ເພື່ອເປັນການປະກອບສ່ວນຕ້ານໄພໜາວ, ທັງເປັນການຊ່ວຍເຫຼືອນ້ອງນັກຮຽນ ຜູ້ທຸກກຍາກຂາດເຂີນ, ເມື່ອຕົ້ນເດືອນ ມັງກອນ 2020 ຜ່ານມາຄະນະການນໍາຂອງເມືອງໄດ້ ນໍາເອົາເຄື່ອງຊ່ວຍເຫຼືອຈາກການນໍາຂອງແຂວງ ລົງໄປມອບໃຫ້ນ້ອງນ້ອຍນັກຮຽນຜູ້ທຸກຈົນ ຈຳນວນ 50 ກວ່າຄົນ ຢູ່ທີ່ໂຮງຮຽນ ມຕ ມົກໂຊະ ເມືອງຜາອຸດົມ ແຂວງບໍ່ແກ້ວ ເຊິ່ງນຳໂດຍທ່ານ ທອງວັນ ຮັກພາສິດ ຮອງເລຂາພັກເມືອງ, ທ່ານ ນາງ ຈັນທອນ ພອນສະລິ ຫົວໜ້າຫ້ອງການແຮງງານ ແລະ ສະຫວັດດີການ-ສັງຄົມເມືອງ ພ້ອມດ້ວຍຄະນະ; ໂດຍການເຂົ້າຮ່ວມຕ້ອນຮັບ ຂອງທ່ານ ອາຈານ ທອງດຳ ອຸດົມສານ ອຳນວຍການໂຮງຮຽນ ມຕ ມົກໂຊະ ພ້ອມດ້ວຍຄູອາຈານ, ນ້ອງນ້ອຍນັກຮຽນ.
ສຳລັບເຄື່ອງທີ່ນຳມາມອບໃນຄັ້ງນີ້ປະກອບມີເສື້ອກັນໜາວ 60 ຜືນ, ໂສ້ງຂາຍາວ 60 ຜືນ, ຜ້າຫົ່ມໃຫຍ່ໂຕ້ໂຕ້ 10 ຜືນ ແລະ ຜ້າຫົ່ມນ້ອຍ 55 ຜືນ ລວມເປັນມູນຄາທັງໝົດ 6 ລ້ານກວ່າກີບ.
ໂອກາດນີ້, ທ່ານ ນາງ ຈັນທອນ ພອນສະລິ ຫົວໜ້າຫ້ອງ ການແຮງງານ ແລະ ສະຫວັດດີການ-ສັງຄົມເມືອງ ໄດ້ຮຽກຮ້ອງມາຍັງຄະນະອໍານວຍການ, ຄູ-ອາຈານ ທຸກທ່ານຈົ່ງພ້ອມກັນນຳເອົາເຄື່ອງທີ່ນຳມາມອບໃນຄັ້ງນີ້ໄປແຈກຢາຍນ້ອງນ້ອຍນັກຮຽນຜູ້ທີ່ທຸກຈົນ, ຂາດເຂີນໃຫ້ທົ່ວເຖິງກັນ. ທັງນີ້, ເພື່ອເປັນການບັນເທົາຄວາມທຸກຈົນ ແລະ ຊຸກຍູ້-ສົ່ງເສີມວຽກງານການສຶກສາ ກໍ່ຄືນ້ອງນ້ອຍນັກຮຽນໃຫ້ມີຄວາມກະຕືລືລົ້ນຕໍ່ການຮຽນ, ກາຍເປັນນັກຮຽນດີ, ຮຽນເກັ່ງ ເປັນຄົນດີຂອງຄູ-ອາຈານ, ຂອງພໍ່ແມ່ ກໍ່ຄື ຄົນດີຂອງສັງຄົມ.
ທີ່ມາ: ໜັງສືພິມບໍ່ແກ້ວ
