ພາດໄປແລ້ວປະເພນີບຸນກະບອງໃຫຍ່ "ຊົນເຜົ່າບຣູ" - Laoedaily

ພາດໄປແລ້ວປະເພນີບຸນກະບອງໃຫຍ່ “ຊົນເຜົ່າບຣູ”

ເຜີໄປແບບດຽວໝົດປີ 2019 ປີໃໝ່ເຂົ້າມາງານບຸນກະບອງໃຫຍ່ຂອງເຜົ່າບຣູກໍ່ຜ່ານພົ້ນໄປ ຍັງເຮັດຫຍັງບໍ່ໄດ້ ແລະບໍ່ທັນໄປເອົາບັນຍາກາດສົດໆມາຝາກທຸກຄົນ ຂໍເກັບພາບມາໃຫ້ເບິ່ງ ເພື່ອໃຫ້ປະຊາຊົນລາວເຮົາຮູ້ວ່ານີ້ຄືປະເພນີຊົນເຜົ່າບຣູຂອງວົງຄະນະຍາດແຫ່ງຊາດລາວ.

ຊົນເຜົາບຣູ ເປັນຊົນເຜົ່າທີ 50 ຂອງລາວ ຖືກຮັບຮອງເຂົ້າເປັນຊົນເຜົ່າໃໝ່ ວັນທີ 5 ທັນວາ 2018 ສຸດລໍາດັບທີ 50 ຂອງວົງຄະນາຍາດແຫ່ງຊາດລາວ ທີ່ມີວັດທະນາທໍາ, ຮີດຄອງປະເພດີທີ່ດີງາມ ລວມໄປເຖິງທີ່ຢູ່ອາໄສ ແລະ ພາສາປາກເວົ້າທີ່ໜ້າສົນໃຈ.

ຊົນເຜົ່າບຣູ” ເປັນກຸ່ມເຜົ່າຊົນໜຶ່ງທີ່ມີຖິ່ນກຳເນີດຢູ່ໃນແຂວງສະຫວັນນະເຂດ, ແຂວງສາລະວັນ ແລະ ແຂວງອັດຕະປືຂອງລາວເປັນຊົນເຜົ່າດັ່ງເດີມໃນເຂດລ້ອງແມ່ນໍ້າຂອງ ເຊິ່ງອາດສືບເຊື້ອສາຍມາຈາກຂອມບູຮານທີ່ເຄີຍຢູ່ໃນດິນແດນຂອງອານາຈັກເຈນລະ ຕໍ່ມາເປັນອານາຈັກຂອມ ແລະ ອານາຈັກສີໂຄດຕະບູນ. ຂອມເຄີຍມີອິດທິພົນຂຶ້ນມາຮອດເຂດນີ້ ແລ້ວເສື່ອມອຳນາດລົງ.

ພາສາບຣູຈຶ່ງເປັນພາສາໃນຕະກຸນດຽວກັນກັບຂອມ ແລະ ມອນຂະແມ ນອກນັ້ນ ບຣູຍັງແບ່ງອອກເປັນຫຼາຍເຜົ່າຍ່ອຍເຊັ່ນ: ບຣູຍະເຫີນ, ບຣູບໍລະເວນ, ບຣູສຸ, ບຣູຕະໂອດ, ບຣູສອກ, ບຣູສະປວນ ແລະ ອື່ນໆອີກ.

ຊົນເຜົ່າບຣູດັ່ງເດີມມັກມີຜິວເຂັ້ມ, ຜົມຫຍອງ ທັງຍິງ ແລະ ຊາຍ. ຜູ້ຊາຍແຕ່ງກາຍດ້ວຍການນຸ່ງຜ້າຕ່ຽວ, ມີຜົມມ້າຍາວພຽງບ່າ ແລະ ນິຍົມໃຊ້ຜ້າແດງຜູກຄ້ອງຄໍ ຫຼື ໂພກໃສ່ຫົວເປັນເອກະລັກ.

ເຊິ່ງຊົນເຜົ່າບຣູມີວັດທະນະທໍາ, ວັນບຸນທີ່ໜ້າສົນໃຈຫຼາຍວັນ ໂດຍສະເພາະພໍເຖິງເດືອນສາມລາວຂຶ້ນສາມຄໍ່າໃນທຸກໆປີ ເຜົ່າບຣູກໍຈະມີການຈັດງານສະຫຼອງກະບອງໃຫຍ່ ເຊິ່ງເປັນກິດຈະກຳທີ່ສຳຄັນຂອງເຜົ່າ ທີ່ໄດ້ປະຕິບັດ ແລະ ສືບທອດກັນມາແຕ່ດົນນານແລ້ວ.

ສະນັ້ນ, ກ່ອນຈະຮອດມື້ສະຫຼອງ ເຖົ້າແກ່ ຫຼື ຜູ້ອາວຸໂສພ້ອມດ້ວຍລູກຫຼານ ຈະພາກັນສ້າງກິດຈະກຳຕ່າງໆ ຢູ່ສວນວັດທະນະທຳເຜົ່າບຣູ ໃຫ້ສວຍງາມ ເພື່ອກຽມໃສ່ງານບຸນກະບອງໃຫຍ່ເຊິ່ງເປັນປະເພນີຂອງຊົນເຜົ່າຈັດຂຶ້ນທຸກໆປີ.

ງານປະເພນີກະບອງໃຫຍ່ ຫຼື ງານມະຫະກໍາເທດສະການສືບສານຕໍານານກະບອງໃຫຍ່ ຂອງຊົນເຜົ່າບຣູ ຈັດຂຶ້ນທຸກໆປີ ໃນວັນຂຶ້ນ 3 ຄໍ່າ ເດືອນ 3, ປີນີ້ ແມ່ນກົງກັບວັນຈັນ ວັນທີ 27 ມັງກອນ 2020 ຜ່ານມາ, ທີ່ບ້ານໂພນງາມ ເມືອງອາດສະພອນ ແຂວງສວັນນະເຂດ, ໄດ້ຮັບກຽດເຂົ້າຮ່ວມງານບຸນ ໂດຍທ່ານເຈົ້າແຂວງ ສັນຕິພາບ ພົມວິຫານ ແລະ ການນຳຂອງແຂວງອີກຫລາຍທ່ານ

ມີການຈູດກະບອງໃຫຍ່, ຈາກນັ້ນ ປະມານ 7 ໂມງເຊົ້າ ກໍ່ ມີການຕັກບາດຖວາຍແດ່ພຣະສົງສຳມະເນນ. ຈາກນັ້ນ, ພາຍໃນງານທ່ານຈະໄດ້ຊົມຂະບວນແຫ່ກະບອງໃຫຍ່, ໄດ້ຮັບຊົມການສະແດງສິລະປະວັນນະຄະດີເປັນຕົ້ນແມ່ນ: ການຟ້ອນ, ຂັບລຳ, ຊົມການສະແດງ ລົງຂວ່າງເຂັນຝ້າຍ, ຕໍ່າຫູກ ແລະ ຕຳເຂົ້າ ແລະ ອື່ນໆ.

ກ່ອນຮອດງານ ເຖົ້າແກ່ ແລະ ລູກຫຼານ ກໍ່ພາກັນກະກຽມເຮັດກະບອງໃຫຍ່ສຳເລັດເປັນທີ່ຮຽບຮ້ອຍແລ້ວ ຍັງເຫຼືອແຕ່ເຫຼັ້ມນ້ອຍທີ່ຈະຫາມແຫ່ຂະບວນ ແລະ ເຮັດກິດຈະກຳຕ່າງໆແຕ່ຕ້ອງສຳເລັດກ່ອນເປີດງານ.

ຕຳນານກະບອງໃຫຍ່ແມ່ນເອກະລັກໜຶ່ງ ທີ່ບົ່ງບອກເຖິງຕົ້ນກຳເນີດ  ແລະ ຄວາມເປັນມາຂອງຊົນເຜົ່າບຣູ ເຊິ່ງເປັນໜຶ່ງກິດຈະກຳປະຈຳເຜົ່າທີ່ຈະຕ້ອງໄດ້ຈັດຂຶ້ນໃນທຸກໆປີ. ທັງນີ້, ກໍ່ເພື່ອເປັນການສະແດງໃຫ້ເຫັນວີຖີຊີວິດຂອງຊົນເຜົ່າ, ການອະນຸລັກຮັກສາ ແລະ ສືບສານວັດທະນະທຳຮີດຄອງປະເພນີອັນດີງາມຂອງເຜົ່າໄວ້ ອີກທັງເປັນການເຕົ້າໂຮມຄວາມສາມັກຄີປະຊາຊົນພາຍໃນບ້ານ ແລະ ບ້ານອ້ອມຂ້າງໃຫ້ແໜ້ນແຟ້ນຍິ່ງຂຶ້ນ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ