ລາວ - ຈີນ ຍົກສູງນໍ້າໃຈຜູ້ກໍ່ສ້າງຊາວໜຸ່ມຜ່ານການແລກປ່ຽນວັດທະນະທໍາ - Laoedaily

ລາວ – ຈີນ ຍົກສູງນໍ້າໃຈຜູ້ກໍ່ສ້າງຊາວໜຸ່ມຜ່ານການແລກປ່ຽນວັດທະນະທໍາ

ສະຖານີວິທະຍຸ – ໂທລະພາບ ແຂວງກວາງຊີ ຮ່ວມກັບ ບໍລິສັດ ທາງລົດໄຟ ລາວ – ຈີນ ຈຳກັດ ຈັດງານພົບປະສັງສັນຜູ້ກໍ່ສ້າງຊາວໜຸ່ມ ລາວ – ຈີນ ພາຍໃຕ້ຫົວຂໍ້ “ ພວກເຮົາຄືຜູ້ລ່າຝັນ ” ຜ່ານການແລກປ່ຽນວັດທະນະທໍາເພື່ອຍົກສູງນໍ້າໃຈເສຍສະຫຼະຂອງຜູ້ກໍ່ສ້າງໃນການປະຕິບັດໜ້າທີ່ ແລະ ເປັນທັງຜູ້ສືບທອດ.

ງານດັ່ງກ່າວໄດ້ຈັດຂຶ້ນໃນວັນທີ 10 ມັງກອນ ປີ 2020 ທີ່ນະຄອນຫຼວງວຽງຈັນ ສປປ ລາວ ໂດຍການເຂົ້າຮ່ວມຂອງ ທ່ານ ບຸນເຈົ້າ ພິຈິດ ຜູ້ອຳນວຍການສະຖານີໂທລະພາບແຫ່ງຊາດລາວ, ທ່ານ ນາງ ຫຼີຢ້ຽນ ຮອງຫົວໜ້າພະແນກຮູບເງົາ ສະຖານີວິທະຍຸ – ໂທລະພາບແຂວງກວາງຊີ, ທ່ານ ນາງ ສຸດທິດາ ຫົວໜ້າວິທະຍຸສາກົນແຫ່ງປະເທດຈີນ ( CRI ) ປະຈໍາລາວ ແລະ ທ່ານ ຄໍາປ່ຽນ ອິນທະລືຊາ ຮອງຫົວໜ້າຄະນະຄຸ້ມຄອງໂຄງການທາງລົດໄຟ ລາວ – ຈີນ ພ້ອມດ້ວຍຊາວໜຸ່ມ ລາວ – ຈີນ ເຂົ້າຮ່ວມ.

ທ່ານ ນາງ ຫຼີຢ້ຽນ ໄດ້ກ່າວວ່າ: ງານພົບປະສັງສັນຜູ້ກໍ່ສ້າງຊາວໜຸ່ມ ລາວ – ຈີນ ໃນຄັ້ງນີ້ເປັນການສະເຫຼີມສະຫຼອງຕ້ອນຮັບປີໃໝ່ສາກົນ 2020, ເປັນໜຶ່ງໃນບັນດາກິດຈະກໍາແລກປ່ຽນບົດຮຽນທາງດ້ານວັດທະນະທຳຂອງຊາວໜຸ່ມສອງປະເທດ ລາວ – ຈີນ ແລະ ເປັນການຍົກສູງນຳໃຈເສຍສະຫຼະຂອງຊາວໜຸ່ມ ລາວ – ຈີນ ທີ່ກຳລັງເຮັດໜ້າທີ່ອັນສູງສົ່ງເຂົ້າໃນໂຄງການກໍ່ສ້າງທາງລົດໄຟ ລາວ – ຈີນ ພ້ອມທັງເປັນການຍົກສູງນໍ້າໃຈເສຍສະຫຼະຂອງນັກກໍ່ສ້າງ, ເຄົາລົບຕໍ່ໜ້າທີ່ວຽກງານໃນການແບກຮັບພາລະໜ້າທີ່ອັນຊົງກຽດ ໃນຖານະເປັນຜູ້ສືບທອດສາຍພົວພັນມິດຕະພາບ ລາວ – ຈີນ ແລະ ເພື່ອເປັນສ່ວນໜຶ່ງໃນການຮ່ວມປະຕິບັດຕາມຂໍ້ຕົກລົງໃນການເປັນຄູ່ຮ່ວມຊາຕາກຳດຽວກັນຂອງສອງຊາດ.

ທ່ານ ຄໍາປ່ຽນ ອິນທະລືຊາ ໄດ້ກ່າວຕື່ມວ່າ: ໂຄງການກໍ່ສ້າງທາງລົດໄຟ ລາວ – ຈີນ ເປັນໂຄງການຮ່ວມມືລະຫວ່າງສອງພັກ – ສອງລັດຖະບານລາວ ແລະ ຈີນ, ເປັນໂຄງການທີ່ຜັນຂະຫຍາຍຕາມຍຸດທະສາດໜຶ່ງແລວໜຶ່ງເສັ້ນທາງຂອງ ສປ ຈີນ ທັງເປັນການຜັນຂະຫຍາຍຍຸດທະສາດຂອງລາວ ທີ່ຈະຫັນຈາກປະເທດທີ່ບໍ່ມີຊາຍແດນຕິດກັບທະເລ ໃຫ້ກາຍເປັນປະເທດທີ່ເຊື່ອມຈອດກັບອະນຸພາກພື້ນ ແລະ ເປັນໂຄງການທີ່ຈະດຶງດູດການລົງທຶນຈາກຕ່າງປະເທດໃຫ້ມາລົງທຶນ ໃນ ສປປ ລາວ ທັງເປັນການເສີມສ້າງປັບປຸງລະບົບພື້ນຖານໂຄງລ່າງຄົມມະນາຄົມຂອງ ສປປ ລາວ ທັງເປັນການພັດທະນາ ເສດຖະກິດ – ສັງຄົມລາວອີກ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ