ສາເຫດສຳຄັນທີ່ເຮັດໃຫ້ຄົນເຮົາເຈັບປ່ວຍເປັນ ພະຍາດກະເພາະອາຫານເປັນຈຳນວນຫຼວງຫຼາຍ (ໂດຍສະເພາະແມ່ນຄົນທີ່ເຮັດວຽກຢູ່ຫ້ອງລ້າຫ້ອງການ ເຊິ່ງມັກຈະເຮັດວຽກແຂ່ງກັບເວລາ ແລະ ກິນເຂົ້າບໍ່ເປັນເວລາ) ແລະ ອີກສາເຫດໜຶ່ງແມ່ນເກີດຈາກຄວາມເຄັ່ງຄຽດທີ່ສະສົມໃນແຕ່ລະມື້.
ຄວາມຕຶງຄຽດເປັນສາເຫດສຳຄັນທີ່ເຮັດໃຫ້ອາການເຈັບກະເພາະຮ້າຍແຮງຂຶ້ນ. ເພາະໃນເວລາທີ່ຄຽດລະບົບປະສາດອັດຕະໂນມັດຈະໄປກະຕຸ້ນຕ່ອມ (Adrenal Gland) ໃຫ້ຜະລິດອາດິນນາລີນອອກມາຫຼາຍກວ່າປົກກະຕິ ຈຶ່ງສົ່ງຜົນໃຫ້ຮ່າງກາຍມີການຕື່ນໂຕຢູ່ຕະຫຼອດເວລາ ແລະ ກໍ່ໃຫ້ເກີດຄວາມຄຽດ. ເຊິ່ງຈະກະຕຸ້ນໃຫ້ກະເພາະອາຫານຜະລິດນ້ຳຍ່ອຍອອກມາຫຼາຍຂຶ້ນ ຈົນເກີດມີແຜໃນກະເພາະອາຫານ ແລະ ລຳໄສ້ໃຫ່ຍກໍ່ມີການຫົດໂຕຫຼາຍຂຶ້ນ ໂດຍຈະສ້າງຄວາມເຈັບປວດ ແລະ ທໍລະມານໃຫ້ກັບຜູ້ທີ່ເປັນ.
ໃນເວລາທີ່ຄຽດຮ່າງກາຍຈະມີການປ່ຽນແປງຫຼາຍຢ່າງເຊັ່ນ: ປອດມີການຂະຫຍາຍໂຕຂຶ້ນສ້າງອາກາດທີ່ຈະເຂົ້າສູ່ກ້າມຊີ້ນ ແລະ ຫົວໃຈ ຈຶ່ງເຮັດໃຫ້ມີການຫາຍໃຈໄວຂຶ້ນ ແລະ ຮູດັງກໍ່ຂະຫຍາຍອອກ ເພື່ອໃຫ້ຊ່ອງທາງຫາຍໃຈກວ້າງຂຶ້ນຈຶ່ງເຮັດໃຫ້ຕ່ອມເຫື່ອເຮັດວຽກໜັກຂຶ້ນ ເພື່ອຫຼຸດຜ່ອນຄວາມຮ້ອນໃນກ້າມຊີ້ນ ເຮັດໃຫ້ເສັ້ນເລືອດຝອຍໃນຊັ້ນຜິວໜັງຫົດໂຕ ແລະ ເກີດອາການຂົນລຸກ. ເມື່ອຕ່ອມໄທຣອຍຜະລິດຮໍໂມນເພີ່ມປະຕິກິລິຍາການເຜົາຜານອາຫານອອກມາຫຼາຍ ເພື່ອເພີ່ມພະລັງງານ. ການກະຕຸ້ນຢ່າງຕໍ່ເນື່ອງແບບນີ້ ອາດຈະນຳໄປສູ່ບັນຫາການນອນບໍ່ຫຼັບ ແລະ ມີອາການຫິວເຂົ້າຫຼາຍຂຶ້ນ.
ຄວາມຄຽດຍັງເຮັດໃຫ້ຫົວໃຈເຕັ້ນແຮງຜິດປົກກະຕິ, ຫາຍໃຈຖີ່ຂຶ້ນ, ກ້າມຊີ້ນມີອາການເຄັ່ງຕຶງ, ປາກແຫ້ງ ແລະ ຍິ່ງໄປກວ່ານັ້ນ ຍັງເຮັດໃຫ້ການເຮັດວຽກຂອງກະເພາະອາຫານ ແລະ ລຳໄສ້ຢຸດລົງ ເພື່ອຖະໜອມພະລັງງານຈຶ່ງສົ່ງຜົນໃຫ້ ເກີດກົດໃນກະເພາະອາຫານສູງຂຶ້ນ ເຮັດໃຫ້ເກີດອາການປັ່ນປ່ວນໃນທ້ອງ ແລະ ຮູ້ສຶກປວດຮາກ.
ນອກຈາກພຶດຕະກຳດັ່ງກ່າວແລ້ວ ຈິດໃຈກໍ່ມີສ່ວນສຳຄັນຫຼາຍຕໍ່ການເກີດພະຍາດກະເພາະອາຫານ, ຜູ້ທີ່ມັກສະສົມຄວາມຄຽດໄວ້ເປັນເວລາດົນ ກໍ່ຈະມີຄວາມສ່ຽງຫຼາຍຂຶ້ນ. ເຊິ່ງສາມາດສັງເກດໂຕເອງວ່າຢູ່ໃນເຄື່ອຄ່າຍຄຽດຈົນໃກ້ຈະເປັນພະຍາດກະເພາະ ຫຼື ບໍ່. ຖ້າຮູ້ສຶກເບື່ອອາຫານ, ກິນບໍ່ໄດ້, ມີອາການມຶນງົງ, ງຸດງິດ, ລຳຄານໃຈຢູ່ເລື່ອຍໆ, ມັກຢູ່ຄົນດຽວ, ນອນບໍ່ຫຼັບ, ທ້ອງຜູກ ທັງໝົດນັ້ນຄື: ກຳລັງຈະມີອາການຄຽດ ເຊິ່ງເປັນສັນຍານເຕືອນໃຫ້ຮູ້ວ່າມີໂອກາດທີ່ຈະເຈັບກະເພາະກຳລັງຈະເກີດຂຶ້ນ.
ວິທີຫຼີກລ້ຽງອາການເຈັບກະເພາະມີຄື:
1 ກິນອາຫານໃຫ້ຖືກເວລາ ແລະ ໃຫ້ຄົບ 3 ຄາບ: ເປັນສິ່ງທີ່ຈະຕ້ອງປະຕິບັດເປັນຢ່າງທຳອິດ ເພາະຈະຊ່ວຍໃຫ້ກະເພາະອາຫານຮູ້ຈັກເວລາໃນການຍ່ອຍ ແລະ ປ່ອຍນ້ຳຍ່ອຍອອກມາໃນປະລິມານທີ່ພໍດີທຸກມື້.
2 ສຳລັບຜູ້ທີ່ມີອາກາດເຈັບກະເພາະຢູ່ແລ້ວ: ໃນໄລຍະທຳອິດຕ້ອງຝຶກການກິນອາຫານໃຫ້ຖຶກເວລາ ແຕ່ອາດຈະຮູ້ສຶກເຈັບທ້ອງຫຼາຍຂຶ້ນ ໂດຍເລີ່ມຈາກການກິນອາຫານທີ່ຍ່ອຍງ່າຍເຂັ່ນ: ເຂົ້າປຽກເຂົ້າ. ແຕ່ໃຫ້ຍົກເວັ້ນອາຫານທີ່ມີລົດຊາດເຂັ້ມເຊັ່ນ: ສົ້ມແຮງ, ເຄັມແຮງ, ຫວານແຮງ, ອາຫານດອງ ແລະ ອາຫານທອດທຸກປະເພດ.
3 ເຊົາສູບຢາ ແລະ ຫ້າມດື່ມສິ່ງມຶນເມົາທຸກຊະນິດ: ລວມທັງ ຊາ, ກາເຟ, ເຄື່ອງດື່ມຊູກຳລັງ ແລະ ນ້ຳອັດລົມ ເພາະສິ່ງເຫຼົ່ານີ້ເປັນສາເຫດໜຶ່ງທີ່ເຮັດໃຫ້ກະເພາະອາຫານອັກເສບ ແລະ ອາດຈະໃຫ້ມີອາການເຈັບກະເພາະຮ້າຍແຮງຂຶ້ນອີກ.
4 ບໍ່ຄວນກິນຢາແກ້ປວດ ແລະ ຢາແກ້ອັກເສບທີ່ມີສ່ວນປະສົມຂອງສານ (Steroids): ເພາະຢາຈຳພວກນີ້ມີສ່ວນໄປກະຕຸ້ນໃຫ້ກະເພາະອາຫານເກີດການອັກເສບຫຼາຍຂຶ້ນ. ໃນກໍລະນີທີ່ຈຳເປັນຕ້ອງໃຊ້ຢາເຊັ່ນ: ໃຊ້ປິ່ນປົວຂໍ້ອັກເສບ ໃຫ້ປຶກສາໝໍກ່ອນເພື່ອຄວາມໝັ້ນໃຈ.
5 ຊອກຫາກິດຈະກຳທີ່ຊ່ວຍຜ່ອນຄາຍ: ເຊິ່ງສາມາດເຮັດໄດ້ຫຼາຍວິທີ ບໍ່ວ່າຈະເປັນການອອກກຳລັງກາຍ ແລະ ອື່ນໆ. ເມື່ອປະຕິບັດເປັນປະຈຳກໍ່ຈະຊ່ວຍຫຼຸດຜ່ອນຄວາມຄຽດ ແລະ ໃນໄລຍະຍາວຍັງສາມາດປິ່ນປົວອາການເຈັບກະເພາະໃຫ້ເຊົາອີກດ້ວຍ.