ໃນລະຫວ່າງວັນທີ 6-8 ກຸມພາ 2020 ເມືອງພູຄຸນ ແຂວງ ຫຼວງພະບາງ ໄດ້ຈັດພິທີປະກາດຮັບຮອງເອົາບ້ານດອນເງິນ, ວຽງສະໄໝ ແລະ ບ້ານບວມພໍ ກຸ່ມທ່າບໍແກ້ວ ເມືອງພູຄູນ ເປັນບ້ານວັດທະນະທຳ ໂດຍການເຂົ້າຮ່ວມຂອງທ່ານ ວຽງທອງ ຫັດສະຈັນ ເຈົ້າເມືອງພູຄູນ, ມີປະທານແນວລາວສ້າງຊາດເມືອງ, ຫົວໜ້າຫ້ອງການ ຖວທ, ຫົວໜ້າຫ້ອງການ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ໃນພິທີໄດ້ຮັບຟັງການຜ່ານບົດສະຫຼຸບການຈັດຕັ້ງປະຕິບັດວຽກງານສ້າງຄອບຄົວ ແລະ ບ້ານວັດທະນະທຳ ແລະ ທິດທາງແຜນການໃນຕໍ່ໜ້າຂອງແຕ່ລະບ້ານ ໂດຍປະຕິບັດຕາມ 5 ມາດຖານເງື່ອນໄຂໃນການສ້າງຄອບຄົວ ແລະ 6 ມາດຖານໃນການສ້າງບ້ານວັດທະນະທຳ ທີ່ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວໄດ້ວ່າງອອກ ເພື່ອສ້າງຄົນ, ສ້າງຄອບຄົວ ແລະ ສັງຄົມ ໃຫ້ມີວັດທະນະທຳທີ່ດີ ສືບຕໍ່ປົກປັກຮັກສາຮີດຄອງປະເພນີ, ມູນເຊື້ອອັນດີງາມຂອງເຜົ່າ ແລະ ທ້ອງຖິ່ນ ອອກແຮງປະກອບສວນໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຕາມມະຕິກອງປະຊຸມໃຫ່ຍຂອງອົງຄະນະພັກເມືອງ.
ຜ່ານການປະເມີນຂອງຄະນະຮັບຜິດຊອບ ແລະ ການຈັດຕັ້ງ ມີຄອບຄົວ ຜ່ານຕາມ 5 ມາດຖານໃນການສ້າງຄອບຄົວວັດທະນະທຳ ໃນນີ້ ບ້ານດອນເງິນ ມີ 135 ຄອບຄົວ ກວມເອົາ 95,07% ຂອງຄອບຄົວທັງໝົດ, ບ້ານບວມພໍ ມີ 154 ຄອບຄົວ ກວມ100% ແລະ ບ້ານວຽງສະໄໝ ມີ 110 ຄອບຄົວ ກວມ100% ຂອງຄອບຄົວທັງໝົດ.
ປັດຈຸບັນທົ່ວເມືອງພູຄູນ ໄດ້ຮັບຮອງຄອບຄົວວັດທະນະທຳແລ້ວ ຈຳນວນ 3.222 ຄອບຄົວ ແລະ ປະກາດບ້ານວັດທະນະທຳຢ່າງເປັນທາງການ ຈຳນວນ 31 ບ້ານ ກວມ 77,5% ຂອງຈຳນວນບ້ານ ທັງໝົດຂອງເມືອງ ພ້ອມນີ້ ຍັງຈະສືບຕໍ່ ປະກາດອີກຈຳນວນ 2 ບ້ານ ທີ່ຜ່ານການປະເມີນ ແລະ ໄດ້ຮັບຮອງແລ້ວ.
ທີ່ມາ: ຂ່າວສານຫລວງພະບາງ Luangprabang News
