕນ, ເມືອງຈຳພອນ 130 ໂຕນ, ເມືອງຊົນນະບູລີ 80 ໂຕນ, ນະຄອນໄກສອນພົມວິຫານ 52 ໂຕນ ( ແຮໄວ້ 32 ໂຕນ ), ເມືອງອຸທຸມພອນ 20 ໂຕນ, ເມືອງອາດສະພັງທອງ 20 ໂຕນ, ເມືອງໄຊພູທອງ 20 ໂຕນ, ເມືອງທ່າປາງທອງ 90 ໂຕນ, ເມືອງວິລະບູລີ 110 ໂຕນ, ເມືອງນອງ 110 ໂຕນ, ເມືອງເຊໂປນ 110 ໂຕນ, ເມືອງພີນ 110 ໂຕນ, ເມືອງພະລານໄຊ 20 ໂຕນ ແລະ ເມືອງອາດສະພອນ 30 ໂຕນ. ເຂົ້າຈຳນວນດັ່ງກ່າວທາງເມືອງກໍຄືຫ້ອງການທີ່ກ່ຽວຂ້ອງ ຈະໄດ້ພ້ອມກັນແຈກຢາຍໃຫ້ບັນດາຄອບຄົວຜູ້ທີ່ໄດ້ຮັບຜົນກະທົບຈາກໄພພິບັດໃນໄລຍະຜ່ານມາ.
ໂອກາດດັ່ງກ່າວ ທ່ານ ນາງ ໃບຄຳ ຂັດທິຍະ ແລະ ທ່ານ ໂພໄຊ ໄຊຍະສອນ ກໍໄດ້ພ້ອມກັນມີຄຳເຫັນ ແລະ ໄດ້ເນັ້ນໜັກໃຫ້ທຸກພາກສ່ວນຈົ່ງພ້ອມກັນເອົາໃຈໃສ່ຊ່ວຍເຫຼືອພໍ່ແມ່ປະຊາຊົນ ກໍຄືຄອບຄົວຜູ້ທີ່ ໄດ້ຮັບຜົນກະທົບ ໃນການແຈກຢາຍເຂົ້າໃນຄັ້ງນີ້ໃຫ້ທົ່ວເຖິງທຸກຄອບຄົວ ເຖິງແມ່ນວ່າມັນຈະບໍ່ຖ່ວງທັນກັບສະພາບປານໃດກໍຕາມ, ແຕ່ການນຳພັກລັດກໍເປັນຫ່ວງເປັນໄຍຕໍ່ຄອບຄົວຜູ້ທີ່ໄດ້ຮັບຜົນກະທົບໃນປີທີ່ຜ່ານມາ.
