ຈະສ້າງຄອນໂດທີ່ທັນສະໄໝໃນນະຄອນຫຼວງວຽງຈັນ - Laoedaily

ຈະສ້າງຄອນໂດທີ່ທັນສະໄໝໃນນະຄອນຫຼວງວຽງຈັນ

ບໍລິສັດ ການຢານ ກຣຸບ ລົງນາມຮ່ວມກັບ ບໍລິສັດ ເວວ ແອນ ເອໂບ ເພື່ອຮ່ວມກໍ່ສ້າງ ແລະ ພັດທະນາໂຄງການໂມເດີນ ລິບວິ້ງ @ ການຢານ ( Modern Living kanyan ) ໂຄງການດັ່ງກ່າວຈະເລີ່ມລົງມືກໍ່ສ້າງໃນເດືອນເມສາ 2020 ໃນມູນຄ່າ 6 ລ້ານໂດລາ.

ພິທີລົງນາມດັ່ງກ່າວໄດ້ມີຂຶ້ນໃນວັນທີ 20 ມັງກອນ 2020 ທີ່ໂຮງແຮມຄຣາວພລາຊາ ນະຄອນຫຼວງວຽງຈັນ ເຊິ່ງລົງນາມໂດຍ ທ່ານ ແອຣອນ ອື ຜູ້ອຳນວຍການ ບໍລິສັດ ການຢານ ກຣຸບ ກັບ ທ່ານ ເຣມ້ອນ ວ່ອງ ກໍາມະການຜູ້ອໍານວຍການຂອງ ບໍລິສັດ ເວວ ແອນ ເອໂບ, ມີພາກສ່ວນທີ່ກ່ຽວຂ້ອງ ແລະ ບັນດາທີມງານຈາກສອງພາກສ່ວນເຂົ້າຮ່ວມ.

ທ່ານ ແອຣອນ ອື ກ່າວວ່າ: ໂຄງການໂມເດີນ ລິບວິ້ງ @ ການຢານ ( Modern Living kanyan ) ຕັ້ງຢູ່ບ້ານໂພນສະຫວ່າງ ເມືອງຫາດຊາຍຟອງ ຈະຊ່ວຍໃຫ້ຄົນລາວໄວເຮັດວຽກສາມາດຊື້ທີ່ພັກອາໄສໃນຕົວເມືອງວຽງຈັນໄດ້ ໂດຍທີ່ພັກອາໄສແບບປະສົມປະສານ ໂມເດີນ ລິບວິ້ງ ຄອມເພັກ ຂອງ ການຢານ ຈະສະໜອງທີ່ພັກທີ່ສະດວກສະບາຍ ແລະ ຍືນຍົງໃນຕົວເມືອງວຽງຈັນ ໄດ້ເຖິງ 432 ຫ້ອງ, ແຕ່ລະຫ້ອງມີພື້ນທີ່ 24 ຕາແມັດ, ພຽບພ້ອມດ້ວຍສິ່ງອໍານວຍຄວາມສະດວກຕ່າງໆຂອງທີ່ພັກແບບທັນສະໄໝ ເຊິ່ງໃນນັ້ນກໍລວມເຖິງລະບົບນ້ຳໃຊ້, ແອເຢັນ ແລະ ເຄື່ອງເຟີນີເຈີຄົບຊຸດ ໂດຍໂຄງການນີ້ມີເປົ້າໝາຍເພື່ອຫຼຸດຜ່ອນການຂາດແຄນດ້ານທີ່ພັກອາໄສ.

ເປັນພຽງພາບປະກອບຂ່າວ

ທ່ານ ແອຣອນ ອື ກ່າວຕື່ມວ່າ: ຕາມແຜນກໍ່ສ້າງໂຄງການດັ່ງກ່າວແມ່ນເລີ່ມໃນເດືອນເມສາ 2020 ນີ້ ຄາດວ່າຈະໃຊ້ເວລາກໍ່ສ້າງ 12 ເດືອນ ເຊິ່ງມີມູນຄ່າກໍ່ສ້າງປະມານ 6 ລ້ານໂດລາສະຫະລັດ ໂດຍຈະມີລາຄາ 20 ພັນໂດລາຕໍ່ຫ້ອງ, ສາມາດຈ່າຍຜ່ອນໄດ້ເປັນເວລາ 10 ປີ. ນອກນັ້ນ, ບໍລິສັດ ການຢານ ກຣຸບ ຍັງມີແຜນທີ່ຈະຂະຫຍາຍໂຄງການສ້າງຄອນໂດມີນຽມລາຄາຖືກອີກກວ່າ 100.000 ຫ້ອງ ອ້ອມຮອບຕົວເມືອງນະຄອນຫຼວງວຽງຈັນ ໃນທົດສະວັດນີ້.

ເປັນພຽງພາບປະກອບຂ່າວ

ປັດໄຈຫຼັກທີ່ເຮັດໃຫ້ໂຄງການນີ້ມີຄວາມແຕກຕ່າງຈາກໂຄງການອື່ນ ນັ້ນກໍຄືວິໄສທັດຂອງ ບໍລິສັດ ການຢານ ກຣຸບ ທີ່ຕ້ອງການຢາກປັບເງື່ອນໄຂການດໍາລົງຊີວິດຂອງຄົນລາວດ້ານທີ່ພັກອາໄສທີ່ທັນສະໄໝຂຶ້ນ, ບໍລິສັດ ການຢານ ກຣຸບ ມີຄວາມຕັ້ງໃຈຢາກບັນລຸເປົ້າໝາຍ ໂດຍການສ້າງສິ່ງອໍານວຍຄວາມສະດວກດ້ານການສຶກສາ, ພາສາອັງກິດ ແລະ ພາສາຈີນ ດ້ວຍມາດຕະຖານລະດັບສາກົນ ພາຍໃນໂຄງການທີ່ພັກດັ່ງກ່າວ ເຊິ່ງມີຄ່າຮຽນລາຄາຖືກພຽງແຕ່ 10 ໂດລາຕໍ່ເດືອນເທົ່ານັ້ນ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ