ທ່ານເຈົ້າແຂວງສະຫວັນນະເຂດ ລົງຊຸກຍູ້ການປັບປຸງແຫຼ່ງທ່ອງທ່ຽວແກ້ງກະເບົາ - Laoedaily

ທ່ານເຈົ້າແຂວງສະຫວັນນະເຂດ ລົງຊຸກຍູ້ການປັບປຸງແຫຼ່ງທ່ອງທ່ຽວແກ້ງກະເບົາ

ໃນວັນທີ 8 ກຸມພາ 2020 ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ພ້ອມຄະນະ ໄດ້ລົງຕິດຕາມຮ່ວມງານຕະຫຼາດນັດຢູ່ດ່ານເຊບັ້ງໄຟ ເມືອງໄຊບູລີ, ໃນໂອກາດງານບຸນເດືອນສາມ ເຊິ່ງເປັນງານບຸນປະເພນີ ໂດຍຈັດຮ່ວມກັນກັບປະເທດເພື່ອນບ້ານ ຄື: ຣາຊະອານາຈັກໄທ ອຳເພີທາດພະນົມ ໂດຍໃຫ້ການຕ້ອນຮັບຂອງ ທ່ານ ອ່ອນລຳພັນ ບົວສີແກ້ວ ເຈົ້າເມືອງໄຊບູລີ ພ້ອມຄະນະ.

ໃນໂອກາດຮ່ວມງານຄັ້ງນີ້ ທ່ານເຈົ້າແຂວງສະຫວັນນະເຂດ ໄດ້ລົງເບິ່ງຕາຝັ່ງເຈື່ອນແຄມຂອງໃນເຂດດັ່ງກ່າວ ເຊິ່ງໄດ້ຖືກນ້ຳເຊາະໃນລະດູຝົນທີ່ຜ່ານມາ. ຈາກນັ້ນ, ກໍໄດ້ທ່ຽວຊົມຮ້ານວາງສະແດງຜະລິດຕະພັນຂອງກຸ່ມການຜະລິດຊາວເມືອງໄຊບູລີ. ໃນນັ້ນ, ປະກອບດ້ວຍ: ຜົນຜະລິດກະສິກຳທີ່ຊາວກະສິກອນທຳການຜະລິດ ເປັນຕົ້ນ: ຫົວຜັກບົ່ວແດງ, ຫົວມັນເພົາ, ໝາກເຜັດ, ໝາກເຫຼ່ນ, ມັນດ້າງ ແລະ ອື່ນໆ ມາວາງຈຳໜ່າຍຢ່າງຫຼວງຫຼາຍ ແລະ ເປັນຜະລິດຕະພັນທີ່ຂາຍດີຂອງກຸ່ມການຜະລິດ ແລະ ເປັນຂອງຝາກຂອງຕ້ອນສຳລັບຜູ້ທີ່ມາຮ່ວມງານໄດ້ຊື້ຕິດໄມ້ຕິດມືກັບບ້ານ.

ໂອກາດດັ່ງກ່າວທ່ານເຈົ້າ ແຂວງສະຫວັນນະເຂດ ກໍໄດ້ກ່າວຍ້ອງຍໍຊົມເຊີຍຕໍ່ຜົນສຳເລັດຂອງພໍ່ແມ່ພີ່ນ້ອງຊາວກະສິກອນ ທີ່ພ້ອມກັນສ້າງຜົນຜະລິດຂອງຕົນອອກສູ່ຕະຫຼາດໄດ້ຢ່າງຫຼວງຫຼາຍ. ພ້ອມນັ້ນ, ຍັງໄດ້ຮຽກຮ້ອງໃຫ້ພໍ່ແມ່ປະຊາຊົນທີ່ເຮັດການຜະລິດຈົ່ງພ້ອມກັນຮັກສາມູນເຊື້ອ, ພ້ອມກັນສືບຕໍ່ສ້າງຜົນຜະລິດກະສິກຳໃຫ້ໄດ້ຫຼາຍ ສົ່ງຂາຍໃຫ້ພຽງພໍກັບຄວາມຕ້ອງການ.

ຈາກນັ້ນ, ກໍໄດ້ເດີນທາງໄປເບິ່ງການປັບປຸງແຫຼ່ງທ່ອງທ່ຽວແກ້ງກະເບົາ ທີ່ກຳລັງພັດທະນາເພື່ອດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ. ໃນນັ້ນ, ໄດ້ມີການປັບປຸງທາງຍ່າງ ແລະ ຮ່ອງນ້ຳ ໂດຍຈະພັດທະນາໃຫ້ມີສີສັນຂຶ້ນຕື່ມ ເປັນຕົ້ນ: ສ້າງອ່າງນ້ຳພຸ ແລະ ຈຸດຖ່າຍຮູບໃຫ້ນັກທ່ອງທ່ຽວ. ທັງນີ້, ກໍເພື່ອເປັນການຟື້ນຟູແຫຼ່ງທ່ອງທ່ຽວແຫ່ງນີ້ໃຫ້ເປັນທີ່ສົນໃຈຂອງຊາວແຂວງສະຫວັນນະເຂດ ກໍຄືບັນດານັກທ່ອງທ່ຽວທັງພາຍໃນ ແລະ ຕ່າງປະເທດໃຫ້ເຂົ້າມາທ່ຽວຊົມ, ພັກຜ່ອນຊົມຢູ່ກັບທຳມະຊາດແຄມຂອງແກ້ງກະເບົາ ຢ່າງອີ່ມອົກອີ່ມໃຈ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ