ເດັກອາຍຸ 6 ເດືອນ ຫາ 10 ປີ ຢູ່ເມືອງອຸທຸມພອນ ໄດ້ຮັບການສັກຢາປ້ອງກັນພະຍາດໝາກແດງ - Laoedaily

ເດັກອາຍຸ 6 ເດືອນ ຫາ 10 ປີ ຢູ່ເມືອງອຸທຸມພອນ ໄດ້ຮັບການສັກຢາປ້ອງກັນພະຍາດໝາກແດງ

ເພື່ອສະກັດກັ້ນ ແລະ ຕ້ານການແຜ່ລະບາດຂອງພະຍາດໝາກແດງ ບໍ່ໃຫ້ເກີດກັບເດັກທີ່ມີເກນອາຍຸແຕ່ 6 ເດືອນ ຫາ 10 ປີ ຢູ່ໃນເມືອງອຸທຸມພອນ ແຂວງ ສະຫວັນນະເຂດ, ສະນັ້ນ ການນຳເມືອງ ໄດ້ມີການເປີດຂະບວນການສັກຢາປ້ອງກັນພະຍາດດັ່ງກ່າວຂຶ້ນ ໃນວັນທີ 13 ມັງກອນ 2020 ທີ່ໂຮງຮຽນອະນຸບານເມືອງ, ໂດຍການເຂົ້າຮ່ວມຂອງທ່ານ ປະສົງສິນ ຈະເລີນສຸກ ເຈົ້າເມືອງອທຸມພອນ,ທ່ານ ຮາບິບ ຊ່ຽວຊານຈາກອົງການອະນາໄມໂລກ.


ໃນພິທີ ທ່ານ ດຣ ບຸນໂຮງ ແສງອາລຸນ ຫົວໜ້າຫ້ອງການສາທາລະນະສຸກເມືອງລາຍງານວ່າ: ເດັກນ້ອຍທີ່ຢູ່ໃນເປົ້າໝາຍອາຍຸ 06 ເດືອນ ຫາ 10 ປີ ທີ່ໄດ້ຮັບການສັກຢາປ້ອງກັນພະຍາດໝາກແດງນ້ອຍ,ໝາກແດງໃຫຍ່ປີນີ້ມີທັງໝົດ 17.800 ຄົນ, ແບ່ງອອກເປັນ 153 ຈຸດສັກຢາ,ມີ 19 ທີມງານ.

ພະຍາດໝາກແດງ ເປັນພະຍາດທີ່ຮ້າຍແຮງເຮັດໃຫ້ຕາບອດ, ປອດອັກເສບ, ສ່ວນຫຼາຍການພະຍາດນີ້ມັກຕິດຕໍ່ທາງລົມຫາຍໃຈ, ຖ້າຫາກເດັກຄົນໃດເປັນພະຍາດໝາກແດງແລ້ວ ຕ້ອງໄດ້ພັກໂຮງຮຽນເພື່ອຫຼີກລ້ຽງບໍ່ໃຫ້ໄປຕິດກັບຄົນອື່ນ. ສະເພາະເດັກນ້ອຍຢູ່ໂຮງຮຽນອະນຸບານເມືອງທີ່ໄດ້ຮັບການສັກຢາປ້ອງກັນພະຍາດໝາກແດງຄັ້ງນີ້ມີທັງໝົດ 95 ຄົນ, ຂອງຈຳນວນນັກຮຽນທັງໝົດພາຍໃນໂຮງຮຽນ 120 ຄົນ,ຍິງ 5 ຄົນ. ນອກນັ້ນ, ແມ່ນໄດ້ສັກຢູ່ບ້ານທີ່ທີມງານລົງໄປຕາມສຸກສາລາ ແລະ ຕາມບ້ານຕ່າງໆ.


ໂອກາດນີ້, ທ່ານ ປະສົງສິນ ຈະເລິນສຸກ ເຈົ້າເມືອງອຸທຸມພອນ ຍັງໄດ້ຮຽນຮ້ອງ ໃຫ້ພາກສ່ວນທີ່ກ່ຽວຂ້ອງຈົ່ງໄດ້ເຝົ້າລະວັງ, ຕິດຕາມສະພາບອາການຂອງລູກຫຼານແຕ່ລະຄົນ ຫາກມີອາການຜິດປົກະຕິໃນເວລາເປັນໄຂ້ອອກຕຸ່ມ ກໍ່ຮີບລາຍງານໃຫ້ສາທາລະນະສຸກເມືອງໂດຍດ່ວນ ເພື່ອປ້ອງກັນບໍ່ຄິດເຊື້ອພະຍາດດັ່ງກ່າວ.

ທີ່ມາ: ຖວທ ເມືອງອຸທຸມພອນ

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ