lao simply beautiful, ວັດຊຽງທອງ ແລະ ວັດພູຈຳປາສັກ ໄດ້ຮັບລາງວັນການທ່ອງທ່ຽວແບບຍືນຍົງອາຊຽນ ໃນການປະກາດເມື່ອວັນທີ 16 ມັງກອນ 2020ຜ່ານມາທີ່ປະເທດບຣູໄນ.
ເນື່ອງໃນໂອກາດງານມະຫາກໍາການທ່ອງທ່ຽວອາຊຽນປະຈຳປີ 2020 ທີ່ຈັດຂຶ້ນໃນລະຫວ່າງວັນທີ 12-16/01/2020 ຢູ່ທີ່ປະເທດບຣູໄນ. ພິເສດໃນງານມະຫາກໍາການທ່ອງທ່ຽວອາຊຽນຄັ້ງນີ້ໄດ້ມີການຈັດງານມອບລາງວັນມາດຕະຖານການທ່ອງທ່ຽວອາຊຽນຂຶ້ນໃນວັນທີ 16/01/2020 ລວມມີ 4 ປະເພດລາງວັນຄື:
ມາດຕະຖານໂຮງແຮມຂຽວອາຊຽນປະເທດລະ 5 ລາງວັນ, ລາງວັນມາດຕະຖານສະຖານທີ່ຈັດງານອາຊຽນ (ຫ້ອງປະຊຸມ) ປະເທດລະ5 ລາງວັນ, ລາງວັນມາດຕະຖານເມືອງທ່ອງທ່ຽວສະອາດອາຊຽນປະເທດລະ3 ລາງວັນ,ລາງວັນການທ່ອງທ່ຽວແບບຍືນຍົງອາຊຽນປະເທດລະ2 ລາງວັນ.
ສຳລັບລາງວັນການທ່ອງທ່ຽວແບບຍືນຍົງອາຊຽນປະເທດລະ2 ລາງວັນ (ມີຜະລິດຕະພັນທ່ອງທ່ຽວເຂດຕົວເມືອງ 01 ລາງວັນແລະຜະລິດຕະພັນທ່ອງທ່ຽວເຂດຊົນນະບົດ 01 ລາງວັນ) ເຊິ່ງສະຖານທີ່ທີ່ໄດ້ຮັບລາງວັນຂອງ ສປປ ລາວປະມີ :ສະຖານທີ່ທ່ອງທ່ຽວວັດຊຽງທອງ, ແຂວງຫລວງພະບາງ (ຜະລິດຕະພັນການທ່ອງທ່ຽວໃນຕົວເມືອງ) ແລະ ສະຖານທີ່ທ່ອງທ່ຽວວັດພູຈໍາປາສັກ, ແຂວງຈໍາປາສັກ (ຜະລິດຕະພັນການທ່ອງທ່ຽວໃນຊົນນະບົດ).
ສຳລັບລາງວັນມາດຕະຖານໂຮງແຮມຂຽວອາຊຽນປະເທດລະ 5 ລາງວັນ ເຊິ່ງໃນນັ້ນ ສປປ ລາວ ເຮົາມີ : ໂຮງແຮມພູແມນ ແຂວງຫລວງພະບາງ, ໂຮງແຮມອິນທິຣາ ວັງວຽງແຂວງວຽງຈັນ, ຣີສອດນໍ້າກັດຢໍລະປ່າ ແຂວງອຸດົມໄຊ, ຣີສອດພູວິລລ່າ ແຂວງຫລວງນໍ້າທາ ແລະ ໂຮງແຮມປາກຊ່ອງແດນງາມ ແຂວງຈໍາປາສັກ
ສ່ວນລາງວັນ ມາດຕະຖານສະຖານທີ່ຈັດງານອາຊຽນ (ຫ້ອງປະຊຸມ) ປະເທດລະ5 ລາງວັນ ເຊິ່ງໃນນັ້ນ ສປປ ລາວ ເຮົາມີ :
ຫ້ອງປະຊຸມຂອງໂຮງແຮມພູແມນ ແຂວງຫລວງພະບາງ,ຫ້ອງປະຊຸມຂອງໂຮງແຮມຄຣາວພລາຊ່າ ນະຄອນຫລວງວຽງຈັນ, ຫໍປະຊຸມແຫ່ງຊາດ ນະຄອນຫລວງວຽງຈັນ, ຫ້ອງປະຊຸມຂອງໂຮງແຮມຈໍາປາສັກແກຣນ ແຂວງຈໍາປາສັກ ແລະ ຫໍວັດທະນະທໍາແຂວງສະຫວັນນະເຂດ.
ຂະນະທີ່ລາງວັນມາດຕະຖານເມືອງທ່ອງທ່ຽວສະອາດອາຊຽນ ປະເທດລະ3 ລາງວັນ ເຊິ່ງໃນນັ້ນ ສປປ ລາວ ເຮົາມີ ພຽງເມືອງທ່ອງທ່ຽວນະຄອນຫລວງວຽງຈັນ.