ນ້ຳຕົກຕາດເລາະແຫຼ່ງທ່ອງທ່ຽວທີ່ມີຊື່ສຽງຂອງແຂວງສາລະວັນ - Laoedaily

ນ້ຳຕົກຕາດເລາະແຫຼ່ງທ່ອງທ່ຽວທີ່ມີຊື່ສຽງຂອງແຂວງສາລະວັນ

ນ້ຳຕົກຕາດເລາະ ເປັນສະຖານທີ່ທ່ອງທ່ຽວທີ່ມີຊື່ສຽງຂອງແຂວງສາລະວັນ ເຊິ່ງກຳເນີດເກີດຂຶ້ນມາ ຈາກແມ່ນ້ຳເຊເສັດທີ່ມີຕົ້ນກຳເນີດມາຈາກ ແຂວງເຊກອງ, ເປັນນ້ຳຕົກມີຄວາມສູງປະມານ 10 ແມັດ, ຕັ້ງຢູ່ບ້ານແສນວັງ, ເມືອງ ແລະ ແຂວງສາລະວັນ ໂດຍສະຖານທີ່ດັ່ງກ່າວໄດ້ເປີດນຳໃຊ້ຕັ້ງແຕ່ປີ 1986 ເປັນຕົ້ນມາ ແລະ ໄດ້ມີການພັດທະນາຂຶ້ນເລື້ອຍໆຈົນມາຮອດປັດຈຸບັນ.

“ຕາດເລາະ”ແມ່ນໄດ້ມາຈາກຄຳວ່າ “ໂລະ” ມີຄວາມໝາຍວ່າ “ອະໄວຍະວະເພດຊາຍ” ເຊິ່ງເປັນຄຳເວົ້າຂອງຊົນເຜົ່າທີ່ອາໄສຢູ່ໃນເຂດບໍລິເວນແຫ່ງນີ້.

ມີຄໍາເລົ່າລືວ່າ: ໃນເມື່ືອກ່ອນໄດ້ມີຜູ້ເຖົ້າຄົນໜຶ່ງແຕ່ລະມື້ລາວອອກໄປໄຮ່ໄປສວນເພື່ອຫາຢູ່ຫາກິນ ມື້ໜຶ່ງໃນເວລາຄ້ອຍຄ່ຳເຊິ່ງຕາເວັນໃກ້ຈະຕົກດິນລາວຄິດຢາກໄປອາບນ້ຳກ່ອນທີ່ຈະກັບບ້ານເພາະຢູ່ໃນສະ ຖານທີ່ດັ່ງກ່າວມີນ້ຳຕົກຕາດທີ່ສົ່ງສຽງດັງຮື່ມໆ, ເມື່ອໄປຮອດນ້ຳຕົກຕາດບັງເອີນພໍ່ເຖົ້າໄດ້ພໍ້ກັບຜູ້ສາວສອງເອື້ອຍນ້ອງທີ່ມາແຕ່ໄຮ່ ແລະ ຄິດຢາກອາບນ້ຳເຊັ່ນກັນ ແຕ່ອາດເປັນຍ້ອນພົມລິຄິດຂອງພໍ່ເຖົ້າຄົນນັ້ນທີ່ຈະໄດ້ເມຍຊ້ຳເຖົ້າ, ສອງສາວເອື້ອຍນ້ອງໄດ້ເອີ້ນທັກທາຍພໍ່ເຖົ້າຄົນນັ້ນຕາມພາສາຄົນໄທບ້ານດຽວກັນວ່າ: “ພໍ່ເຖົ້າຢາກໄດ້ເມຍບໍ່?” ດ້ານພໍ່ເຖົ້າກໍ່ບໍ່ລໍຊ້າ ແລະ ໄດ້ຕອບກັບໄປວ່າ: “ກໍ່ຢາກໄດ້ຫັ້ນແລ້ວ, ແຕ່ບໍ່ມີຍິງໃດໃນບ້ານເຮົາສົນໃຈເລີຍ” ເມື່ອໄດ້ຍິນແນວນັ້ນ ສອງເອື້ອຍນ້ອງຈຶ່ງໄດ້ພະນັນກັບພໍ່ເຖົ້າຄົນນັ້ນວ່າ: “ພໍ່ ເຖົ້າກ້າໂຕນລົງຕາດນີ້ບໍ່? ຖ້າພໍ່ເຖົ້າກ້າແລ້ວກັບຂຶ້ນມາໄດ້ພວກຂ້ອຍທັງສອງຂານອາສາຈະເປັນເມຍທັງສອງເລີຍ”.

ເມື່ອພໍ່ເຖົ້າໄດ້ຍິນແນວນັ້ນກໍ່ຄິດໄປຄິດມາວ່າຈະເຮັດແນວໃດດີ ຈະໂຕນລົງຕາດກໍ່ຢ້ານຕາຍ ແລະ ຖ້າບໍ່ໂຕນຕາດກໍ່ຢ້ານສອງເອື້ອຍນ້ອງຫົວເຢາະເຢີ້ຍວ່າເປັນຜູ້ຊາຍທີ່ຂີ້ຢ້ານ ແລະ ອີກຢ່າງໜຶ່ງພໍ່ເຖົ້າເອງກໍຢາກໄດ້ສອງເອື້ອຍນ້ອງມາເປັນເມຍແດ່ ພໍ່ເຖົ້າຈຶ່ງໄດ້ຕັດສິນໃຈຖາມສອງເອື້ອຍນ້ອງໄປຄືນວ່າ: “ພວກຫຼານເວົ້າແທ້ບໍ?”. ສອງເອື້ອຍນ້ອງຕອບວ່າ: “ເວົ້າແທ້ຖ້າພໍ່ເຖົ້າເຮັດໄດ້ພວກເຮົາຍອມເປັນເມຍສາບານກໍ່ໄດ້”.

ເມື່ອໄດ້ຍິນສອງເອື້ອຍນ້ອງຢືນຢັນຄືແນວນັ້ນ ພໍ່ເຖົ້າຕັດສິນໃຈແກ້ຜ້າອອກຈົນເຫັນ “ໂລະ” (ອະໄວຍະວະເພດຊາຍ) ຍານຕາບຊາບແລ້ວພໍ່ເຖົ້າກໍ່ໄດ້ໂດດລົງໄປຕາດນັ້ນຈົນມິດດົນເຕີບເຮັດໃຫ້ສອງເອື້ອຍນ້ອງຕົກໃຈວ່າພໍ່ເຖົ້າຕາຍແລ້ວ!.

ຫຼັງຈາກນັ້ນບໍ່ດົນພໍ່ເຖົ້າກໍ່ໂພ່ຫົວຂຶ້ນມາ ຈຶ່ງເຮັດໃຫ້ເອື້ອຍນ້ອງຕັດສິນໃຈເຮັດຕາມທີ່ໄດ້ສັນຍາກັບພໍ່ເຖົ້ານັ້ນໄວ້ຄື ຍອມເປັນເມຍທັງສອງຄົນເລີຍ, ຈາກນັ້ນສອງເອື້ອຍນ້ອງຈຶ່ງໄດ້ບອກພໍ່ເຖົ້າວ່າ: ມື້ແລງໃຫ້ເພິ່ນໄປສູ່ຂໍນຳພໍ່ແມ່ພວກເຂົາ, ພໍ່ເຖົ້າກໍ່ປະຕິບັດຕາມ ແລະ ໄດ້ສອງເອື້ອຍນ້ອງມາເປັນເມຍພ້ອມກັນ, ຕໍ່ມາຄົນທັງຫຼາຍກໍ່ໄດ້ເອີ້ນຕາດແຫ່ງນີ້ວ່າ: ຕາດໂລະ ຫຼື ຕາດເລາະ ຈົນເທົ່າທຸກມື້ນີ້.

ຕາດເລາະ ເປັນຕາດທີ່ມີຄວາມສວຍງາມທີ່ທຳມະຊາດປັ້ນແຕ່ງຂຶ້ນມາ ແລະ ຈາກຄວາມງົດງາມດັ່ງກ່າວເຮັດໃຫ້ຕາດແຫ່ງນີ້ເປັນສະຖານທີ່ທ່ອງທ່ຽວທີ່ຂຶ້ນຊື່ຂອງແຂວງສາລະວັນ ເຊິ່ງມີນັກທ່ອງທ່ຽວທັງຊາວລາວ ແລະ ຕ່າງປະເທດໃຫ້ຄວາມສົນ ໃຈມາທ່ຽວຊົມເປັນຈຳນວນຫຼວງຫຼາຍ.

ນ້ຳຕົກຕາດ​ເລາະ ​ເປັນສະຖານ​ທີ່​ທ່ອງ​ທ່ຽວ​ທາງ​ທຳ​ມະ​ຊາດ ທີ່​​ສ້າງຄວາມປະ​ທັບ​ໃຈ​ຕໍ່ກັບ​ນັກ​ທ່ອງ​ທ່ຽວທີ່ເຂົ້າມາທ່ຽວຊົມ ເພາະມີທິວທັດທຳມະຊາດທີ່ສວຍງາມ, ມີຕົ້ນໄມ້ໃຫຍ່ຫຼາກຫຼາຍຊະນິດ, ມີນ້ຳຕົກຫຼາຍຊັ້ນໄຫຼຜ່ານໂຂດຫີນ ເມື່ອໄດ້ເຫັນແລ້ວເປັນຕາຢາກລົງໄປອາບໃຫ້ຊື່ນໃຈ. ຕາດ​ເລາະ ຈະ​ມີ​ສາຍ​ນ້ຳ​ໄຫຼຜ່ານຢູ່​ຕະຫຼອດ​ປີ ​ແລະ ​ເປັນ​ຕາ​ທ່ຽວ​ຊົມ​ຫຼາຍ​ທີ່​ສຸດ​ໃນ​ລະຫວ່າງ​ເດືອນພຶດສະພາ ຫາ ເດືອນພະຈິກ ເພາະ​ເປັນໄລຍະ​ທີ່​ມີ​ສາຍ​ນ້ຳ​ໄຫຼທີ່​ສວຍ​ງາມ ແລະ ມີນ້ຳທີ່ນ້ຳ​ໃສ​ສະອາດ.

ນ້ຳ​ຕົກຕາ​ດ​ເລາະ ​ແມ່ນ​ມີ​ຄວາມ​ແຕກ​ຕ່າງ​ຈາກ​ສະຖານ​ທີ່​ອື່ນໆ ​ເພາະ​ສະຖານ​ທີ່​ນີ້​ແມ່ນ​ປະກອບ​ດ້ວຍ​ທຳ​ມະ​ຊາດ​ອັນ​ສວຍ​ງາມ ​ແລະ ມີສາຍ​ນ້ຳ​ເຊ​​ເສັດທີ່​ນຳ​​ໃຊ້​​ເຂົ້າ​ໃນ​ການຜະລິດ​ກະ​ແສ​ໄຟຟ້າ​ໃນ​ລາວ ຄື: ​ເຂື່ອນ​ໄຟຟ້າ​ເຊ​ເສັດ 1 ​ແລະ ​ເຊ​ເສັດ 2 ໂດຍອ້ອມ​ຮອບ​ບໍລິ​ເວນ​ໃກ້​ຄຽງມີ​ປ່າ​ໄມ້​ອຸດົມສົມບູນ, ມີອາ ກາດທີ່​ບໍລິສຸດ ​ແລະ ມີ​ຄວາມ​ສະອາດເປັນ​ທຳ​ມະ​ຊາດ ສາມາດ​ທ່ຽວ​ຊົມ​ດ້ວຍ​ການຍ່າງ​ເລາະ ຫຼື ຂີ່​ຊ້າງ​ທີ່​ເພິ່ນໄດ້ໃຫ້​ບໍລິການ, ນອກຈາກນັ້ນສາມາດຊົມ​ຫມູ່​ບ້ານ​ຊົນ​ເຜົ່າ​ ທີ່​ຕັ້ງ​ຖິ່ນຖານ​ໃກ້​ກັບ​ແມ່​ນ້ຳ​ເຊ​ເສັດ, ຊົມ​ວິຖີ​ການ​ດຳລົງ​ຊີວິດ​ຂອງ​ປະຊາຊົນ​ບັນດາ​ເຜົ່າ, ການ​ທຳ​ມາ​ຫາ​ກິນ, ການ​ຫາ​ປາຂອງ​ປະຊາຊົນ ທີ່​ມີ​ຄວາມ​ຕິ​ດພັນ​ກັບ​ສາຍ​ນ້ຳ​ແຫ່ງ​ນີ້.

ບັນດາຜູ້ຄົນລວມທັງນັກ​ທ່ອງ​ທ່ຽວສ່ວນຫຼາຍ​ມັກ​ພາກັນ​ມາ​ທ່ຽວ​ຫຼິ້ນ ແລະ ລົງຫຼິ້ນນ້ຳຫຼາຍ​ທີ່​ສຸດ​ໃນ​ໄລຍະ​ບຸນ​ປີ​ໃໝ່​ລາວຂອງ​ທຸກໆ​ປີ, ງານ​ບຸນ​ ແລະ ມື້​ພັກຜ່ອນທ້າຍອາທິດ. ຖ້າຫາກວ່າ​ນັກ​ທ່ອງ​ທ່ຽວທ່ານໃດ​ຕ້ອງການ​ພັກຜ່ອນ​ຢູ່​ກັບ​ທີ່​ ເພື່ອ​ທີ່​ຈະ​ໄດ້​ສຳຜັດ​ກັບ​ທຳ​ມະ​ຊາດ​ແບບ​ດົນໆ ​ໃນ​ບໍລິ​ເວນ​ດັ່ງກ່າວຍັງ​ມີ​ເຮືອນ​ພັກ ​ແລະ ຣີສອດ ​ພ້ອມຄອຍ​ບໍລິການ​ສຳລັບ​ນັກ​ທ່ອງ​ທ່ຽວທີ່ມັກໃນການພັກຜ່ອນ, ລັກສະນະທີ່ພັກແມ່ນເປັນ​ຕູບນ້ອຍໆ ​ເຊິ່ງ​ແຕ່​ລະ​ຫຼັງມີ​ຮູບຊົງ​ຄື​ເຮືອນ​ລາວ​, ໃຫ້ຄວາມສະດວກ​ສະບາຍ ​ແລະ ມີ​ຄວາມ​ຈົບ ງາມ​ເປັນ​ເອກະລັກ​ຂອງ​ລາວລວມທັງມີ​ຮ້ານ​ອາຫານ​ໄວ້ຄອຍ​ບໍລິການນຳອີກ.

ຕາດເລາະຫ່າງ​ຈາກ​ຕົວ​ເມືອງ​ສາລະ​ວັນໄປປະມານ 28 ກິໂລ​ແມັດ ​​ໄປ​ຕາມ​ເສັ້ນທາງ ສາລະ​ວັນ ຫາ ປາກ​ເຊ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ