ທີມບານບ້ວງແຂວງຊຽງເຈົ້າພາບກີລາແຫ່ງຊາດ ຄັ້ງທີ 11 ຕັ້ງເປົ້າຫວັງເຂົ້າຮອບຊີງຊະນະເລີດໃນການແຂ່ງຂັນບານບ້ວງໃຫ້ໄດ້ ທັງປະເພດຍິງ ແລະ ຊາຍ ພ້ອມຍົກຕົວເຕັງສໍາຄັນເປັນ ແຂວງຫຼວງພະບາງ ແຊັມເກົ່າ.
ທ່ານ ລິດທິເດດ ຄໍາຮຸ່ງ ຫົວໜ້າຄູຝຶກທີມບານບ້ວງແຂວງຊຽງຂວາງ ໃຫ້ສໍາພາດຕໍ່ກັບທີມຂ່າວເສດຖະກິດ ການຄ້າ ເນື່ອງໃນໂອກາດເດີນທາງມາເກັບຕົວທີ່ ນະຄອນຫຼວງວຽງຈັນວ່າ: ການກະກຽມທີມບານບ້ວງຂອງແຂວງຊຽງຂວາງ ທັງປະເພດຍິງ ແລະ ຊາຍ ແມ່ນມີຄວາມພ້ອມເກືອບ 90% ໂດຍໄດ້ມີການຄັດນັກກີລາທີ່ມີປະສົບການສູງປະສົມປະສານກັບນັກກີລາໜ້າໃໝ່ ເພື່ອໃຫ້ຮູບເກມມີຄວາມໄວ ແລະ ປະສິດທິພາບຫຼາຍຂຶ້ນ, ສ່ວນການຄັດເລືອກນັກກກີລາ ແມ່ນຄັດຈາກທັງໝົດ 21 ຄົນ ແລະ ປັດຈຸບັນແມ່ນເຫຼືອ 12 ຄົນ( ທີມຍິງ 12 ແລະ ທີມຊາຍ 12 ຕາມກໍານົດ ). ນັກກີລາສ່ວນໃຫຍ່ແມ່ນມາຈາກ ສະໂມສອນ ລາວອິນເຕີປາມາ ເປັນຫຼັກ ເຊິ່ງການຝຶກຊ້ອມຂອງພວກເຮົາແມ່ນມື້ລະ 4 ຊົ່ວໂມງ ແບ່ງເປັນຕອນເຊົ້າ 2 ຊົ່ວໂມງ ແລະ ຕອນແລງ 2 ຊົ່ວໂມງ.
“ ກ່ອນໜ້ານີ້ພວກເຮົາໄດ້ມີການແຂ່ງຂັນນັດອຸ່ນເຄື່ອງກັບທີມໃນນະຄອນຫຼວງວຽງຈັນ ແລະ ປະເທດເພື່ອນບ້ານ ແຂ່ງ 4 ນັດສາມາດຊະນະທັງໝົດ ເຊິ່ງພວກເຮົາມີແຜນຈະທົດສອບທີມອີກ 2-3 ນັດກ່ອນເຂົ້າຮ່ວມການແຂ່ງຂັນຢ່າງເປັນທາງການ. ສ່ວນຄວາມຫວັງຂອງພວກເຮົາມີຄວາມຫວັງເຂົ້າເຖິງຮອບຊີງຊະນະເລີດ ທັງທີມຍິງ ແລະ ທີມຊາຍ,ແນ່ນອນທຸກແຂວງມີຄວາມແຂ່ງແກ່ນທັງໝົດ ໂດຍສະເພາະແຂວງຫຼວງພະບາງ ທີ່ຄອງແຊັມຫຼາຍສະໄໝ ທັງເປັນແຊັມເກົ່າ. ຢ່າງໃດກໍຕາມ ສິ່ງທີ່ຕ້ອງໄດ້ເນັ້ນແມ່ນການຫຼິ້ນເປັນທີມ, ການຊູ໊ດທີ່ແມ່ນຢໍ້າ ແລະ ເຕັກນິກຕ່າງໆ. ຂະນະທີ່ ໄວໆນີ້ຈະເດີນທາງໄປແຂວງຊຽງຂວາງ ແລະ ເກັບຕົວທີ່ນັ້ນ ເພື່ອໃຫ້ນັກກີລາໄດ້ລື້ງເຄີຍກັບສະພາບອາການ ” ທ່ານ ລິດທິເດດ ຄໍາຮຸ່ງກ່າວ.
ສໍາລັບ ການແຂ່ງຂັນບານບ້ວງ ໃນຊຽງຂວາງ ເກມ ມີການຊີງໄຊ 2 ຫຼຽນຄໍາຄື ປະເພດທີມຊາຍ ແລະ ທີມຍິງ ຈະນໍາໃຊ້ສະໜາມບານບ້ວງຊາວໜຸ່ມ ທີ່ບ້ານໂພນມີໄຊ ແຂວງຊຽງ
(ຂ່າວ-ຮູບ: ຄໍາສອນ)
