ງານພົບປະທຸລະກິດນະຄອນຫຼວງວຽງຈັນ ຈະຈັດຂຶ້ນໃນເດືອນກຸມພາ - Laoedaily

ງານພົບປະທຸລະກິດນະຄອນຫຼວງວຽງຈັນ ຈະຈັດຂຶ້ນໃນເດືອນກຸມພາ

ປົກກະຕິແລ້ວງານພົບປະທຸລະກິດນະຄອນຫຼວງວຽງຈັນ ຫຼື Les Rendez-vous de Vientiane ຈະຈັດຂຶ້ນໃນລະຫວ່າງວັນທີ 26 – 28 ພະຈິກ 2019 ຜ່ານມາ ທີ່ໂຮງແຮມແລນມາກ ນະຄອນຫຼວງວຽງຈັນ, ແຕ່ເນື່ອງຈາກໄລຍະທ້າຍປີ 2019 ພາກລັດ ແລະ ພາກເອກະຊົນໄດ້ມີຫຼາຍກອງປະຊຸມ ຫຼື ງານວາງສະແດງສິນຄ້າ ຈຶ່ງເຮັດໃຫ້ໄດ້ມີການເລື່ອນໄປເປັນເດືອນກຸມພາ 2020.

ກ່ອນໜ້ານີ້, ທ່ານ ສັງຄົມ ຈັນສຸກ ປະທານສະພາການຄ້າ ແລະ ອຸດສາຫະກຳ ນະຄອນຫຼວງວຽງຈັນ ( ສຄອ.ນວ ) ໄດ້ໃຫ້ຮູ້ວ່າ: ງານພົບປະທຸລະກິດນະຄອນຫຼວງວຽງຈັນປີນີ້ ຈະເປັນການເຈາະຈົງສະເພາະເລື່ອງທຸລະກິດ ເຊິ່ງຖືເປັນປະຕູສູ່ອາຊຽນຂອງບັນດາປະເທດທີ່ໃຊ້ພາສາຝຣັ່ງ ໂດຍຜູ້ເຂົ້າຮ່ວມງານຈະໄດ້ຮັບຂໍ້ມູນດີໆລວມທັງນະໂຍບາຍຕ່າງໆຈາກພາກລັດ ທີ່ຈະນໍາມາເຜີຍແຜ່ໃຫ້ນັກທຸລະກິດຮູ້ ແລະ ນັກທຸລະກິດເອງ ກໍຈະໄດ້ມີການພົບປະແລກປ່ຽນຂໍ້ມູນ – ຂ່າວສານ ເພື່ອຊອກຫາວິທີການຂະຫຍາຍທຸລະກິດ ຫຼື ຊ່ອງທາງການຂະຫຍາຍການຕະຫຼາດ.

ຈຸດປະສົງຂອງງານດັ່ງກ່າວກໍເພື່ອເປັນການສົ່ງເສີມການຄ້າ – ການລົງທຶນ ຄາດວ່າຈະມີຜູ້ປະກອບການກໍຄືນັກທຸລະກິດທີ່ເຂົ້າຮ່ວມງານເປັນຈໍານວນຫຼວງຫຼາຍ ເພາະເປັນເວທີພົບປະ ແລະ ເປີດໂອກາດໃຫ້ຜູ້ປະກອບການໄດ້ປຶກສາຫາລືກັບ 10 ທະນາຄານ ທີ່ໄດ້ຮັບການຄັດເລືອກຈາກ ທະນາຄານແຫ່ງ ສປປ ລາວ ໃນການປ່ອຍເງິນກູ້ບ້ວງເງິນ 300 ລ້ານໂດລາ ໃຫ້ກັບບັນດາຫົວໜ່ວຍທຸລະກິດໃນລາວ.

ຂະນະທີ່, ທ່ານ ນາງ ອໍລະໄທ ສັນຕິຄົງຄາ ປະທານ ບໍລິສັດ ກຣິດຕິພົງ ກຣຸບ ໜຶ່ງໃນຄະນະບໍລິຫານງານຂອງ ສຄອ.ນວ ກ່າວຕື່ມວ່າ: ງານພົບປະທຸລະກິດນະຄອນຫຼວງວຽງຈັນໃນປີນີ້ ຈະເປັນທັງເວທີການແລກປ່ຽນ ແລະ ສ້າງໂອກາດການຈັບມືຮ່ວມທຸລະກິດກັນ ເວົ້າງ່າຍໆກໍຄືເປັນໂອກາດດີທີ່ພາກລັດຈະໄດ້ເຜີຍແຜ່ນະໂຍບາຍຕ່າງໆໃຫ້ນັກທຸລະກິດພາຍໃນ – ຕ່າງປະເທດຮັບຮູ້ ແລະ ພາກທຸລະກິດເອງກໍຈະພົບໂອກາດໃນການລົງທຶນ.

ສ່ວນ ທ່ານ ພູວົງ ພະມີສິດ ເຈົ້າຂອງແຫຼ່ງທ່ອງທ່ຽວສວນພຶກສາ ໜຶ່ງໃນຄະນະບໍລິຫານງານຂອງ ສຄອ.ນວ ໃຫ້ທັດສະນະວ່າ: ງານພົບປະທຸລະກິດນະຄອນຫຼວງວຽງຈັນ ເປັນງານທີ່ນັກທຸລະກິດລາວຄວນເຂົ້າຮ່ວມ ເພາະນອກຈາກຈະໄດ້ພົບປະ ແລະ ແລກປ່ຽນ ຄວາມຄິດເຫັນລະຫວ່າງນັກທຸລະກິດດ້ວຍກັນແລ້ວ ນັກທຸລະກິດຍັງສາມາດສະເໜີບັນຫາກ່ຽວກັບການເຮັດທຸລະກິດໃຫ້ລັດຖະບານຮັບຮູ້ເພື່ອຫາວິທີແກ້ໄຂ ເຊິ່ງລັດຖະບານກໍຈະໄດ້ອະທິບາຍ ແລະ ແນະນຳໃຫ້ພາກທຸລະກິດເພື່ອເຮັດແນວໃດໃຫ້ການດໍາເນີນກິດຈະການໃຫ້ສອດຄ່ອງກັບແນວທາງທີ່ພັກ – ລັດວາງອອກ.

ງານພົບປະທຸລະກິດນະຄອນຫຼວງວຽງຈັນ ຫຼື Les Rendez-vous de Vientiane ຄັ້ງທີ 1 ຈັດຂຶ້ນໃນລະຫວ່າງວັນທີ 25 – 30 ພະຈິກ 2013 ແລະ ຄັ້ງທີ 2 ຈັດຂຶ້ນໃນລະຫວ່າງວັນທີ 23 – 27 ມັງກອນ 2017 ແລະ ຄັ້ງນີ້ຖືວ່າເປັນຄັ້ງທີ 3 ທີ່ຈະໄດ້ຈັດຂຶ້ນໃນເດືອນກຸມພາ 2020 ທີ່ຈະມາເຖິງນີ້.

[ ໂດຍ: ສົມສະຫວິນ ]

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ