ປີຜ່ານມາ ແຂວງອັດຕະປື ມີນັກໂທດຜູ້ທີ່ມີເງື່ອນໄຂສະເໜີໃຫ້ອະໄພຍະໂທດ, ຫຼຸດຜ່ອນໂທດ ທັງໝົດ 54ຄົນ, ຍິງ 13ຄົນ, ສ່ວນນັກໂທດທີ່ມີເງື່ອນໄຂສະເໜີໃຫ້ອະໄພຍະໂທດ ປ່ອຍຕົວ ມີຈໍານວນ 4ຄົນ, ຍິງ 1ຄົນ.
ໃນວັນທີ 29 ມັງກອນ 2020, ແຂວງອັດຕະປື ໄດ້ຈັດພິທີປະກາດ ອະໄພຍະໂທດ ແລະ ປ່ອຍຕົວນັກໂທດ ປະຈໍາປີ 2019 ຂື້ນທີ່ຄ້າຍຄຸມຂັງ-ດັດສ້າງ ບ້ານສະເພົາທອງ ແຂວງອັດຕະປື, ເປັນກຽດເຂົ້າຮ່ວມຂອງທ່ານ ພອນສະໄໜ ມຽງລາວັນ ຮອງເຈົ້າແຂວງອັດຕະປື ປະທານຄະນະກຳມະການອະໄພໂທດຂັ້ນແຂວງ, ມີທ່ານ ສົມພົງ ສີຊານົນ ຫົວໜ້າອົງການໄອຍະການປະຊາຊົນ ແຂວງອັດຕະປື, ມີຫົວໜ້າຄ້າຍຄຸມຂັງ, ດັດສ້າງ ປກສ ແຂວງອັດຕະປື, ພ້ອມດ້ວຍບັນດາຄະນະກໍາມະການອະໄພຍະໂທດຂັ້ນແຂວງ ແລະ ພາກສ່ວນກ່ຽວຂ້ອງເຂົ້າຮ່ວມ.
ໃນພິທີ ທ່ານ ສົມພົງ ສີຊານົນ ຫົວໜ້າອົງການໄອຍະການປະຊາຊົນແຂວງ ໄດ້ຜ່ານດໍາລັດຂອງປະທານປະເທດ ວ່າດ້ວຍການອະໄພຍະໂທດແກ່ນັກໂທດທີ່ມີຄວາມກ້າວໜ້າ ໃນຂອບເຂດທົ່ວປະເທດ ເນື່ອງໃນໂອກາດວັນທີ 2 ທັນວາ ປີ 2019 ຄົບຮອບ 44 ປີ,ເຊິ່ງໃນນັ້ນ, ຢູ່ແຂວງອັດຕະປື ມີນັກໂທດຜູ້ທີ່ມີເງື່ອນໄຂສະເໜີໃຫ້ອະໄພຍະໂທດ, ຫລຸດຜ່ອນໂທດມີທັງໜົດ 54 ຄົນ,ຍິງ 13 ຄົນ ແລະ ນັກໂທດທີ່ມີເງື່ອນໄຂສະເໜີໃຫ້ອະໄພຍະໂທດ ປ່ອຍຕົວ ມີຈຳນວນ 4 ຄົນ,ຍິງ 1 ຄົນ.
ໂອກາດດັ່ງກ່າວໃນພິທີຍັງໄດ້ມອບໃບຢັ້ງຢືນໃຫ້ແກ່ນັກໂທດທີ່ມີຜົນງານຫ້າວຫັນໃນການປະຕິບັດກົດລະບຽບພາຍໃນຄ້າຍຄຸມຂັງ,ດັດສ້າງ,ໃຫ້ກຽດມອບໂດຍທ່ານ ພອນສະໄໜ ມຽງລາວັນ ຮອງເລຂາພັກແຂວງ ຮອງເຈົ້າແຂວງໆອັດຕະປື ປະທານກຳມະການອະໄພຍະໂທດລະດັບແຂວງອັດຕະປື.
ພ້ອມດຽວກັນທ່ານຍັງໄດ້ກ່າວຍ້ອງຍໍຊົມເຊີຍ ຕໍ່ບັນດານັກໂທດທີ່ໄດ້ປະກອບສ່ວນສ້າງຜົນງານ,ສ້າງຂະບວນການປະຕິບັດລະບຽບຂອງຄ້າຍຄຸມຂັງໄດ້ຢ່າງເຂັມງວດ ໂດຍເພາະແມ່ນຜູ້ທີ່ໄດ້ຮັບການອະໄພຍະໂທດ, ຫລຸດຜ່ອນໂທດ ແລະ ຖືກປ່ອຍຕົວໃນຄັ້ງນີ້,ພ້ອມທັງໄດ້ເໜັ້ນໜັກໃຫ້ຄະນະກຳມະການອະໄພຍະໂທດ ລະດັບແຂວງ ຈົ່ງສືບຕໍ່ໂຄສະນາເຜີຍແຜ່, ເຊື່ອມຊຶມ ລັດຖະດໍາລັດຂອງປະທານປະເທດ ວ່າດ້ວຍການອະໄພຍະໂທດ, ຄຳແນະນຳ, ແຈ້ງການຕ່າງໆໃຫ້ແກ່ພະນັກງານ, ທະຫານ, ຕໍາຫລວດ ພ້ອມຍາດຕິພີ່ນ້ອງ,ນັກໂທດ ແລະ ສັງຄົມທົ່ວໄປ ໄດ້ຮັບຮູ້ເຂົ້າໃຈຢ່າງເລິກເຊິ່ງ ຕໍ່ແນວທາງນະໂຍບາຍດ້ານມະນຸດສະທຳຂອງພັກ-ລັດ ທີ່ມີຕໍ່ນັກໂທດຜູ້ທີ່ມີການປ່ຽນແປງທັດສະນະແນວຄິດ, ການກະທຳ ແລະ ຕື່ນຕົວເຄົາລົບລະບຽບກົດໝາຍ ສປປ ລາວ
ຂໍ້ມູນຈາກ: Attapeu Media
ຂ່າວ: ຂ. ອັດຕະປື ວັດທະນາ ຫຼວງອາໄພ.
