ດີໃຈນຳ! ປະຊາຊົນບ້ານຕອກແກ້ວ ເມືອງ ລະມາມ ໄດ້ຊົມໃຊ້ນໍ້າສະອາດ

152

ໃນວັນທີ 5 ກຸມພານີ້ ທີ່ບ້ານຕອກອົງແກ້ວ ເມືອງລະມາມ ແຂວງເຊກອງ ໄດ້ຈັດພິທີມອບ-ຮັບລະບົບນໍ້າປະປາຊຸມຊົນ ລະຫວ່າງອົງການຊ່ວຍເຫຼືອເຊີ່ງກັນ ແລະ ກັນປະຈຳແຂວງເຊກອງ ກັບຫ້ອງວ່າການເມືອງລະມາມ, ໃຫ້ກຽດເຂົ້າຮ່ວມ ທ່ານ ນາງ ເກດ ຕາງໜ້າໃຫ້ອົງການຊ່ວຍເຫຼືອເຊິ່ງກັນແລະ ກັນ ປະຈຳແຂວງ ເຊກອງ ( ໃນນາມຜູ້ໃຫ້ທຶນ ), ມີຕາງໜ້າພະແນກສາທາລະນະສຸກແຂວງ, ຕາງໜ້າຫ້ອງວ່າການ-ຫ້ອງການສາທສາລະນະສຸກເມືອງລະມາມ, ຄູ່ຮ່ວມພັດທະນາ,ອຳນາດການປົກຄອງບ້ານ ພ້ອມດ້ວຍປະຊາຊົນພາຍໃນບ້ານດັ່ງກ່າວເຂົ້າຮ່ວມເປັນສັກຂີພິຍານ.

ໃນພິທີ, ທ່ານ ໄຊນະລົງ ສິດທິສັກ ວິຊາການລະບົບນໍ້າ ໂຄງການສ້າງຄວາມເຂັ້ມແຂງດ້ານການບໍລິການ ຮັກສາສຸຂະພາບໄລຍະ 2 ກ່າວວ່າ: ເພື່ອເຮັດໃຫ້ປະຊາຊົນບ້ານຕອກອົງແກ້ວ ເມືອງລະມາມ ແຂວງເຊກອງ ໄດ້ມີນໍ້າໃຊ້ທີ່ສະອາດ, ພຽງພໍ, ມີສຸຂະອານາໄມທີ່ດີ ແລະ ເອື້ອຍອຳນວຍຄວາມສະດວກໃນການປັບປຸງຊີວິດການເປັນຢູ່ໃຫ້ແກ່ເຂົາເຈົ້າ ອົງການຊ່ວຍເຫຼືອເຊິ່ງກັນ ແລະ ກັນປະຈຳແຂວງ ໄດ້ສະໜັບສະໜູນທຶນຊ່ວຍເຫຼືອຈຳນວນໜືຶ່ງ ເພື່ອຈັດຊື້ອຸປະກອນກໍ່ສ້າງ ແລະ ອຳນວຍຄວາມສະດວກໃຫ້ແກ່ວິຊາການນຳພາການກໍ່ສ້າງ ໂດຍການມີສ່ວນຮ່ວມຂອງປະຊາຊົນ.

ໂຄງການລະບົບນໍ້າປະປາຊຸມຊົນ ບ້ານຕອກອົງແກ້ວ ໄດ້ລົງມືກໍ່ສ້າງ ມາແຕ່ວັນທີ 27 ຕຸລາ 2019 ແລະ ສຳເລັດ ໃນວັນທີ 8 ມັງກອນ 2020, ມີມູນຄ່າການກໍ່ສ້າງທັງໝົດ ຈຳນວນ 95 ລ້ານ 7 ແສນກວ່າກີບ, ໃນນີ້ມີທຶນທີ່ໄດ້ຮັບການຊ່ວຍເຫຼືອຈາກອົງການຊ່ວຍເຫຼືອເຊິ່ງກັນ ແລະ ກັນ ຈຳນວນ 79 ລ້ານ 2 ແສນກວ່າກີບ ແລະ ທຶນສົມທົບຈາກປະຊາຊົນພາຍໃນບ້ານ ຈຳນວນ 16 ລ້ານ 5 ແສນກວ່າກີບ.

ນອກນີ້, ຍັງໄດ້ໃຫ້ທຶນຊ່ວຍເຫຼືອບ້ານດັ່ງກ່າວໃນການກໍ່ສ້າງວິດຖ່າຍ ຈຳນວນ 23 ຫຼັງຄາເຮືອນ ມູນຄ່າ 16 ລ້ານກວ່າກີບ, ລວມທັງໝົດໃນການກໍ່ສ້າງລະບົບນໍ້າປະປາຊຸມຊົນ ແລະ ການກໍ່ສ້າງວິດຖ່າຍ ມູນຄ່າຈຳນວນ 111 ລ້ານ 8 ແສນກວ່າກີບ, ໃຫ້ກຽດມອບໂຄງການລະບົບນໍ້າປະປາຊຸມຊົນໃນຄັ້ງນີ້ ໂດຍທ່ານ ນາງ ເກດ ຕາງໜ້າໃຫ້ແກ່ອົງການຊ່ວຍເຫຼືອເຊີ່ງກັນ ແລະ ກັນແຂວງເຊກອງ ແລະ ທ່ານ ນາງ ຄຳປຸຍ ພົມມະຈັນ ຄະນະຫ້ອງວ່າການເມືອງລະມາມ ເປັນຜູ້ກ່າວຮັບ.

ໃນໂອກາດນີ້ ທ່ານ ນາງ ເກດ ຍັງໄດ້ມີຄວາມເຫັນວ່າ: ລະບົບນໍ້າປະປາຊຸມຊົນ ແມ່ນມີຄວາມສຳຄັນຫຼາຍ ໃນການນຳໃຊ້ເຂົ້າໃນການປັບປຸງຊີວິດການເປັນຢູ່ຂອງປະຊາຊົນ ສະນັ້ນເພື່ອເປັນການປົກປັກຮັກສາ ແລະ ນຳໃຊ້ໃຫ້ຍືນຍົງ ຈິ່ງຮຽກຮ້ອງມາຍັງພາກສ່ວນທີ່ກ່ຽວຂ້ອງຂັ້ນແຂວງ-ເມືອງ ເອົາໃຈໃສ່ຊີ້ນຳ-ນຳພາ ແລະຈັດຕັ້ງຄະນະຄຸ້ມຄອງບໍລິຫານລະບົບນໍ້າ ຮວ່ມກັບອຳນາດການປົກຄອງບ້ານຢ່າງເປັນລະບົບ ໂດຍໃຫ້ປະຊາຊົນມີສ່ວນຮ່ວມແລະເປັນເຈົ້າການໃນການປົກປັກຮັກສາ ເພື່ອຮັບປະກັນໄດ້ໃນການຊົມໃຊ້ໃຫ້ເກີດປະໂຫຍດສູງສຸດ ແລະ ຍາວນານ.

ທີ່ມາ: ຂ່າວເຊກອງ