ທະນາຄານເອັສທີ ຈໍາກັດ ໄດ້ມີແຜນຂະຫຍາຍສາຂາ ອີກສອງແຫ່ງ ໃນປີ 2020 ເປັນຕົ້ນແມ່ນ ສາຂາຊຽງຂວາງ ແລະ ສາຂາສາລະວັນ ເພື່ອຕອບສະໜອງການບໍລິການລູກຄ້າທີ່ກໍາລັງມີທ່າອ່ຽງເພີ່ມຂຶ້ນ ຄຽງຄູ່ກັບການອອກຜະລິດຕະພັນໃໝ່ທີ່ຫຼາກຫຼາຍ. ດ້ານອໍານວຍການຊີ້ ແຜນປີ 2020 ຈະສືບຕໍ່ຂະຫຍາຍສິນເຊື່ອໃຫ້ເພີ່ມຂຶ້ນ ປະມານ 17% – 20% ແລະ ລະດົມເງິນຝາກເພີ່ມຂຶ້ນ 10%.
ທ່ານ ຈິຣັດຊາຍຸດ ອຳຍົງ ຜູ້ອໍານວຍການໃຫຍ່ ທະນາຄານເອັສທີ ຈໍາກັດ ໃຫ້ສໍາພາດວ່າ: ສໍາລັບແຜນການດໍາເນີນທຸລະກິດຂອງທະນາຄານພວກເຮົາໃນປີ 2020 ກໍຖືວ່າເປັນແຜນສືບຕໍ່ມາຈາກ 2019 ໂດຍສະເພາະແມ່ນເນັ້ນຜະລິດຕະພັນທາງການເງິນ ເຊັ່ນ: ຟິນເທັກ, ການບໍລິການ ແລະ ອື່ນໆ, ແຕ່ສິ່ງທີ່ເຂົ້າມາເພີ່ມຕື່ມກໍຄື ທະນາຄານເອັສທີ ຈະເປັນທະນາຄານທີ່ເຊື່ອມກັບບັນດາທະນາຄານປະເທດອາຊຽນ ( AEC Bank ). ພ້ອມກັນນັ້ນ, ຍັງຈະມີບໍລິການທີ່ຫຼາກຫຼາຍເພີ່ມຂຶ້ນ ບໍ່ວ່າຈະເປັນບໍລິການສິນເຊື່ອສໍາລັບທຸລະກິດ, ສິນເຊື່ອບຸກຄົນ, ໂມບາຍແບັງຄິງ, ເພລເມັນເກຣດເວ ແລະ ອື່ນໆ ລວມທັງຂະຫຍາຍສາຂາຊຽງຂວາງ ແລະ ສາລະວັນ ເພື່ອເຮັດໃຫ້ທະນາຄານເຮົາກວ້າງຂວາງອີກຕື່ມ.
ນອກນັ້ນ, ທະນາຄານເອັສທີ ຍັງຈັດຫາບໍລິສັດທີ່ມີປະສົບການເລື່ອງຕ້ານການຟອກເງິນ ( Known you Customer ) ເຂົ້າມາຊ່ວຍ ເຊິ່ງລະບົບດັ່ງກ່າວນີ້ຈະເປັນຕົວຊ່ວຍໃຫ້ທະນາຄານເຮົາສາມາດຕອບສະໜອງຕາມມາດຕະຖານຂອງທະນາຄານສາກົນເຮັດໃຫ້ ທະນາຄານເອັສທີ ກາຍເປັນຄູ່ຮ່ວມທຸລະກິດກັບທະນາຄານຕ່າງປະເທດ ເນື່ອງຈາກລະບົບມັນຈະວິເຄາະ – ປະເມີນລູກຄ້າກ່ຽວກັບທີ່ໄປທີ່ມາຂອງແຫຼ່ງທຶນໄດ້ຫຼາຍຂຶ້ນ ເຊິ່ງຈະເປັນຕົວຊີ້ວັດເຮັດໃຫ້ເຮົາກ້າວໄປສູ່ AEC Bank ໃນປີນີ້.
ທ່ານກ່າວຕື່ມວ່າ: ປີ 2020 ນີ້ເປັນປີທີ່ພວກເຮົາຈະຂະຫຍາຍຕົວທາງດ້ານນະວັດຕະກໍາ, ມາດຕະຖານສາກົນ, ເພີ່ມຊ່ອງທາງໃນການຂາຍ, ມີຕົວແທນເພີ່ມຂຶ້ນ ແລະ ຂະຫຍາຍເຄືອຂ່າຍໃນການເຂົ້າເຖິງຫຼາຍຂຶ້ນ ລວມທັງຜະລິດຕະພັນໃໝ່ໆທີ່ຫຼາຍຂຶ້ນ. ຂະຫຍາຍສິນເຊື່ອໃຫ້ເພີ່ມຂຶ້ນ 17% – 20%, ສ່ວນລະດົມເງິນຝາກ ໃຫ້ເພີ່ມຂຶ້ນປະມານ 10% ເທົ່ານັ້ນ ເນື່ອງຈາກຕອນນີ້ເຮົາມີເງິນຝາກຫຼາຍແລ້ວ.
ທ່ານ ຈິຣັດຊາຍຸດ ຍັງອະທິບາຍກ່ຽວກັບເງິນກູ້ເພື່ອສົ່ງເສີມທຸລະກິດຂະໜາດນ້ອຍ ແລະ ກາງ ໃນປີ 2019 ຜ່ານມາ ວ່າ: ສໍາລັບວົງເງິນທີ່ເຮົາໄດ້ຮັບຈາກກອງທຶນເພື່ອສົ່ງເສີມ SME ຈໍານວນ 6 ຕື້ກີບ ປັດຈຸບັນແມ່ນໄດ້ປ່ອຍກູ້ໃຫ້ກັບທຸລະກິດແລ້ວ 1 ຕື້ກວ່າກີບ ແລະ ໄດ້ມີການຂໍໂກຕາສິນເຊື່ອສໍາລັບ SME ເພີ່ມຕື່ມອີກໃນປີນີ້ ເພື່ອໃຫ້ຜູ້ປະກອບການທົ່ວໄປທີ່ບໍ່ຍັງສາມາດເຂົ້າຫາແຫຼ່ງທຶນໃນເຂດຫ່າງໄກສອກຫຼີກໄດ້ເຂົ້າເຖິງງ່າຍ ເຊິ່ງໃນແຕ່ລະປີເຫັນວ່າທະນາຄານພວກເຮົາສາມາດເຂົ້າເຖິງລູກຄ້າໄດ້ປະມານ 5 ພັນຄົນ. ພ້ອມກັນນັ້ນ, ເຮົາຍັງເບິ່ງເຫັນໂອກາດທາງທຸລະກິດຕ່າງປະເທດທີ່ຈະມາລົງທຶນໃນລາວ ແລະ ພວກເຮົາເອງພ້ອມແລ້ວທີ່ຈະເປັນຕົວກາງໃຫ້ຄໍາປຶກສາທັງໃນ ຫຼື ຕ່າງປະເທດ ເພື່ອໃຫ້ເຂົາເຈົ້າສາມາດເຮັດທຸລະກິດໄດ້ຫຼາຍ.
