ອີຢູເຕືອນອັງກິດກ່ອນແຍກຈາກສ່ຽງບໍ່ໄດ້ເຂົ້າຮ່ວມຕະຫຼາດດຽວ - Laoedaily

ອີຢູເຕືອນອັງກິດກ່ອນແຍກຈາກສ່ຽງບໍ່ໄດ້ເຂົ້າຮ່ວມຕະຫຼາດດຽວ

ຜູ້ນໍາສະຫະພາບເອີຣົບຫຼືອີຢູກ່າວເຕືອນອັງກິດເປັນຄັ້ງສຸດທ້າຍໃນວັນທີ31ເດືອນ ມັງກອນປີ2020ທີ່ຜ່ານມາກ່ອນອອກຈາກການເປັນສະມາຊິກຂອງອີຢູຢ່າງເປັນທາງການໃນວັນທີ1ເດືອນ ກຸມພາໂດຍລະບຸວ່າອັງກິດຈະບໍ່ມີສິດໄດ້ໃນການເຂົ້າເຖິງຕະຫຼາດດຽວຂອງອີຢູຫາກບໍ່ຍອມຮັບກົດລະບຽບດ້ານຕ່າງໆເຊັ່ນສິ່ງແວດລ້ອມ,ແຮງງານ,ການເຄື່ອນຍ້າຍຜູ້ຄົນ ແລະ ພາສີເປັນຕົ້ນ.

ໂດຍຜູ້ນໍາຂອງ3ສະຖາບັນຫຼັກອີຢູປະກອບມີ:ຊານ ໄມເຄິນ ປະທານຄະນະມົນຕີເອີຣົບ,ເດວິດ ຊາໂຊລີ ປະທານສະພາເອີຣົບ ແລະ ເອີຊູລາ ຟອນ ເດິລາເຢນ ປະທານຄະນະກໍາມາທິການເອີຣົບຮ່ວມກັນຂຽນບົດສະແດງຄວາມຄິດເຫັນເຊິ່ງເຜີຍແຜ່ໂດຍສື່ຂອງອີຢູຫຼາຍແຫ່ງກ່າວເຖິງອັງກິດວ່າຫາກປາສະຈາກການເປັນສະມາຊິກອັງກິດກໍຈະບໍ່ໄດ້ຮັບສິດທິຂອງສະມາຊິກ,ຫາກອັງກິດບໍ່ຍອມຮັບການເຄື່ອນຍ້າຍຜູ້ຄົນໂດຍເສລີກໍຈະບໍ່ໄດ້ຮັບສິດທິໃນການເຄື່ອນຍ້າຍສິນຄ້າ ແລະ ບໍລິການຢ່າງເສລີເຊັ່ນກັນ.

ອັງກິດກຽມອອກຈາກອີຢູໃນວັນທີ1ກຸມພາ ແລະ ຈະເຂົ້າສູ່ໄລຍະປ່ຽນຜ່ານຈົນເຖິງເດືອນ ທັນວາປີ2020ໂດຍໄລຍະເວລາດັ່ງກ່າວອັງກິດຕິອງເຈລະຈາກັບທາງອີຢູໃນເລື່ອງສໍາຄັນຕ່າງໆເຊິ່ງຈະກໍານົດຄວາມສໍາພັນລະຫວ່າງອັງກິດ ແລະ ອີຢູໃນອະນາຄົດເຊັ່ນເລື່ອງການຄ້າ,ພາສີອາກອນ ແລະ ການປະມົງເປັນຕົ້ນ.

ທັງນີ້,ອີຢູຢືນຢັນວ່າ:ອັງກິດຕ້ອງຍອມຮັບກົດລະບຽບຂອງອີຢູເພື່ອບໍ່ເປັນການເອົາປຽບປະເທດສະມາຊິກຫາກຕ້ອງການຢູ່ໃນຕະຫຼາດດຽວກັນຂອງອີຢູ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ