ຕອນເຊົ້າວັນທີ 15 – 16 ມັງກອນ 2020 ການນໍາເມືອງໄຊ ແຂວງອຸດົມໄຊ ເຊິ່ງນໍາໂດຍ ທ່ານ ພົມມະສຸກ ມອນຈັນດີ ຮອງເຈົ້າເມືອງໄຊ ແຂວງອຸດົມໄຊ ພ້ອມດ້ວຍຄະນະ ແລະ ວິຊາການຈາກຫ້ອງການກະສິກຳ ແລະ ປ່າໄມ້ເມືອງໄຊ ໄດ້ລົງເຄື່ອນໄຫວຕິດຕາມຊຸກຍູ້ການປູກພືດລະດູແລ້ງ ແລະ ການລ້ຽງສັດຂອງປະຊາຊົນ ແລະ ຜູ້ລົງທຶນ.
ພາບປະກອບຂ່າວ
ໃນການລົງເຄື່ອນໄຫວຄັ້ງນີ້ມີຢູ່ຫຼາຍຈຸດ, ຫຼາຍເຂດການຜະລິດທີ່ແຕກຕ່າງກັນ ໂດຍສະເພາະແມ່ນເຂດນ້ຳກໍ ຕອນໃຕ້ ຄືບ້ານກັດ, ບ້ານໃໝ່, ຫ້ວຍຊ່າງ, ປຸ່ງຫຽງ, ລ້ອງຢາ ແລະ ບ້ານແຟນ ປະຊາຊົນສ່ວນຫຼາຍແມ່ນປູກຢາສູບ, ປູກມອນ, ມັນດ້າງ ແລະ ເຂົ້ານາແຊງ, ເຂດໂພນໂຮມ ປູກໝາກຖົ່ວເບີ, ຖົ່ວດິນ ແລະ ການລ້ຽງງົວ, ແບ້ ໂດຍສະເພາະແມ່ນຢູ່ບ້ານພຽງໄຊ, ການປູກໝາກເຜັດ ຂອງບໍລິສັດ ຄ່າຍເຊິນ ຂອງຈີນ ຢູ່ບ້ານນາງິ້ວ, ການປູກຖົ່ວເຫຼືອງ ແລະ ເຂົ້ານາແຊງ ບ້ານນາແລ, ນາສ້າວ, ການລ້ຽງເປັດ, ໄກ່ ຂອງບໍລິສັດ ຊີເຟີງ ພັດທະນາສັດປີກ ຢູ່ບ້ານນາໝີ ແລະ ບ້ານຫ້ວຍຂຸມ. ນອກນັ້ນ, ປະຊາຊົນຈໍານວນໜຶ່ງຍັງພ້ອມກັນປູກພືດຊະນິດອື່ນໆ ເຊັ່ນ: ການປູກມອນ, ກາເຟ ທັງໝົດນັ້ນກໍເພື່ອເປັນການທົດແທນການປູກເຂົ້ານາປີ ແລະ ສາລີ ໃນໄລຍະຜ່ານມາ ທີ່ໄດ້ຮັບຄວາມເສຍຫາຍຈາກໄພທຳມະຊາດ ແລະ ສັດຕູພືດທຳລາຍ, ມາຮອດປັດຈຸບັນນີ້ ເຫັນວ່າເປັນຂະບວນຟົດຟື້ນ ແລະ ມີບາດກ້າວຂະຫຍາຍຕົວ.
ພາບປະກອບຂ່າວ
ອີງຕາມການລາຍງານຂອງ ທ່ານ ສີວິໄສ ບຸນສະຫວັດ ຫົວໜ້າຫ້ອງການກະສິກໍາເມືອງໄຊ ເຫັນວ່າການປູກພືດໃນລະດູແລ້ງຢູ່ທົ່ວເມືອງໄຊ ແຂວງອຸດົມໄຊ ມີເນື້ອທີ່ທັງໝົດ 447 ກວ່າເຮັກຕາ. ໃນນັ້ນ, ການປູກຢາສູບມີເນື້ອທີ່ 87 ເຮັກຕາ, ໝາກຖົ່ວເບີ 89 ເຮັກຕາ, ໝາກຖົ່ວເຫຼືອງ 34 ເຮັກຕາ, ໝາກເຜັດ 23 ເຮັກຕາ, ໝາກຖົ່ວດິນ 27 ເຮັກຕາ, ມັນດ້າງ 38 ເຮັກຕາ ແລະ ເຂົ້ານາແຊງ ຈຳນວນ 27 ເຮັກຕາ ໂດຍລວມແລ້ວເຫັນວ່າມີເນື້ອທີ່ປູກເພີ່ມຂຶ້ນກວ່າປີຜ່ານມາ.
