ເນື່ອງໃນໂອກາດສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 71 ປີ ທີ່ໝູນວຽນມາບັນຈົບຄົບຮອບອີກວາລະໜຶ່ງນັ້ນ, ການນໍາຂອງແຂວງນໍາໂດຍ ທ່ານ ພົງສະຫວັນ ສິດທະວົງ ປະທານປ້ອງກັນຊາດ-ປ້ອງກັນຄວາມສະຫງົບແຂວງ, ເຈົ້າແຂວງ ໄຊຍະບູລີ, ໄດ້ລົງຢ້ຽມຢາມພົບປະກັບອ້າຍນ້ອງທະຫານຊາຍແດນ ເຂດເມືອງ ບໍ່ແຕນ, ໃນວັນທີ 12 ກຸມພາ 2020 ນີ້.
ກ່ອນອື່ນ ທ່ານ ເຈົ້າແຂວງ ແມ່ນໄດ້ຖາມຂ່າວຄາວ, ຄວາມສຸກ-ທຸກ ພ້ອມທັງໄດ້ໃຫ້ກໍາລັງໃຈ ກັບອ້າຍນ້ອງທະຫານຊາຍແດນແຕ່ລະຄົນ, ພ້ອມທັງໄດ້ຮຽກຮ້ອງໃຫ້ອ້າຍນ້ອງທະຫານແຕ່ລະສະຫາຍຈົ່ງເຊີດຊູທຸກກໍາລັງແຮງເຂົ້າໃນການປະຕິບັດໜ້າທີ່-ທີ່ຊາດໄດ້ມອບໝາຍໃຫ້, ກໍ່ຄືການຮັກສາຊາຍແດນ, ເຂດນໍ້າແດນດິນອັນຄົບຖ້ວນຂອງຊາດ, ເວົ້າລວມ, ເວົ້າສະເພາະແມ່ນເຂດນໍ້າແດນດິນຂອງແຂວງ ໄຊຍະບູລີ ໄວ້ໃຫ້ໝັ້ນຄົງ, ພ້ອມກັນອົດທົນຜ່ານຜ່າອຸປະສັກນາໆປະການ ເພື່ອເຮັດໜ້າທີ່ວິຊາສະເພາະໃຫ້ສໍາເລັດ.
ການຢ້ຽມຢາມຄັ້ງນີ້ ທ່ານ ພົງສະຫວັນ ສິດທະວົງ ປະທານປ້ອງກັນຊາດ-ປ້ອງກັນຄວາມສະຫງົບແຂວງ, ຍັງໄດ້ນໍາເອົາເຄື່ອງອຸປະໂພກ-ບໍລິໂພກ ມອບໃຫ້ອ້າຍນ້ອງທະຫານທີ່ເຮັດໜ້າທີ່ປ້ອງກັນຊາຍແດນ, ຈາກນັ້ນ ທ່ານເຈົ້າແຂວງ ພ້ອມດ້ວຍຄະນະກໍ່ໄດ້ຢາມຢາມ ແລະ ພົບປະ ປະຊາຊົນ ບ້ານ ນໍ້າພຽງຕື່ມອີກ.
ທ່ານຄໍາແພງ ພູສີຄໍາ ນາຍບ້ານ ນໍ້າພຽງ, ໄດ້ລາຍງານວ່າ: ບ້ານ ນໍ້າພຽງ ມີ 50 ຄອບຄົວ, ມີຈຳນວນພົນ 293 ຄົນ, ຍິງ 147 ຄົນ, ອາຊີບສ່ວຍໃຫຍ່ແມ່ນເຮັດນາ, ເຮັດສວນປູກພືດ ແລະ ລ້ຽງສັດ, ເປັນຕົ້ນແມ່ນປູກ ສາລີ, ມັນຕົ້ນ, ໝາກເດືອຍ ແລະ ອື່ນໆ, ປີຜ່ານມາ ສາມາດຜະລິດເຂົ້າສະເລ່ຍໃສ່ຫົວຄົນໄດ້ 400 ກິໂລຕໍ່ຄົນຕໍ່ປີ, ພ້ອມນີ້ຄະນະບ້ານຍັງໄດ້ເຮັດໜ້າທີ່ເຄື່ອນໄຫວຮ່ວມກັບອ້າຍນ້ອງທະຫານກວດກາຂອບເຂດຊາຍແດນທີ່ບ້ານຮັບຜິດຊອບ, ເຮັດໃຫ້ບໍລິເວນດັ່ງກ່າວມີຄວາມສະຫງົບໂດຍພື້ນຖານ.
ຈາກນັ້ນ ທ່ານເຈົ້າແຂວງ ກໍ່ໄດ້ຮຽກຮ້ອງໃຫ້ອົງການປົກຄອງບ້ານສືບຕໍ່ຊື້ນໍາ-ນໍາພາປະຊາຊົນໃນການປູກພືດເປັນສິນຄ້າໃຫ້ຫຼາຍ, ປູກໃນສະຖານທີ່-ທີ່ຂັ້ນເທິງໄດ້ຈັດສັນໃຫ້, ເອົາໃຈໃສ່ປົກປັກຮັກສາປ່າໄມ້, ຕ້ານ ແລະ ສະກັດກັ້ນໄຟປ່າ, ຮັກສາສຸຂະພາບ ພ້ອມທັງປ້ອງກັນ ແລະ ເຝົ້າລະວັງການແຜ່ລະບາດຂອງພະຍາດຄົນ ແລະ ສັດຕາມລະດູການ, ຮັກສາຄວາມສາມັກຄີໃຫ້ເປັນປືກແຜ່ນ, ສືກສາອົບຮົມລູກຫຼານໃຫ້ຫ່າງໄກຈາກຢາເສບຕິດ ແລະ ເປັນເຈົ້າການໃນການປ້ອງກັນຊາຍແດນຮ່ວມກັບອ້າຍນ້ອງທະຫານຊາຍແດນໃຫ້ມີຄວາມສະຫງົບ, ໂອກາດດຽວກັນກໍ່ໄດ້ມອບເງິນເພື່ອປະສ່ວນເຂົ້າເປັນກອງທຶນພັດທະນາບ້ານ ຈໍານວນ 20 ລ້ານກີບ.
ຂ່າວ-ພາບ: ອຸ່ນເຮືອນ ໂພທິລັກ
