ຂີ່ຊ້າງຊົມເມືອງໄຊຍະບູລີ ໃນເທດສະການບຸນຊ້າງ - Laoedaily

ຂີ່ຊ້າງຊົມເມືອງໄຊຍະບູລີ ໃນເທດສະການບຸນຊ້າງ

ມະຫະກຳບຸນຊ້າງ ເປັນບຸນປະເພນີ ແລະ ເປັນບຸນມິ່ງຂວັນຄູ່ບ້ານຄູ່ເມືອງຂອງຊາວເມືອງໄຊຍະບູລີ ທີ່ສືບສານກັນມາແຕ່ບູຮານ ເຊິ່ງສະແດງເຖິງວິຖີການດຳລົງຊີວິດຂອງປະຊາຊົນບັນດາເຜົ່າຂອງແຂວງໄຊຍະບູລີ ທີ່ຕິດພັນກັບຊ້າງມາແຕ່ດົນນານ.

ງານມະຫະກຳບຸນຊ້າງ ປະຈໍາປີ 2020 ຈະເລີ່ມເປີດບໍລິການໃຫ້ນັກທ່ອງທ່ຽວແຕ່ວັນທີ 18 ກຸມພາ 2020 ເປັນຕົ້ນໄປ ແລະ ໃນວັນທີ 21 ກຸມພາ ຈະໄດ້ຈັດພິທີເຮັດບຸນຕັກບາດອຸທິດບຸນກຸສົນໃຫ້ຊ້າງ. ສໍາລັບພິທີເປີດເປັນທາງການແມ່ນຈະໄດ້ຈັດຂຶ້ນໃນວັນທີ 22 ກຸມພາ 2020 ແລະ ປິດໃນວັນທີ 28 ກຸມພາ 2020, “ ທ່ານ ຍັນຍົງ ສີປະເສີດ ຮອງເຈົ້າແຂວງໄຊຍະບູລີ ແລະ ປະທານຈັດງານມະຫະກຳບຸນຊ້າງ ກ່າວໃນພິທີຖະແຫຼງຂ່າວ ”.

ມີຫຼາກຫຼາຍກິດຈະກຳທີ່ຕິດພັນກັບບຸນຊ້າງ ແລະ ການອະນຸຮັກຊ້າງ ໂດຍສະເພາະແມ່ນການສະແດງຂອງຊ້າງຄຳຮູ້, ພິທີບາສີສູ່ຂວັນຊ້າງ, ການໃຫ້ອາຫານຊ້າງ, ຂີ່ຊ້າງຊົມເມືອງ ແລະ ກິດຈະກຳທີ່ຕິດພັນກັບວັດທະນະທຳ, ຕິດພັນກັບວິຖີຊີວິດຂອງປະຊາຊົນຊາວໄຊຍະບູລີ ແລະ ອື່ນໆອີກ.

ເຖິງຢ່າງໃດກໍຕາມ, ໜຶ່ງໃນກິດຈະກຳທີ່ໜ້າປະທັບໃຈທີ່ສຸດແມ່ນການຂີ່ຊ້າງຊົມເມືອງ ເປັນກິດຈະກຳຫຼັງຈາກທີ່ສະແດງຊ້າງຄຳຮູ້ໃນພິທີເປີດບຸນຊ້າງທຸກໆປີ ແລະ ຈະໄດ້ຂີ່ຊ້າງທ່ຽວຊົມຕົວເມືອງໄຊຍະບູລີ ໂດຍເລີ່ມຈາກສະໜາມຫຼວງ ອອກເດີນທາງສູ່ເສັ້ນທາງຫຼວງໃນເມືອງຢ່າງເບີກບານມ່ວນຊື່ນ, ຕະຫຼອດເສັ້ນທາງການຂີ່ຊ້າງຈະມີຊາວບ້ານທັງຫຼາຍມາຢືນຢູ່ແຄມທາງເພື່ອເອົາອ້ອຍ ແລະ ອາຫານການກິນຂອງຊ້າງໃຫ້ຊ້າງກິນຢ່າງເປັນຂະບວນຟົດຟື້ນ.

ຂີ່ຊ້າງຊົມເມືອງ ເປັນອີກກິດຈະກຳໜຶ່ງທີ່ໜ້າຕື່ນຕາຕື່ນໃຈ ແລະ ປະທັບໃຈທີ່ສຸດສຳລັບຄະນະນຳຈັດງານບຸນຊ້າງ ແລະ ນັກທ່ອງທ່ຽວທັງຫຼາຍທີ່ມາໃນງານບຸນຊ້າງ ໂດຍຂີ່ຊ້າງເລາະຕາມເສັ້ນທາງຫຼັກ, ຊົມວິຖີຊີວິດຂອງຊາວເມືອງໄຊຍະບູລີ ທີ່ມາທ່ຽວໃນງານ ແລະ ຄົນພື້ນທີ່ ເຊິ່ງປະກອບມີຫຼາກຫຼາຍຊົນເຜົ່າ ເຊັ່ນ: ເຜົ່າລາວ, ເຜົ່າລື້, ເຜົ່າຍວນ, ເຜົ່າໄທດໍາ, ເຜົ່າກຶມມຸ, ເຜົ່າໄປຼ, ເຜົ່າອິວມຽນ ແລະ ເຜົ່າມົ້ງ ທີ່ມີວັດທະນະທຳຮີດຄອງປະເພນີ ແລະ ການນຸ່ງຖືທີ່ແຕກຕ່າງກັນ.

ນອກນັ້ນ, ຍັງໄດ້ຊົມທິວທັດຂອງຕົວເມືອງໄຊຍະບູລີ ເຊິ່ງເປັນຕົວເມືອງນ້ອຍໆທີ່ມີປະຊາກອນອາໄສຢູ່ຢ່າງເບົາບາງ ແລະ ອ້ອມຮອບດ້ວຍ  ພູຜາຢ່າງສວຍງາມ, ເມື່ອຂີ່ຊ້າງມາຮອດອະນຸສາວະລີເມືອງ ເບິ່ງກັບມາທາງທິດຕາເວັນອອກຈະສາມາດເຫັນພາບທີ່ສວຍງາມເໝືອນ  ຊ້າງກຳລັງຍ່າງ ແລະ ວິວຕົວເມືອງທັງໝົດທີ່ໜ້າປະທັບໃຈທີ່ສຸດເລີຍ.

ສຳລັບການເດີນທາງໄປທ່ຽວບຸນຊ້າງ ນັກທ່ອງທ່ຽວສາມາດເດີນທາງດ້ວຍລົດສ່ວນຕົວ ຫຼື ລົດໂດຍສານ, ການອອກເດີນທາງແຕ່ນະຄອນຫຼວງວຽງຈັນ ຫາແຂວງໄຊຍະບູລີ ດ້ວຍໄລຍະທາງປະມານ 350 ກິໂລແມັດ ໄປຕາມເສັ້ນທາງ 11 A ລຽບຕາມເມືອງສັງທອງ ນະຄອນຫຼວງວຽງຈັນ – ເມືອງໝື່ນ – ເມືອງຊະນະຄາມ ຂ້າມຂົວນ້ຳຂອງຊະນະຄາມ ແຂວງ ວຽງຈັນ – ປາກລາຍ ແລ້ວໄປສູ່ເມືອງໄຊຍະບູລີ.

ຕະຫຼອດເສັ້ນທາງແຕ່ນະຄອນຫຼວງວຽງຈັນ ໄປຫາເມືອງປາກລາຍ, ເສັ້ນທາງສ່ວນຫຼາຍແມ່ນລຽບຕາມແມ່ນ້ຳຂອງຂຶ້ນໄປ ເຊິ່ງມີທິວທັດທຳມະຊາດສວຍງາມ ເປັນຕົ້ນບັນດາເກາະດອນຕ່າງໆ ທີ່ຢັງຢາຍກະແຈກກະຈາຍຕາມສາຍນ້ຳຂອງ ນັກທ່ອງທ່ຽວສາມາດແວ່ພັກຕາມຈຸດຕ່າງໆຖ່າຍຮູບ ຫຼື ພັກຜ່ອນຢ່ອນອາລົມຕາມຄວາມຕ້ອງການ ຕາມເສັ້ນທາງທີ່ມີຫຼາຍຮູບແບບແຕກຕ່າງກັນ, ມີບາງຈຸດຍັງບໍ່ທັນປູຢາງ, ບາງຈຸດເສັ້ນທາງແຄບການເດີນທາງອາດຊັກຊ້າໜ້ອຍໜຶ່ງ, ເພີດເພີນໄປກັບການເດີນທາງດ້ວຍຫຼາຍສີສັນ ຫຼື ທ່ານຈະເດີນທາງໄປຕາມທາງເລກທີ 13 ເໜືອ ແລ້ວລ້ຽວຊ້າຍຢູ່ 3 ແຍກກາສີ, ມຸ່ງໜ້າໄປເສັ້ນທາງພູ 9 ຫຼັກ ຈົນຮອດທາງ 3 ແຍກເມືອງນານ ແລ້ວລ້ຽວຊ້າຍມຸ່ງໜ້າໄປຜ່ານເມືອງນານ ຂ້າມຂົວນ້ຳຂອງ ກໍສາມາດໄປເຖິງແຂວງໄຊຍະບູລີ ເຊັ່ນກັນ.

( ໂດຍ: ກາວຊົ່ງ )

 

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ
error: Content is protected !!