ໄຊບູລີເປີດງານບຸນປະເພນີເດືອນສາມເພັງ ທີ່ບ້ານດ່ານປາກເຊບັ້ງໄຟຢ່າງຄືກຄືນ - Laoedaily

ໄຊບູລີເປີດງານບຸນປະເພນີເດືອນສາມເພັງ ທີ່ບ້ານດ່ານປາກເຊບັ້ງໄຟຢ່າງຄືກຄືນ

ເພື່ອເປັນການສືບຕໍ່ອະນຸລັກຮັກສາຮີດຄອງມາແຕ່ບູຮານນະການ, ເມືອງໄຊບູລີ ໄດ້ຈັດງານບຸນປະເພນີຂຶ້ນພ້ອມກັນ 4 ແຫ່ງ ຄື: ບຸນປະເພນີ ໃບເສມາວັດນິມິດ ກະຕຶບບ້ານກາງ ບຸນປະເພນີ ໃບເສມາບ້ານສີໄຄ , ບຸນປະເພນີໃບເສມາບ້ານນາມ່ວງ ແລະ ບຸນປະເພນີເດືອນສາມເພັງທີ່ບ້ານປາກເຊບັ້ງໄຟເມືອງໄຊບູລີ ແຂວງສະຫວັນນະເຂດ .

ພິທີ ເປີດງານບຸນປະເພນີ ເດືອນສາມເພັງ ຈັດຂຶ້ນວັນທີ 3 ກຸມພາ 2020,ນີ້ ຢູ່ທີ່ ບ້ານ ປາກບັ້ງໄຟ ເມືອງໄຊບູລີ ແຂວງສະຫວັນນະເຂດ ໂດຍການເຂົ້າຮ່ວມເປັນປະທານ ເປີດງານຂອງທ່ານ ນາງ ດາວວອນ ໄຊສຸລຽນ ກໍາມະການພັກແຂວງ ຫົວໜ້າພະແນກຖະແຫຼງຂ່າວ, ວັດທະນະທໍາ ແລະທ່ອງທ່ຽວແຂວງສະຫວັນນະເຂດ, ທ່ານ ອ່ອນລໍາພັນ ບົວສີແກ້ວ ເລຂາພັກເມືອງ ເຈົ້າເມືອງໄຊບູລີ ,ຮອງເຈົ້າໆເມືອງ ໜອງບົກ ແຂວງຄໍາມ່ວນ, ນາຍອໍາເພີທາດພະນົມ (ແຫ່ງລາຊາອານາຈັກໄທ) ການນໍາຂັ້ນເມືອງ ອໍານາດການປົກຄອງຂັ້ນບ້ານ ທັງ 54 ບ້ານຕະຫຼອດຮອດພໍ່ແມ່ປະຊາຊົນ ແມ່ຄ້າຊາວຂາຍ ເຂົ້າຮ່ວມ

ທ່ານ ອ່ອນລໍາພັນ ບົວສີແກ້ວ ເຈົ້າເມືອງໄຊບູລີ ກໍ່ໄດ້ກ່າວເປີດງານຢ່າງເປັນທາງການວ່າ: ການຈັດງານບຸນໃນປີນີ້ ແມ່ນຈະໄດ້ເລີ່ມແຕ່ວັນທີ 1 – 9 ກຸມພາ 2020 ລວມ 9 ມື້ 9 ຄືນ ເຊິ່ງໃນແຕ່ລະປີ ສາມາດດຶງດູດນັກທ່ອງທ່ຽວຕ່າງເມືອງ, ຕ່າງ ແຂວງທັງພາຍໃນ ແລະຕ່າງປະເທດມາທ່ຽວບໍ່ຕໍ່າກວ່າ 34.872 ຄົນ, ນັກທ່ອງທ່ຽວໄທຂ້າມມາທ່ຽວ ກໍ່ຄືສະຖານທີ່ແຫ່ງນີ້ ມີ 11.489 ຄົນ ແລະປະຊາຊົນລາວເຮົາຂ້າມໄປທ່ຽວງານບຸນທາດພະນົມມີ 23.383 ຄົນ ສະເພາະປີ 2020 ນີ້ ການນໍາຂັ້ນເມືອງຈຶ່ງຖືໂອກາດນີ້ ເປີດງານບຸນດັ່ງກ່າວ ເປັນງານບຸນປະເພນີຂອງເມືອງ ໃນງານບຸນເດືອນ 3 ເພັງ ພວກເຮົາຍັງໄດ້ຫ້າງຫາກະກຽມຮ້ານວາງສະແດງສິນຄ້າກະສິກໍາ, ຫັດຖະກຳ, ອຸດສາຫະກໍາ ແລະສິນຄ້າໂອດັອບ ທີ່ເປັນພູມປັນຍາຂອງຊາວບ້ານ ສິນຄ້າກະສິກໍາທີ່ນໍາມາວາງຂາຍ ເປັນຕົ້ນແມ່ນ: ມັນເພົາໃຫຍ່, ສາລີຫວານ, ໝາກເຜັດ, ໝາກເຂືອ, ໝາກແຕງ ແລະເຄື່ອງກະສິກໍາອື່ນໆ, ສິນຄ້າຫັດຖະກໍາໄດ້ແກ່ ສາດຜື, ແພຍ້ອມຄາມທໍາມະຊາດ , ສິນຄ້າອຸດສາຫະກໍາ ນໍ້າຕານມິດລາວ ທີ່ໄດ້ມາຈາກໂຮງງານນໍ້າຕານ ບ້ານແກ້ງແຮດ ແລະຍັງມີສິນຄ້າ ໂອດັອບ ໄດ້ແກ່ຢາມ່ອງສະໝູນໄພ ທີ່ນໍາເປັນຂອງຟາກຂອງຕ້ອນຈາກເມືອງ.

ນອກຈາກງານບຸນເດືອນສາມເພັງນີ້ແລ້ວ ພວກເຮົາຍັງຈະໄດ້ສືບຕໍ່ຕົກລົງຈັດສັນຕະຫຼາດນັດຂຶ້ນ ໃນ 2 ວັນຂອງທຸກໆອາທິດຄື: ວັນຈັນ ແລະ ວັນພະຫັດ ທີ່ບໍລິເວນທາງລົງດ່ານປາກເຊບັ້ງໄຟ ແລະ ສ້າງເສັ້ນທາງລົງດ່ານ ຕມ ໃນ ມູນຄ່າ 230.887.332 ກີບ ສ້າງອາຄານອາເນກປະສົງຂຶ້ນ 1 ຫຼັງເພື່ອຮອງຮັບພະນັກງານວິຊາການທີ່ລົງປະຕິບັດໜ້າທີ່ໃນງານບຸນປະເພນີເດືອນສາມເພັງ ໃນມູນຄ່າ 83.903.000 ກີບ ແລະ ຫ້ອງນໍ້າ 18.870.000 ກີບ ເຊື່ອມໂຍງກັບການ ພັດທະນາແຫຼ່ງທ່ອງທ່ຽວຂອງເມືອງ, ກໍ່ຄືພັດທະນາແຫຼ່ງທ່ອງທ່ຽວທາງດ້ານວັດທະນະທໍາ ເປັນຕົ້ນແມ່ນການຟື້ນຟູແຫຼ່ງທ່ອງທ່ຽວເມືອງບູຮານ ແຫ່ງລາຊາອານາຈັກສີໂຄດຕະບູນ ທີ່ບ້ານໜອງເຮືອທອງ ໃນນັ້ນມີແຜນທີ່ຈະສ້າງຕົວຈິງມີ: ສາລາແຄມນໍ້າໃກ້ບໍລິເວນຮ່ອງຮອຍຂຸມເສົາຕາມພະລານຫີນ ຢູ່ແຄມຝັ່ງເວີນຊາ ແຄມແມ່ນໍ້າເຊບັ້ງໄຟ ແລະປຸກສາລາບໍລິເວນຈຸດພົບ, ສາລາບໍລິເວນ ສິມເກົ່າ ແລະ ຫໍສັກກາລະບູຊາ ບ່ອນທີ່ພົບເຫັນວັດຖຸບູຮານ.

ໃນພິທີ ຍັງໄດ້ຮັບຊົມຂະບວນສິລະປະ ຂອງກຸ່ມກ້ອນສະຫະພັນແກ້ງເບົາ ແລະ ຂອງນ້ອງນ້ອຍນັກຮຽນ ມັດທະຍົມນາສັງ ນອກນີ້ແລ້ວ ບັນດາປະທານຍັງໄດ້ຍ່າງເລາະ ຮັບຊົມ ຜະລິດຕະພັນທີ່ວາງສະແດງພາຍໃນງານຢ່າງມ່ວນຊື່ນ

ຈາກ: ເມືອງໄຊບູລີ

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ