ໂຮງຮຽນນາໆຊາດປັນຍາທິບ ໄດ້ມອບອຸປະກອນການແພດຄືກ້ອງສ່ອງກວດຕາ ຈໍານວນ 1 ຊຸດ ໃຫ້ແກ່ໂຮງໝໍເມືອງຫາດຊາຍຟອງ ນະຄອນຫຼວງວຽງຈັນ ເພື່ອໃຫ້ປະຊາຊົນໄດ້ເຂົ້າເຖິງການບໍລິການ ໂດຍສະເພາະແມ່ນການກວດ ແລະ ປິ່ນປົວຕາ.
ພິທີມອບ – ຮັບ ເຄື່ອງດັ່ງກ່າວໄດ້ມີຂຶ້ນໃນວັນທີ 20 ມັງກອນນີ້ ໂດຍການເຂົ້າຮ່ວມຂອງ ທ່ານ ດຣ. ຄໍາພົ້ວ ສຸທິສົມບັດ ຫົວໜ້າກົມປິ່ນປົວ ກະຊວງສາທາລະນະສຸກ, ທ່ານ ຄໍາແກ່ງ ດວງພະຈັນ ຮອງເຈົ້າເມືອງຫາດຊາຍຟອງ, ທ່ານ ນາງ ປາດຖະໜາ ປັນຍາທິບ ຜູ້ອໍານວຍການໂຮງຮຽນນາໆຊາດປັນຍາທິບ, ທ່ານ ດຣ. ໄຊຍັງວົງ ດວງມະນີ ຮອງຄະນະພະແນກສາທາລະນະສຸກນະຄອນຫຼວງ ພ້ອມດ້ວຍວິຊາການ ແລະ ຊ່ຽວຊານດ້ານການແພດເຂົ້າຮ່ວມ.
ທ່ານ ນາງ ປາດຖະໜາ ປັນຍາທິບ ໄດ້ກ່າວວ່າ: ອີງໃສ່ຕົວເລກການກວດກາຄົນເຈັບແກ່ນຕາຂຸ້ນ ແລະ ຜ່າຕັດແກ່ນຕາຂຸ້ນ ໃນປີ 2018 ແລະ 2019 ຜ່ານມາ ເຫັນວ່າມີຄົນເຈັບເປັນຈໍານວນຫຼາຍ. ສະນັ້ນ, ການທີ່ໄດ້ມອບອຸປະກອນການແພດຄືກ້ອງສ່ອງກວດຕາ ຈໍານວນ 1 ຊຸດ ລວມມູນຄ່າ 25 ລ້ານກີບ ໃຫ້ແກ່ໂຮງໝໍເມືອງຫາດຊາຍຟອງ ຖືເປັນຄວາມພາກພູມໃຈຂອງພວກເຮົາທີ່ໄດ້ຊ່ວຍເຫຼືອສັງຄົມ ແລະ ຊ່ວຍເຫຼືອວຽກງານການແພດໃຫ້ຫຼາຍຂຶ້ນ. ນອກຈາກນີ້, ຍັງເປັນການເພີ່ມປະສິດທິພາບໃຫ້ແກ່ແພດໝໍໃນການປິ່ນປົວໃຫ້ດີຂຶ້ນ.
ທ່ານ ດຣ. ຄໍາພົ້ວ ສຸທິສົມບັດ ໄດ້ກ່າວວ່າ: ອີງໃສ່ການສະເໜີຂອງໜ່ວຍງານກວດ ແລະ ປິ່ນປົວຂອງໂຮງໝໍເມືອງຫາດຊາຍຟອງ ສົມທົບກັບພະແນກສາທາລະນະສຸກນະຄອນຫຼວງວຽງຈັນ ແລະ ສູນຕາທົ່ງປົ່ງ ໄດ້ເຫັນວ່າໃນແຕ່ລະປີມີປະຊາຊົນມາໃຊ້ບໍລິການປິ່ນປົວຕາຢູ່ໂຮງໝໍເມືອງຫາດຊາຍຟອງເປັນຈຳນວນຫຼວງຫຼາຍ ແຕ່ຍັງຂາດອຸປະກອນການແພດ ໂດຍສະເພາະແມ່ນກ້ອງກວດສ່ອງຕາ.
ເປັນຄວາມໂຊກດີທີ່ທາງໂຮງຮຽນນາໆຊາດປັນຍາທິບ ໄດ້ອຸປະຖໍາຊ່ວຍເຫຼືອ ໂດຍໄດ້ເຫັນເຖິງຄວາມສໍາຄັນໃນວຽກງານກວດ ແລະ ຮັກສາສຸຂະພາບຕາຂອງພໍ່ແມ່ປະຊາຊົນ ຫວັງຢ່າງຍິ່ງວ່າຈະໄດ້ຮັບການຊ່ວຍເຫຼືອອີກ ແລະ ອຸປະກອນການແພດດັ່ງກ່າວນີ້ພວກເຮົາຈະນໍາໃຊ້ເພື່ອໃຫ້ເກີດຜົນປະໂຫຍດອັນສູງສຸດ.
