ການລ້ຽງປາດຸກໃຫ້ມີຜີວສີເຫຼືອງ ແລະ ບໍ່ມີກິ່ນຄາວ ມາຝາກທ່ານຜູ້ອ່ານ ທີ່ມີຄວາມສົນໃຈໃນເລື່ອງກະສິກຳ ການລ້ຽງປາເພື່ອເປັນອາຫານ ແລະ ກ້າວໄປສູ່ການສ້າງອາຊີບ, ສ້າງລາຍຮັບໃຫ້ແກ່ຄອບຄົວ ເຊິ່ງມີການລ້ຽງປາດຸກໃຫ້ມີສີເຫຼືອງ ແລະ ເພີ່ມຂະໜາດໂຕໃຫ້ໃຫຍ່, ຊີ້ນແໜ້ນ, ເວລາກິນຈະບໍ່ມີກິ່ນຄາວ ໂດຍມີວິທີງ່າຍໆດັ່ງຕໍ່ໄປນີ້:
1 ເຕັກນິກການເພີ່ມສີ ຫຼື ຂະໜາດຂອງປາດຸກ.
ເມື່ອລ້ຽງປາດຸກຮອດ 60 ມື້ຂຶ້ນໄປ ໃຫ້ນຳນ້ຳມັນໝູຈຳນວນ 20 ກິໂລ ມາຕົ້ມຈົນສຸກ ຈາກນັ້ນກໍ່ເທນ້ຳຕົ້ມຖີ້ມຈົ່ງໄວ້ແຕ່ມັນໝູຢູ່ໃນໝໍ້ ແລ້ວປະໄວ້ໃຫ້ແຫ້ງ ( ມັນໝູ 20 ກິໂລກຮາມ ຕໍ່ປາດຸກຈຳນວນ 200 ໂຕ) ຈາກນັ້ນກໍ່ນຳມັນໝູທີ່ໄດ້ໄປໃຫ້ປາດຸກກິນມື້ລະ 1 ເທື່ອ, ວິທີນີ້ຈະຊ່ວຍເພີ່ມຂະໜາດຂອງປາດຸກ ແລະ ສີຂອງປາດຸກ.
2 ການເຮັດໃຫ້ປາດຸກລ້ຽງໃນບໍ່ດິນໃຫ້ມີສີເຫຼືອງງາມຄືປາດຸກນາ.
ກ່ອນຈະຈັບປາຂາຍປະມານ 1 ເດືອນ ໃຫ້ນຳກ້ວຍນ້ຳສຸກມາບົດປະສົມກັບຮຳ ໃນອັດຕາສ່ວນຮຳ 6 ກິໂລກຮາມ ຕໍ່ ກ້ວຍສຸກ 1 ຫວີ ປະສົມໃຫ້ເຂົ້າກັນ ຈາກນັ້ນກໍ່ນຳໄປດາກແດດໃຫ້ແຫ້ງ ແລ້ວນຳໄປຫວ່ານໃຫ້ປາດຸກກິນທຸກມື້, ມື້ລະ 2 ເທື່ອ ເຊົ້າ-ແລງ ຕໍ່ເນື່ອງກັນເປັນເວລາຢ່າງໜ້ອຍ 1 ເດືອນກ່ອນນຳໄປຂາຍ, ພຽງເທົ່ານີ້ກໍ່ຈະເຮັດໃຫ້ປາດຸກລ້ຽງມີສີເຫຼືອງ ແລະ ມີກິ່ນຄາວໜ້ອຍລົງອີກດ້ວຍ.
3 ການລ້ຽງເພີ່ມຄວາມຫວານໃຫ້ຊີ້ນປາ.
ນຳເອົາກ້ວຍສຸກເຊັ່ນ: ກ້ວຍສຸກ, ກ້ວຍນ້ຳ, ກວ້ຍໄຂ່ ແລະ ກ້ວຍຫອມ ໃຫ້ປາກິນ ຖ້າປາຍັງນ້ອຍໃຫ້ປາກິນອາຫານສະລັບກັບກ້ວຍສຸກ ອາດຈະໃຫ້ປາກິນກ້ວຍເປັນອາຫານຕອນແລງສະລັບກັນ, ຄວນໃຫ້ອາຫານປາໃນຕອນເຊົ້າ ຫຼື ຈະໃຫ້ກ້ວຍເປັນອາຫານປາຢ່າງດຽວກໍ່ໄດ້ ໂດຍໃຫ້ປາກິນພໍອີ່ມ, ວິທີນີ້ສາມາດໃຊ້ໄດ້ກັບປາທຸກຊະນິດ, ຈະຊ່ວຍເຮັດໃຫ້ປາໃຫຍ່ໄວ, ມີຊີ້ນແໜ້ນ, ຊີ້ນຫວານ ໄດ້ຂະໜາດຕາມຄວາມຕ້ອງການຂອງຕະຫຼາດ.
4 ເຕັກນິກການລ້ຽງປາດຸກໃຫ້ໄດ້ໂຕໃຫຍ່ຍາວໄດ້ນ້ຳໜັກ.
ວິທີການລ້ຽງປາດຸກໃຫ້ໂຕໃຫຍ່, ໂຕຍາວ ແລະ ມີນ້ຳໜັກ ຫຼັງຈາກປ່ອຍລູກປາລົງບໍ່ແລ້ວ ໃຫ້ອົດອາຫານ 4 ມື້ ເພື່ອເປັນການປັບສະພາບຂອງລູກປາໃຫ້ເຂົ້າກັບນ້ຳໃນບໍ່, ຈາກນັ້ນວັນທີ່ 5 ກໍ່ເລີ່ມໃຫ້ອາຫານ ໂດຍໃຫ້ອາຫານລູກປາດຸກໃນປະລິມານໜ້ອຍ ແຕ່ໃຫ້ຫຼາຍຄັ້ງຕໍ່ມື້ ລູກປາຈະຄ່ອຍໆໃຫຍ່, ຫຼັງຈາກນັ້ນເມື່ອປາໄດ້ອາຍຸ 2 ເດືອນໃຫ້ຢຸດໃຫ້ອາຫານ 7 ມື້, ວິທີນີ້ຈະເຮັດໃຫ້ປາດຸກຈ່ອຍ ແລະ ໂຕຢືດອອກ ແລ້ວຈຶ່ງຄ່ອຍໃຫ້ອາຫານຕໍ່, ຜົນທີ່ໄດ້ຮັບຄືປາດຸກຈະໂຕໃຫຍ່ ແລະ ຍາວ ເຊິ່ງເມື່ອເຫັນຂະໜາດທີ່ເໝາະສົມເຊັ່ນ: 2 ຫຼື 3 ໂຕ ຕໍ່ກິໂລກຮາມກໍ່ສາມາດຈຳໜ່າຍໄດ້.
5 ການນຳເຟືອງເຂົ້າໃສ່ໃນອ່າງປາ ເພື່ອເພີ່ມສີປາ ແລະ ກຳຈັດກິ່ນ.
ເມື່ອເອົາເຟືອງໃສ່ລົງໄປໃນອ່າງປາດຸກ, ປາກໍ່ຈະເຂົ້າໄປໃນເຟືອງເຮັດໃຫ້ໂຕປາສຽດສີກັບເຟືອງເຂົ້າ ແລະ ຈະເຮັດໃຫ້ເມືອກທີ່ຕິດກັບໂຕປາໝົດໄປ, ຍັງສາມາດເຮັດໃຫ້ປາທີ່ມີສີດຳກາຍເປັນສີເຫຼືອງນຳອີກ. ນອກຈາກນີ້ການໃສ່ຟືອງເຂົ້າລົງໄປ ກ່ອນຈັບປາດຸກນັ້ນຍັງຊ່ວຍຜ່ອນຫຼຸດກິ່ນສາບຂອງປາດຸກໄດ້ອີກດ້ວຍ.
6 ເຕັກນິກການກຽມປາດຸກຂາຍໃຫ້ໄດ້ລາຄາ ແລະ ກຳຈັດກີ່ນຄາວປາ.
ງົດໃຫ້ອາຫານ 3 ມື້ ກ່ອນເຮັດການຈັບປາ, ຈາກນັ້ນກໍ່ ປ່ອຍນ້ຳໃນບໍ່ອອກໃຫ້ເຫຼືອປະມານ 80 – 90% ກ່ອນຈັບປາຂາຍ 1 ມື້ ໃຫ້ໃຊ້ເກືອຫວ່ານລົງໄປໃນບໍ່ປາໃນຂະໜາດບໍ່ປາກ້ວາງ 1 ໄຮ່ ໃຊ້ເກືອ 30 ກິໂລກຮາມ ແລ້ວກໍ່ຕັກປາຂຶ້ນນມາຈຳໜ່າຍໃນທ້ອງຕະຫຼາດຕາມທີ່ຕ້ອງການໄດ້ເລີຍ.
ຂໍ້ມູນຈາກ: ຈາກສູນລວມຄວາມຮູ້ການສະເສດ