ຖືວ່າເປັນຂ່າວດີ ສຳລັບ ປະຊາຊົນຊາວບໍ່ແກ້ວ ໂດຍສະເພາະແມ່ນຜູ້ທີ່ເປັນພະຍາດໄຂ່ຫຼັງ ບໍ່ຈຳເປັນຕ້ອງເດີນທາງໄປປິ່ນປົວຢູ່ໂຮງໝໍບ່ອນອື່ນໃຫ້ເສຍເວລາ ແລະຄ່າໃຊ້ຈ່າຍຫຼາຍຄືຜ່ານມາອີກ ເພາະປັດຈຸບັນນີ້, ໂຮງຮຽນໝໍແຂວງບໍ່ແກ້ວ ໄດ້ເປີດໃຫ້ບໍລິການແລ້ວຫ້ອງຟອກໄຂ້ຫຼັງ.
ທາງໂຮງໝໍແຂວງບໍ່ແກ້ວໄດ້ມີພິທີຕັດແຖບຜ້າເປີດການໃຫ້ບໍລິການຫ້ອງຟອກໄຂ່ຫຼັງ ຂອງໂຮງໝໍແຂວງບໍ່ແກ້ວຢ່າງເປັນທາງການໃນວັນທີ 13 ກຸມພາ 2020 ນີ້, ເປັນກຽດເຂົ້າຮ່ວມໂດຍທ່ານ ຮສ ດຣ ບຸນກອງ ສີຫາວົງ ລັດຖະມົນຕີ ກະຊວງສາທາລະນະສຸກ, ທ່ານ ປອ ບົວຄົງ ນາມມະວົງ ເຈົ້າແຂວງໆບໍ່ແກ້ວ, ທ່ານ ດຣ ຄໍາຜະຫຍາ ພົມປັນຍາ ຫົວໜ້າພະແນກ ສາທາລະນະສຸກແຂວງ ພ້ອມດ້ວຍພາກສ່ວນທີ່ກ່ຽວຂ້ອງ ພະນັກງານແພດໝໍເຂົ້າຮ່ວມ.
ທ່ານ ດຣ ອານຸສິດ ສີລິສັກ ຮອງອຳນວຍການໂຮງໝໍແຂວງ ກ່າວວ່າ: ເພື່ອປະຕິບັດເນື້ອໃນຂອງວຽກງານ 5 ດີ 1 ພໍໃຈ ທາງກະຊວງສາທາລະນະສຸກ ກໍຄືທາງກົມປິ່ນປົ່ວ ຈຶ່ງໄດ້ປະກອບອຸປະກອນເຄື່ອງຟອກໄຂ່ຫຼັງ 2 ເຄື່ອງ ໃນວັນທີ 22 ກຸມພາ 2019 ແລະ ຕິດຕັ້ງເຄື່ອງ ວັນທີ 4 ມີນາ 2019, ໄດ້ກຽມຫ້ອງຟອກ ແລະ ອຸປະກອນໃນຫ້ອງຟອກ ( ກຽມລະບົບນໍ້າ RO ), ຈັດສົ່ງທີມງານໝໍ, ພະຍາບານ ແລະ ຊ່າງສ້ອມແປງໄປຝຶກອົບຮົມ ຢູ່ປະເທດໄທ, ສຶກສາເບິ່ງຂັ້ນຕອນການປະຕິບັດຕົວຈິງ ຢູ່ ສສ ຫວຽດນາມ, ເຊີນອາຈານຈາກສູນ ກາງມາຊ່ວຍໃນເບື້ອງຕົ້ນ.
ທັງນີ້ ກໍເພື່ອອໍານວຍຄວາມສະດວກ ແລະ ຫຼຸດຜ່ອນການໃຊ້ຈ່າຍຂອງພໍ່ແມ່ປະຊາຊົນບັນດາເຜົ່າ ເພາະພະຍາດດັ່ງກ່າວ ( ໄຂ່ຫຼັງຊຸດໂຊມ ) ໃຊ້ໄລຍະເວລາໃນການປິ່ນປົວຍາວນານ ແລະ ໄດ້ໃຊ້ຄ່າໃຊ້ຈ່າຍເຂົ້າໃນການປິ່ນປົວເປັນຈໍານວນຫຼາຍ.
ຂ່າວ: ຕິມໃຈ – ພາບ: ບຸນເພັດ
