ທີມງານກອງບັນຊາການ ປກສ ເມືອງຫຼວງນໍ້າທາ ແຂວງຫຼວງນໍ້າທາ ໄດ້ລົງສົມທົບ ກັບກອງບັນຊາການ ປກຊ ເມືອງ, ອົງການຈັດຕັ້ງພາກສ່ວນທີ່ກ່ຽວຂ້ອງ, ອົງການຈັດຕັ້ງບ້ານ ລົງເຄື່ອນໄຫວ ທຳລາຍສ່ວນຝິ່ນທີ່ປະຊາຊົນລັກລອບປູກຢູ່ຂອບເຂດ ບ້ານສວນຢາ ເມືອງຫຼວງນ້ຳທາ ໃນເນື້ອທີ່ 1,2 ເຮັກຕາ.
ການລົງເຄື່ອນໄຫວວຽກໃນຄັ້ງນີ້ ແມ່ນຈັດຕັ້ງປະຕິບັດໃນກາງເດືອນ ກຸມພາ 2020 ທີ່ຜ່ານມາ, ໂດຍການນໍາພາຂອງ ທ່ານ ພັຕ ອຸດົມພອນ ໄຊຍະຈັກ ຮອງພະແນກຕຳຫຼວດ ປກສ ເມືອງ, ທ່ານ ພັຕ ອ່ອນ ເຈີ້ຍວິໄລຈິດ ຫົວໜ້າພະແນກ ເສນາທິການທະຫານເມືອງ, ມີຄະນະ ກຄສ ເມືອງ, ປກສ ກຸ່ມບ້ານຫ້ວຍດຳ ປກຊ-ປກສ ແລະ ພາກສ່ວນທີ່ກ່ຽວຂ້ອງ.
ການລົງກວດກາ ແລະ ທໍາລາຍສວນຝິ່ນ ແມ່ນຢູ່ເຂດບ້ານສວນຢາ ເມືອງຫຼວງນໍ້າທາ ມີ 1 ຈຸດ, ມີເນື້ອທີ່ 1,2 ເຮັກຕາ, ໄດ້ພ້ອມກັນທໍາລາຍຖີ້ມທັງໝົດດ້ວຍຮູບການເອົາໄມ້ຟາດ, ພ້າຖາງ ແລະ ຫຼົກຕົ້ນນ້ອຍຖີ້ມ ສາມາດທຳລາຍໄດ້ 100%.
ນອກຈາກນີ້ ທາງເຈົ້າໜ້າທີ່ ຍັງຈະໄດ້ລົງຕິດຕາມ ແລະ ເອິ້ນເອົາເຈົ້າຂອງສ່ວນຝິ່ນມາສ້າງບົດບັນທຶກສຶກສາອົບຮົມກ່າວເຕືອນ ແລະ ດຳເນີນຕາມລະບຽບກົດໝາຍ.
ຂໍ້ມູນຈາກ: ຂ່າວສານຫຼວງນໍ້າທາ, ຂ່າວ: ວທ ບຸນທະວີ ລໍບັນໄຜ່