ຫຼວງພະບາງ ຄວ້າແຊັມ 3 ປະເພດປະເພດໃນງານກີລາ - ສິລະປະ ນັກຮຽນ 5 ແຂວງພາກເໜືອ - Laoedaily

ຫຼວງພະບາງ ຄວ້າແຊັມ 3 ປະເພດປະເພດໃນງານກີລາ – ສິລະປະ ນັກຮຽນ 5 ແຂວງພາກເໜືອ

ແຂວງຫຼວງພະບາງ ຄວັາແຊັມ 3 ປະເພດກີລາປະກອບດ້ວຍ ບານເຕະ, ກະຕໍ້ ແລະ ໜ້າເກັກ ປະເພດຄູ່ຍິງໄລຍະ 10 ແມັດ ໃນງານການແຂ່ງຂັນກີລາ-ແລກປ່ຽນສິລະປະ-ວັນນະຄະດີ ແລະ ວັດທະນະທໍາ ນັກຮຽນມັດທະຍົມສຶກສາ 5 ແຂວງພາກເໜືອ ແລະ ແຂວງດຽນບຽນຟູ ສສ ຫວຽດນາມ ຄັ້ງທີ XII ປະຈໍາສົກຮຽນ 2020 ທີ່ແຂວງບໍ່ແກ້ວ ລະຫວ່າງວັນທີ 6-10 ມັງກອນ 2020.

ທ້າຍອາທິດ ທີ່ຜ່ານມາ ທີ່ສະໜາມກິລາແຂວງບໍ່ແກ້ວ ບ້ານປ່າອ້ອຍ ເມືອງຮ້ວຍຊາຍ ໄດ້ມີພິທີປິດການແຂ່ງຂັນກີລາ – ແລກປ່ຽນສິລະປະ – ວັນນະຄະດີ ແລະ ວັດທະນະທໍາ ນັກຮຽນມັດທະຍົມສຶກສາ 5 ແຂວງພາກເໜືອ ແລະ ແຂວງດຽນບຽນ ສສ ຫວຽດນາມ ຄັ້ງທີ XII ປະຈໍາສົກຮຽນ 2020 ໂດຍໃຫ້ກຽດເຂົ້າຮ່ວມ ແລະ ມອບລາງວັນຂອງ ທ່ານ ປອ. ບົວຄົງ ນາມມະວົງ ກໍາມະການສໍາຮອງສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງບໍ່ແກ້ວ ພ້ອມດ້ວຍບັນດາຮອງເຈົ້າແຂວງ, ມີບັນດາຄະນະນຳ, ຄູຝຶກ ແລະ ນັກກີລາຈາກ 5 ແຂວງພາກເໜືອ ແລະ ແລະ ແຂວງດຽນບຽນຟູ ສສ ຫວຽດນາມ ຕະຫຼອດຮອດພໍ່ແມ່ປະຊາຊົນຊາວແຂວງບໍ່ແກ້ວເຂົ້າຮ່ວມຢ່າງຫຼວງຫຼາຍ.

ໂອກາດດັ່ງກ່າວ, ທ່ານ ສົມຊາຍ ສີສະຫວັດ ຮອງຫົວໜ້າພະແນກສຶກສາທິການ ແລະ ກີລາແຂວງບໍ່ແກ້ວ ລາຍງານການຈັດງານຄັ້ງນີ້ ໃຫ້ຮູ້ວ່າ: ການແຂ່ງຂັນຄັ້ງນີ້ ໄດ້ດຳເນີນ ໃນລະຫວ່າງວັນທີ 6-10 ມັງກອນ 2020 ທີ່ແຂວງບໍ່ແກ້ວ ໄດ້ຮັບກຽດເປັນເຈົ້າພາບ ໂດຍມີຈຸດປະສົງຫຼັກ ກໍເພື່ອສ້າງຄວາມສາມັກຄີໄມຕີຈິດມິດຕະພາບລະຫວ່າງ ລາວ-ຫວຽດນາມ ພ້ອມທັງເປັນການສ້າງຄວາມເຂັ້ມແຂງການຮຽນການສອນຫຼັກສູດວິຊາພະລະ ແລະ ສີລະປະສຶກສາ ແລະ ຫຼິ້ນກີລາເພື່ອສຸຂະພາບ, ມິດຕະພາບ, ຄວາມສາມັກຄີ ແລະ ຫ່າງໄກສິ່ງເສບຕິດ.

“ ລາຍການນີ້ ມີນັກຮຽນມັດທະຍົມສຶກສາ ທີ່ມາຈາກ 5 ແຂວງພາກເໜືອ ສປປ ລາວ ປະກອບມີ ແຂວງບໍ່ແກ້ວ ເຈົ້າພາບ, ແຂວງຫຼວງພະບາງ, ແຂວງອຸດົມໄຊ, ແຂວງຜົ້ງສາລີ, ແຂວງຫຼວງນໍ້າທາ ແລະ ແຂວງດຽນບຽນຟູ ສສ ຫວຽດນາມ ເຂົ້າຮ່ວມຢ່າງຫຼວງຫຼາຍ, ໃນນັ້ນ ມີການແຂ່ງຂັນ 4 ປະເພດກີລາ ແລະ ຊີງໄຊກັນ 9 ລາຍການ ຄື: ບານເຕະຊາຍ, ດອກປີກໄກ່ຄູ່ຍິງ-ຊາຍ ແລະ ຄູ່ປະສົມ, ກະຕໍ້ທີມດ່ຽວຍິງ-ຊາຍ ແລະ ກີລາໜ້າເກັກທີມຄູ່ຍິງ-ຄູ່ຊາຍ ແລະ ຄູ່ປະສົມ. ນອກນັ້ນ ໃນມື້ສຸດທ້າຍກໍມີການສະແດງສິລະປະ-ວັນນະຄະດີ ໃນງານລ້ຽງພິທີສະຫຼຸບປິດການແຂ່ງຂັນໃນຄັ້ງນີ້ອີກດ້ວຍ ” ທ່ານ ສົມຊາຍ ສີສະຫວັດ ກ່າວ.

ຜ່ານການແຂ່ງຂັນກີລາ 4 ປະເພດ, ໃນນັ້ນ ແຂວງຫຼວງພະບາງ ສາມາດກວາດແຊັມໄດ້ຫຼາຍກວ່າ 4 ແຂວງ ຈາກ ສສປ ລາວ ແລະ ແຂວງດຽນບຽນຟູ ສສ ຫວຽດນາມ ກໍຄື ຄວ້າແຊັມກີລາບານເຕະຊາຍ, ກະຕໍ້ທີມດ່ຽວຍິງ ແລະ ໜ້າເກັກ ປະເພດຄູ່ຍິງໄລຍະ 10 ແມັດ, ສ່ວນອັນດັບທີ 2 ແມ່ນແຂວງດຽນບຽນຟູ ສາມາດຍາດອັນດັບທີ 1 ຈາກກີລາດອກປີກໄກ່ 3 ລາຍການ ປະກອບມີ ປະເພດຄູ່ຍິງ-ຄູ່ຊາຍ ແລະ ຄູ່ປະສົມ, ອັນດັບທີ 3 ແຂວງບໍ່ແກ້ວ ຄວ້າແຊັມກີລາກະຕໍ້ທີມດ່ຽວຊາຍ ແລະ ອັນດັບທີ 4 ແຂວງຫຼວງນໍ້າທາ ຄວ້າແຊັມໜ້າເກັກ ປະເພດຄູ່ຊາຍ, ອັນດັບທີ 5 ແຂວງຜົ້ງສາລີ ຍາດໄດ້ແຊັມໜ້າເກັກ ປະເພດຄູ່ປະສົມ ແລະ ອັນດັບທີ 6 ແຂວງອຸດົມໄຊ ບໍ່ສາມາດຍາດໄດ້ຈັກແຊັມ ຈາກກິລາ 4 ປະເພດ.
ຂ່າວ – ພາບ : ບຸນເພັດ ໄຊຍະວົງ

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ