ສານຕັດສິນປະຫານຊີວິດຜູ້ຖືກຫາຄ້າຂາຍສິ່ງຜິດກົດໝາຍ - Laoedaily

ສານຕັດສິນປະຫານຊີວິດຜູ້ຖືກຫາຄ້າຂາຍສິ່ງຜິດກົດໝາຍ

ໃນຕອນເຊົ້າຂອງວັນທີ 10 ມັງກອນ 2020 ນີ້ ສານປະຊາຊົນແຂວງສະຫວັນນະເຂດ ໄດ້ຕັດສິນຄະດີກ່ຽວກັບການຄ້າຂາຍຢາເສບຕິດພາຍໃນແຂວງຂຶ້ນຢູ່ທີ່ຫ້ອງປະຊຸມຂອງສານດັ່ງກ່າວ.

ພາບປະກອບຂ່າວເທົ່ານັ້ນ
ຕາມຄໍາສັ່ງຕັດສິນຄະດີ ເລກທີ 001/ຂຕອ ລົງວັນທີ 10 ມັງກອນ 2020 ເຫັນວ່າ: ທ້າວ ບຸນທະວີ ສິດທິພອນ ອາຍຸ 29 ປີ ສັນຊາດລາວ, ອາຊີບຄ້າຂາຍ, ເກີດຢູ່ບ້ານແກ້ວວິໄລ ເມືອງວິລະບູລີ ແຂວງສະຫວັນນະເຂດ ໄດ້ກະທໍາຜິດໃນຂໍ້ຫາຄ້າຂາຍຢາເສບຕິດ ຈໍານວນ 17 ແພັກ, ມີ 51 ມັດ ເທົ່າກັບ 102.000 ເມັດ. ຜູ້ຖືກຫາໄດ້ຍອມຮັບສາລະພາບວ່າ: ກ່ອນເກີດເຫດຜູ້ກ່ຽວໄດ້ໄປເບິ່ງຕີໄກ່ຢູ່ປະເທດໄທ ແລ້ວໄປຮູ້ຈັກກັບ ທ້າວ ໜຶ່ງ (ຄົນໄທ).

ພາບປະກອບຂ່າວເທົ່ານັ້ນ

ຫຼັງຈາກນັ້ນ, ທ້າວ ໜຶ່ງ ກໍໄດ້ຊັກຊວນໃຫ້ ທ້າວ ບຸນທະວີ ນໍາຢາບ້າຈາກຝັ່ງລາວມາຂາຍໃຫ້ຕົນ ໂດຍໄດ້ມີການແລກເບີຕິດຕໍ່ກັນໄວ້. ຜ່ານມາໄລຍະໜຶ່ງໃນວັນທີ 9 ມັງກອນ 2019 ທ້າວ ບຸນທະວີ ກໍໄດ້ຂຶ້ນໄປຊື້ຢາບ້າຢູ່ເມືອງໂພນໂຮງ ແຂວງວຽງຈັນ, ພໍເມື່ອ ທ້າວ ບຸນທະວີ ໄປຮອດຈຸດນັດພົບກໍໄດ້ມີການຊື້ – ຂາຍຢາບ້າຈໍານວນ 102.000 ເມັດ ລວມເປັນເງິນ 663.000 ບາດ

ມາໃນວັນທີ 10 ມັງກອນ 2019 ກໍໄດ້ນໍາຢາບ້າມາເຊື່ອງໄວ້ໃນເຮືອນເຊົ່າຢູ່ບ້ານໂນນສະຫວາດ ນະຄອນໄກສອນພົມວິຫານ ແຂວງສະຫວັນນະເຂດ, ຈົນເວລາ 6:00 ໂມງເຊົ້າ ໄດ້ມີລູກຄ້າໂທລະສັບຕິດຕໍ່ຂໍຊື້ຢາບ້າ 5 ແພັກ ເທົ່າກັບ 15 ມັດ ໂດຍນັດຊື້ – ຂາຍກັນຢູ່ຮ້ານອາຫານແຫ່ງໜຶ່ງພາຍໃນບ້ານບຶງວະ ນະຄອນໄກສອນພົມວິຫານ, ເມື່ອ ທ້າວ ບຸນທະວີ ນໍາຢາບ້າມາສົ່ງທີ່ຈຸດນັດພົບເຈົ້າໜ້າທີ່ຕໍາຫຼວດກໍເຂົ້າຮວບຕົວຜູ້ຖືກຫາທັນທີ ແລ້ວຄົ້ນພົບຂອງກາງຈໍານວນ 5 ແພັກ ພາຍໃນລົດ ແລະ 12 ແພັກຢູ່ເຮືອນເຊົ່າ.

ພາບປະກອບຂ່າວເທົ່ານັ້ນ
ຈາກຫຼັກຖານຕ່າງໆທີ່ເຈົ້າໜ້າທີ່ຕໍາຫຼວດສາມາດຢຶດໄດ້ ສານປະຊາຊົນແຂວງຈຶ່ງຕັດສິນປະຫານຊີວິດ ທ້າວ ບຸນທະວີ ສິດທິພອນ ພ້ອມທັງຮິບຢາບ້າຈໍານວນ 51 ມັດ ຫຼື 102.000 ເມັດ ມອບໃຫ້ພາກສ່ວນທີ່ກ່ຽວຂ້ອງນໍາໄປທໍາລາຍຖິ້ມ, ຮິບໂທລະສັບ 2 ເຄື່ອງທີ່ໃຊ້ໃນການຕິດຕໍ່ຊື້ – ຂາຍ. ພ້ອມດຽວກັນນີ້, ກໍໄດ້ສົ່ງລົດຈິບປຣາໂດ້ສີປອນເງິນ ເລກທະບານ ຣສ 4888 ກໍາແພງນະຄອນ ຄືນໃຫ້ ທ້າວ ທອງລາ ( ພໍ່ຜູ້ຖືກຫາ ) ແລະ ຄອບຄົວ ເນື່ອງຈາກຜ່ານການສືບສວນ – ສອບສວນເຫັນວ່າລົດຄັນດັ່ງກ່າວເປັນຂອງ ທ້າວ ທອງລາ ເຊິ່ງ ທ້າວ ທອງລາ ບໍ່ມີສ່ວນກ່ຽວຂ້ອງໃນຄະດີ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ