ຮ້ານຂາຍ ແລະ ສ້ອມແປງໂທລະສັບ ອຸກກີ້ໂມບາຍ ແລະ ວົງດົນຕຣີ ໝາກແຂ່ນແດນເໜືອ ໄດ້ນຳເອົາເຄື່ອງຊ່ວຍເຫຼືອຕ້ານໄພໜາວ ທີ່ລະດົມຈາກຜູ້ໃຈບຸນທີ່ມີນໍ້າໃຈສັດທາ ຢູ່ພາຍໃນ ນະຄອນຫຼວງວຽງຈັນ ແລະ ຕ່າງແຂວງ ມາມອບ ໃຫ້ແກ່ ພະແນກ ສກຂ ຫົວພັນ ເພື່ອໄປມອບຕໍ່ໃຫ້ແກ່ນັກຮຽນທຸກຍາກຂອງ ແຂວງຫົວພັນ ລວມມູນຄ່າ 10 ລ້ານກ່ວາກີບ.
ພິທີມອບ-ຮັບ ດັ່ງກ່າວ, ມີຂຶ້ນໃນຕອນບ່າຍວັນທີ 10 ກຸມພາ 2020 ນີ້ ຢູ່ທີ່ ເດີ່ນກິລາຂອງ ແຂວງຫົວພັນ ເປັນກຽດມອບໂດຍ ທ່ານ ສີສົມສັກ ພົມມາທຳ ຫົວໜ້າ ວົງດົນຕຣີ ໝາກແຂ່ນແດນເໜືອ ແລະ ຕາງໜ້າ ຮັບໂດຍ ທ່ານ ມົນທອງ ລຽນຕິຄຸນ ຫົວໜ້າພະແນກ ສກຂ ພ້ອມດ້ວຍຫົວໜ້າຂະແໜງ ແລະ ພະນັກງານພາຍໃນພະແນກ ສກຂ ເຂົ້າຮ່ວມເປັນສັກຂີພິຍານ.
ທ່ານ ສີສົມສັກ ພົມມາທຳ ກ່າວວ່າ: ເຄື່ອງທີ່ນຳມາມອບໃນຄັ້ງນີ້ປະກອບມີເຄື່ອງນຸ່ງເດັກນ້ອຍ ຍິງ-ຊາຍ, ເຄື່ອງນຸ່ງຫົ່ມ ຜູ້ໃຫຍ່ ຍິງ-ຊາຍ ຜ້າຫົ່ມ, ຖົງຕີນ, ຖົງມື ແລະ ອື່ນໆ ລວມມູນຄ່າປະມານ 10 ກ່ວາລ້ານກີບ, ສຳລັບເຄື່ອງທີ່ນຳມາມອບຄັ້ງນີ້ແມ່ນ ທ່ານ ສຸກສະຫວັນ ພົມມາທຳ ເຈົ້າຂອງຮ້ານຂາຍ ແລະ ສ້ອມແປງໂທລະສັບ ອຸກກີ້ໂມບາຍ ຢູ່ນະຄອນຫຼວງວຽງຈັນ ໄດ້ປຸກລະດົມຮັບບໍລິຈາກ ຈາກຜູ້ໃຈບຸນທີ່ມີນໍ້າໃຈສັດທາ ຢູ່ພາຍໃນ ນະຄອນຫຼວງວຽງຈັນ ແລະ ຕ່າງແຂວງ ທີ່ມີຄວາມສົນໃຈ ແລະ ຈຸດປະສົງ ຢາກຊ່ວຍເຫຼືອສັງຄົມ ໂດຍສະເພາະກໍ່ແມ່ນຄອບຄົວ ແລະ ລູກຫຼານນັກຮຽນຢູ່ ທົ່ວແຂວງຫົວພັນ ຜູ້ທີ່ທຸກຍາກຂາດເຂີນ, ເດັກກຳພ້າ, ເດັກກຳພອຍ, ຜູ້ດ້ອຍໂອກາດ ແລະ ອື່ນໆ ໄດ້ມີອຸປະກອນຮັບໃຊ້, ມີເຄື່ອງນຸ່ງຫົ່ມໄດ້ນຸ່ງເພື່ອມີກຳລັງໃຈສູ້ຊີວິດຕໍ່ໄປ.
ທ່ານ ມົນທອງ ລຽນຕິຄຸນ ໄດ້ສະແດງຄວາມຂອບອົກຂອບໃຈ ແລະ ສະແດງຄວາມຮູ້ບຸນຄຸນຢ່າງລົ້ນເຫຼືອ ມາຍັງບັນດາພໍ່ແມ່ພີ້ນ້ອງທຸກພາກສ່ວນທີ່ໄດ້ຮ່ວມຈິດຮ່ວມໃຈບໍລິຈາກເຄື່ອງຊ່ວຍເຫຼືອໃນຄັ້ງນີ້ໂດຍຜ່ານ ທ່ານ ສຸກສະຫວັນ ພົມມາທຳ ເຈົ້າຂອງຮ້ານຂາຍ ແລະ ສ້ອມແປງໂທລະສັບ ອຸກກີ້ໂມບາຍ
ໂອກາດນີ້ ທ່ານ ມົນທອງ ລຽນຕິຄຸນ ຫົວໜ້າ ພະແນກ ສກຂ ຍັງໄດ້ມອບໃບຍ້ອງຍໍຂັ້ນ ພະແນກ ສກຂ ໃຫ້ແກ່ ທ່ານ ສຸກສະຫວັນ ພົມມາທຳ ເຈົ້າຂອງຮ້ານຂາຍ ແລະ ສ້ອມແປງໂທລະສັບ ຕ່າງໜ້າຮັບໂດຍ ທ່ານ ສີສົມສັກ ພົມມາທຳ ຫົວໜ້າ ວົງດົນຕຣີ ໝາກແຂ່ນແດນເໜືອ ອີກດ້ວຍ.
