ປາໝຶກຍັດໄສ້ໜຶ້ງໝາກນາວ - Laoedaily

ປາໝຶກຍັດໄສ້ໜຶ້ງໝາກນາວ

ປ່ຽນຈາກປາໜຶ້ງໝາກນາວມາເປັນປາໝຶກຍັດໄສ້ໜຶ້ງໝາກນາວສູດໃນການປຸງແຕ່ງແມ່ນຄ້າຍຄືກັນ ແຕ່ລົດຊາດຈະແປກໄປອີກແບບແຖມໄດ້ຄຸນປະໂຫຍດຈາກປາໝຶກ ແລະ ກຸ້ງອີກດ້ວຍ.

ສ່ວນປະສົມ:

1 ປາໝຶກນ້ອຍ 20 ໂຕ.

2 ກຸ້ງປອກເປືອກ 20 ໂຕ.

3 ໝາກເຜັດ 10 ໜ່ວຍ.

4 ກະທຽມລາວ 2 ກີບ.

5 ນ້ຳໝາກນາວ 3 ບ່ວງແກງ.

6 ນ້ຳປາ 3 ບ່ວງແກງ.

7 ນ້ຳຕານ 1 – 2 ບ່ວງແກງ.

8 ຜັກຫອມປ້ອມສຳລັບແຕ່ງໜ້າ.

ວິທີປຸງແຕ່ງ:

ກ່ອນອື່ນແມ່ນຕ້ອງລ້າງກຸ້ງ ແລະ ປາໝຶກໃຫ້ສະອາດດ້ວຍນ້ຳເກືອແກ້ຄາວ ແລ້ວນຳກຸ້ງທີ່ປອກເປືອກຍັດໃສ່ທາງໃນປາໝຶກ ໂດຍໃຫ້ສ່ວນຫາງອອກມານອກ. ຈາກນັ້ນ, ຈັດໃສ່ຈານແລ້ວບີບໝາກນາວໃສ່ 1 ປ່ຽງ ແລະ ເອົາໄປໜຶ້ງ ປະມານ 10 – 15 ນາທີ ຫຼື ຈົນສຸກ.

ເມື່ອຮຽບຮ້ອຍແລ້ວກໍຕຳນ້ຳແຈ່ວໂດຍເອົາໝາກເຜັດ, ນ້ຳຕານ ແລະ ກະທຽມຕຳໃຫ້ລະອຽດ ແລ້ວປຸງລົດດ້ວຍນ້ຳໝາກນາວ ແລະ ນ້ຳປາຄົນໃຫ້ເຂົ້າກັນດີຊີມລົດຊາດຕາມໃຈມັກ. ຫຼັງຈາກໜຶ້ງປາໝຶກສຸກແລ້ວໃຫ້ຕັກນ້ຳແຈ່ວລາດ ແລະ ໂຮຍໜ້າດ້ວຍຜັກຫອມປ້ອມ ຫຼື ບໍ່ໃສ່ກໍ ໄດ້.

[ ຮຽບຮຽງ: ນຸ້ມນິ້ມ ]

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ