ການທີ່ຈະເຝິກໃຫ້ເດັກນ້ອຍໜຶ່ງຄົນນັ່ງລົງ ແລະ ຕັ້ງໃຈອ່ານໜັງສືເປັນເລື່ອງເປັນລາວບໍ່ແມ່ນເລື່ອງງ່າຍເລີຍ ໂດຍສະເພາະເມື່ອລູກມີສິ່ງອື່ນດຶງດູດໃຈຫຼາຍກວ່າເຊັ່ນ: ຄອມພິວເຕີ, ເກມ, ໂທລະພາບ ຫຼື ໂທລະສັບ. ດັ່ງນັ້ນ, ເຮົາມີວິທີທີ່ຈະຊ່ວຍຈູງໃຈໃຫ້ລູກທີ່ບໍ່ມັກອ່ານໜັງສືຂອງເຈົ້າໃຫ້ມີນິໄສຮັກການອ່ານມາຝາກ ແລະ ຈະຊ່ວຍໃຫ້ພວກເຂົາມີນິໄສຮັກການອ່ານໄປຕະຫຼອດເລີຍກໍ່ເປັນໄປໄດ້.
ສ່ວນຫຼາຍແລ້ວຄົົນທີ່ມີອາຍຸສູງເທົ່ານັ້ນຈະເປັນຜູ້ທີ່ມັກອ່ານໜັງສື ແຕ່ໄວໜຸ່ມ ຫຼື ຄົນໃນສະໄໝໃໝ່ນີ້ຈຶ່ງມັກໃຊ້ເວລາກັບການຫຼີ້ນເກມ ຫຼື ຫຼີ້ນກິດຈະກຳອື່ນໆເຊັ່ນ: ຫຼີ້ນ iPod, iPad ຫຼື ອຸປະກອນສື່ສານອື່ນໆ. ເຖິງແມ່ນວ່າຈະມີສິ່ງຈູງໃຈລູກຫຼາຍພຽງໃດແຕ່ກກໍ່ສາມາດສົ່ງເສີມໃຫ້ລູກມີນິໄສຮັກການອ່ານໄດ້ແຕ່ຍັງນ້ອຍ ແລະ ມີຫຼາຍວິທີທີ່ສາມາດຊ່ວຍປູກຝັງນິໄສຮັກການອ່ານໃຫ້ລູກໄດ້. ເຊິ່ງເຮົາມີເຄັດລັບດີໆມາບອກກັນເພື່ອໃຫ້ເລີ່ມຕົ້ນແກ້ບັນຫາລູກບໍ່ມັກອ່ານໜັງສືໄດ້ຢ່າງຖືກຕ້ອງ.
1ໃຫ້ລູກໄດ້ໃຊ້ເວລາຢູ່ກັບປື້ມຕັ້ງແຕ່ລາວອາຍຸຍັງນ້ອຍ: ຈາກນັ້ນກໍ່ຄ່ອຍໆເລີ່ມປູກຝັງການອ່ານໃຫ້ກັບລູກໂດຍທີ່ບໍ່ມີສິ່ງລົບກວນອື່ນໆເຊັ່ນ: ໂທລະພາບ, ໂທລະສັບມືຖື ແລະ ຄອມພິວເຕີ ເພື່ອໃຫ້ລູກໄດ້ເລືອກຈັບປື້ມຂຶ້ນມາອ່ານຈາກນັ້ນພວກເຂົາຈະສ້າງນິໄສຮັກການອ່ານຂຶ້ນມາເອງ.
2ເຮັດເປັນຕົວຢ່າງໃຫ້ລູກເຫັນ: ຖ້າທ່ານເອງກໍ່ມີນິໄສຮັກການອ່ານ ຫຼື ອ່ານປື້ມທຸກເທື່ອທີ່ທ່ານມີເວລາ ແລະ ມີໂອກາດຈະຊ່ວຍໃຫ້ລູກນ້ອຍຂອງທ່ານຮຽນແບບນິໄສຮັກການອ່ານຂອງທ່ານໄປໃນໂຕນຳ.
3ຊອກປື້ມແນວທີ່ລູກມັກ: ໂດຍເອົາມາໃຫ້ຫຼາຍເທົ່າທີ່ຈະເຮັດໄດ້ເພາະການໄດ້ອ່ານໜັງສືແນວທີ່ຕົນມັກຈະຊ່ວຍສ້າງ ແລະ ເປັນຈຸດກໍາເນີດໃຫ້ມີນິໄສຮັກການອ່ານໄດ້.
4ສອນໃຫ້ລູກອ່ານສິ່ງອື່ນໆນໍາ: ບໍ່ສະເພາະແຕ່ໃຫ້ອ່ານໜັງສືເທົ່ານັ້ນ ແຕ່ສອນໃຫ້ພວກເຂົາອ່ານຂໍ້ຄວາມຂ້າງກ່ອງ ຫຼື ຕາມໂຄຊະນາເປັນຕົ້ນ.
5ເຮັດໃຫ້ການອ່ານເປັນເລື່ອງມ່ວນຊື່ນ: ພໍ່ແມ່ສ່ວນໃຫຍ່ຈະອ່ານໜັງສືໃຫ້ລູກຟັງຕອນທີ່ລູກຍັງນ້ອຍຢູ່ແຕ່ພໍລູກໃຫຍ່ຂຶ້ນມາກໍ່ອ່ານໜ້ອຍລົງມີງານວິໄຈພົບວ່າ: ເດັກນ້ອຍທີ່ພໍ່ແມ່ອ່ານໜັງສືໃຫ້ຟັງຕັ້ງແຕ່ຍັງນ້ອຍເມື່ອພວກເຂົາໃຫຍ່ຂຶ້ນ ແລະ ພໍ່ແມ່ເຊົາອ່ານໜັງສືໃຫ້ຟັງພວກເຂົາຈະຄິດຮອດເວລາທີ່ພໍ່ ຫຼື ແມ່ອ່ານຫນັງສືໃຫ້ຟັງ. ດັ່ງນັ້ນ, ເຖິງແມ່ນລູກທ່ານຈະໃຫຍ່ແລ້ວທ່ານກໍ່ສາມາດອ່ານໜັງສືໃຫ້ລູກຟັງໄດ້ ໂດຍອາດຈະສະຫຼັບໃຫ້ແຕ່ລະຄົນໃນຄອບຄົວເປັນຄົນອ່ານໃຫ້ສະມາຊິກຄົນອື່ນໆຟັງ.
6ໃຫ້ປື້ມເປັນຂອງຂວັນກັບລູກ: ການທີ່ພໍ່ແມ່ໃຫ້ປື້ມກັບລູກຈະເປັນສິ່ງທີ່ໜ້າຕື່ນເຕັ້ນຫຼາຍສຳລັບພວກເຂົາ ໂດຍສະເພາະໜັງສືທີ່ພວກເຂົາຢາກໄດ້ການເຮັດເຊັ່ນນີ້ຈະຊ່ວຍສ້າງນິໄສຮັກການອ່ານໃຫ້ລູກໄດ້ ແລະ ຈະເຮັດໃຫ້ທັງທ່ານມີຄວາມສຸກທີ່ເຫັນພວກເຂົາໄດ້ໄປນັ່ງໃນບ່ອນມັກເພື່ອອ່ານໜັງສືທີ່ພວກເຂົາມັກ.
7ພະຍາຍາມສົ່ງເສີມໃຫ້ລູກຮັກການອ່ານໃຫ້ຫຼາຍ: ໂດຍການຮ່ວມໂອ້ລົມກ່ຽວກັບໜັງສືທີ່ພວກເຂົາຫາກໍ່ອ່ານໄປການເຮັດແບບນີ້ຈະຊ່ວຍສ້າງນິໄສຮັກການອ່ານໄດ້ ແຖມການໄດ້ໂອ້ລົມກັບລູກກ່ຽວກັບໜັງສືທີ່ພວກເຂົາອ່ານແບບເປັນກັນເອງສະແດງເຖິງຄວາມເອົາໃຈໃສ່ ແລະ ຄວາມສົນໃຈທີ່ທ່ານມີຕໍ່ໜັງສືຂອງພວກເຂົານໍາອີກ.
8ຖ້າລອງວິທີອື່ນໆທີ່ກ່າວມາຂ້າງຕົ້ນແລ້ວລູກຍັງບໍ່ມັກອ່ານໜັງສື: ການໃຊ້ສິ່ງຈູງໃຈລູກໃຫ້ອ່ານໜັງສືກໍ່ບໍ່ຜິດພໍ່ແມ່ບາງຄົນໃຊ້ວິທີນີ້ເພື່ອຈູງໃຈໃຫ້ລູກອ່ານໜັງສື ແລະ ພວກເຂົາກໍ່ຮັກການອ່ານໃນທີ່ສຸດ ຫຼື ບໍ່ຮຽກຮ້ອງສິ່ງຕອບແທນນໍາອີກ.
9ການມີສິ່ງກະຕຸ້ນເປັນອີກວິທີທີ່ໃຊ້ໄດ້ຜົນ: ບໍ່ວ່າເດັກນ້ອຍ ຫຼື ຜູ້ໃຫຍ່ກໍ່ຕ້ອງການການຍອມຮັບໃນຄວາມພະຍາຍາມໃນການອ່ານຫນັງສືຂອງພວກເຂົາທັງນັ້ນ. ສະນັ້ນ, ລອງໃຫ້ດາວ ຫຼື ຫຍັງກກໍ່ໄດ້ທີ່ທ່ານຄິດວ່າຈະເຮັດໃຫ້ລູກຮູ້ສຶກພາກພູມໃຈທີ່ໄດ້ລາງວັນເຊິ່ງແນວຄິດນີ້ເປັນແນວຄິດທີ່ດີພໍສົມຄວນ.
10ພາລູກໄປຫ້ອງສະມຸດ ຫຼື ຮ້ານຂາຍປື້ມ: ໄປໃນສະຖານທີ່ໆມີປື້ມຈຳນວນຫຼາຍເພື່ອໃຫ້ລູກໄດ້ມ່ວນຊື່ນກັບການສຳຫຼວດປື້ມຕ່າງໆໃຫ້ຫຼາຍຂຶ້ນ.
