ເພື່ອສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 71 ປີ ທັງເປັນການສະເຫຼີມສະຫຼອງວັນສ້າງຕັ້ງເຫຼົ່າຮົບສືບຂ່າວ ຂອງກອງທັບປະຊາຊົນລາວຄົບຮອບ 65 ປີ ໄດ້ມີຂຶ້ນວັນທີ 17 ມັງກອນ 2020 ທີ່ວິທະຍາຄານກົມມະດໍາ ກະຊວງປ້ອງກັນປະເທດ ໃຫ້ກຽດເຂົ້າຮ່ວມຂອງທ່ານ ທອງລຸນ ສີສຸລິດ ນາຍົກລັດຖະມົນຕີ ທ່ານ ພົນເອກ ຈັນສະໝອນ ຈັນຍາລາດ ລັດຖະມົນຕີກະຊວງປ້ອງກັນປະເທດ, ມີທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ພ້ອມດ້ວຍຮອງລັດຖະມົນຕີ ການນໍາພັກ-ລັດ ນາຍ ແລະ ພົນທະຫານເຂົ້າຮ່ວມ.
ທ່ານ ພັນໂທ ສີເພັງ ສຸລະເດດ ຫົວໜ້າຫ້ອງການເສນາທິການ ກົມ 213 ຜູ້ບັນຊາພາກສະໜາມໄດ້ລາຍງານແຜນການຊ້ອມຮົບຍິງລູກປືນແທ້ພາຍໃຕ້ລະຫັດຄົມໃນຟັກ-01 2020 ວ່າ: ຈຸດປະສົງໃນການຫັດແອບຊ້ອມຮົບນີ້ ກໍ່ເພື່ອຮັບປະກັນໃຫ້ກໍາລັງ ກົມກອງເຫຼົ່າຮົບສືບຂ່າວ ໄດ້ຮັບການອົບຮົມຫັດແອບຢ່າງຕໍ່ເນື່ອງ ປະຕິບັດລະບຽບພາກສະໜາມ ຊໍານິຊໍານານທາງດ້ານສີລະປະຍຸດ, ຍຸດທະວິທີສືບຂ່າວ ເຕັກນິກການນໍາໃຊ້ອາວຸດ-ກະສູນ, ອຸປະກອນປະກອບສະເພາະສືບຂ່າວ ແລະ ຮູບແບບການປະຕິບັດໜ້າທີ່ສູ້ຮົບປະສານກັບເຫຼົ່າທະຫານອາກາດ ກຽມພ້ອມປະຕິບັດໜ້າທີ່ແກ້ໄຂສະພາບການຕ່າງໆ ຕາມຄໍາສັ່ງຂອງຂັ້ນເທິງໃນສະເພາະໜ້າ ແລະ ຍາວນານ.
ທ່ານກ່າວຕື່ມວ່າ: ໃນຫຼາຍປີທີ່ຜ່ານມາກໍາລັງ ກົມກອງເຫຼົ່າຮົບສືບຂ່າວກອງທັບປະຊາຊົນລາວໄດ້ຈັດຕັ້ງອົບຮົມ-ຫັດແອບຕາມຄໍາສັ່ງອົບຮົມຫັດແອບປະຈໍາປີຂອງກົມອົບຮົມ ກົມໃຫຍ່ເສນາທິການກອງທັບຢ່າງຕໍ່ເນື່ອງ ໂດຍສຸມໃສ່ອົບຮົມ-ຫັດແອບການທະຫານ ການບັນຊາ ໃນນີ້ໄດ້ສຸມໃສ່ອົບຮົມ-ຫັດແອບສີລະປະຍຸດ ຍຸດທະວິທີສືບຂ່າວເປັນຈຸດໜັກ ເພື່ອໃຫ້ເຫັນເຖິງການເຕີບໃຫຍ່ຢ່າງເຂັ້ມແຂງ ແລະ ຍິ່ງໃຫຍ່ຂອງເຫຼົ່າຮົບສືບຂ່າວ ເຊິ່ງການຈັດຕັ້ງຊ້ອມຮົບຍິງລູກປືນແທ້ໃນຄັ້ງນີ້ໄດ້ສັງລວມເອົາ 9 ເນື້ອໃນມາສະແດງ.
ທີ່ມາ: Vientiane Mai