ຊາວໜຸ່ມຕະລຸມບອນ ກະຊວງພະລັງງານ ແລະ ບໍ່ແຮ່ ມອບອຸປະກອນໃຫ້ 2 ໂຮງຮຽນ - Laoedaily

ຊາວໜຸ່ມຕະລຸມບອນ ກະຊວງພະລັງງານ ແລະ ບໍ່ແຮ່ ມອບອຸປະກອນໃຫ້ 2 ໂຮງຮຽນ

ໃນວັນທີ 14 ມັງກອນປີ 2020 ນີ້ ທ່ານ ສີມອນ ພິຈິດ ຄະນະພັກກະຊວງພະລັງງານ ແລະ ບໍ່ແຮ່, ກຳມະການສູນກາງຊາວໜຸ່ມ ປະຊາຊົນ ປະຕິວັດລາວ, ເລຂາຊາວໜຸ່ມກະຊວງພະລັງງານ ແລະ ບໍ່ແຮ່, ທັງແມ່ນຫົວໜ້າຄົ້ນຄວ້າພະລັງງານ ແລະ ບໍ່ແຮ່ ຮ່ວມກັບຊາວໜຸ່ມແຂວງ, ຊາວໜຸ່ມພະແນກພະລັງງານ – ບໍ່ແຮ່ ແລະ ຊາວໜຸ່ມເມືອງສາລະວັນ ໄດ້ນຳເອົາເຄື່ອງໄປມອບໃຫ້ສອງໂຮງຮຽນ ຄື: ໂຮງຮຽນປະຖົມສົມບູນບ້ານໜອງໃສ່ ແລະ ໂຮງຮຽນບ້ານບຶງຂາມ ເມືອງສາລະວັນ ແຂວງສາລະວັນ.

ເຄື່ອງທີ່ນຳໄປມອບໃນຄັ້ງນີ້ ມີຄື: ສີ 24 ຖັງ, ບານເຕະ 15 ໜ່ວຍ ຕານ່າງ 3 ຄູ່, ບານສົ່ງ 15 ໜ່ວຍ ຕານ່າງ 9 ດາງ, ກະຕໍ້ຫວາຍ 15 ໜ່ວຍ ຕານ່າງ 9 ດາງ, ປຶ້ມຂຽນ 600 ຕັບ, ບິກ 600 ກັບ, ສໍ 600 ກັບ ລວມມູນຄ່າທັງໝົດ 42 ລ້ານກວ່າກີບ.

ເຄື່ອງທີ່ນຳມາມອບໃນຄັ້ງນີ້ແມ່ນໄດ້ຈາກການລະດົມນຳອ້າຍນ້ອງຊາວໜຸ່ມພາຍໃນກະຊວງທີ່ຢູ່ໃນຄວາມຮັບຜິດຊອບຂອງຕົນ ເພື່ອມາຊ່ວຍເຫຼືອໂຮງຮຽນທີ່ໄດ້ຮັບຜົນກະທົບຈາກໄພນໍ້າຖ້ວມໃນຕົ້ນເດືອນ 9 ປີ 2019 ຜ່ານມາ ໃຫ້ຄ່ອຍກັບຄືນສູ່ສະພາບປົກກະຕິ. ພ້ອມນັ້ນ, ຄະນະຊາວໜຸ່ມທີ່ລົງໄປສ້າງຂະບວນການໃນ 2 ໂຮງຮຽນຄັ້ງນີ້ກໍໄດ້ຮ່ວມກັນທາສີໂຮງຮຽນ ໂດຍສົມທົບກັບອຳນາດການປົກຄອງບ້ານ, ຄູ – ອາຈານ ແລະ ນ້ອງນັກຮຽນໃນໂຮງຮຽນດັ່ງກ່າວ.

ທົ່ວແຂວງມີໂຮງຮຽນທັງໝົດ 190 ກວ່າແຫ່ງ ລວມທັງໂຮງຮຽນອະນຸບານ, ປະຖົມ, ມັດທະຍົມຕົ້ນ ແລະ ມັດທະຍົມປາຍ. ໃນນັ້ນ, ຖືກຜົນກະທົບໄພພິບັດນໍ້າຖ້ວມໃນຕົ້ນເດືອນກັນຍາ ປີ 2019 ມີທັງໝົດ 90 ແຫ່ງ ແລະ ຖ້ວມໜັກກວ່າໝູ່ມີ 20 ແຫ່ງ ລວມທັງໂຮງຮຽນອະນຸບານ, ປະຖົມ, ມັດທະຍົມຕົ້ນ ແລະ ມັດທະຍົມປາຍ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ
error: Content is protected !!