ມອບ - ຮັບຕຶກສົງ ຂອງໂຮງໝໍເມືອງໄຊພູທອງ - Laoedaily

ມອບ – ຮັບຕຶກສົງ ຂອງໂຮງໝໍເມືອງໄຊພູທອງ

ໂຄງການກໍ່ສ້າງຕຶກສົງ ໂຮງໝໍເມືອງໄຊພູທອງ ແຂວງສະຫວັນນະເຂດ ໄດ້ດໍາເນີນການກໍ່ສ້າງມາແຕ່ວັນທີ 1 ທັນວາ 2018 ຫາ ວັນທີ 15 ສິງຫາ 2019 ເຊິ່ງເວລາໃນການກໍ່ສ້າງ 9 ເດືອນ ມູນຄ່າທັງໝົດ 810 ລ້ານກວ່າກີບ.

ພິທີມອບ – ຮັບອາຄານຕຶກສົງ ຂອງໂຮງໝໍເມືອງໄຊພູທອງ ແຂວງສະຫວັນນະເຂດ ໄດ້ຈັດຂຶ້ນເມື່ອບໍ່ດົນຜ່ານມານີ້ ໃຫ້ກຽດເຂົ້າຮ່ວມມີ ຍາທ່ານ ມະຫາສົມບູນ ເຈົ້າຄະນະ ອພສ ແຂວງ, ຍາທ່ານ ທອງດໍາ ຈັນທະວົງ ເຈົ້າຄະນະ ອພສ ເມືອງ, ມີທ່ານ ຄໍາວິໃສ ຜຸຍຍະວົງ ກໍາມະການພັກແຂວງ ເລຂາພັກເມືອງ ເຈົ້າເມືອງໄຊພູທອງ, ຄະນະປະຈໍາພັກເມືອງ, ກໍາມະການພັກເມືອງ, ອໍານາດການປົກຄອງ, ພະນັກງານອ້ອມຂ້າງເມືອງ, ເຖົ້າແກ່ແນວໂຮມ ແລະ ພໍ່ແມ່ປະຊາຊົນທັງສອງບ້ານເຂົ້າຮ່ວມ.


ໃນພິທີ ທ່ານ ມານະ ອໍາພາວັນ ຜູ້ຮັບເໝົາກໍ່ສ້າງໄດ້ລາຍງານວ່າ: ໂຄງການກໍ່ສ້າງຕຶກສົງ ເມືອງໄຊພູທອງ ເປັນອາຄານຊັ້ນດຽວໂຄງການສ້າງເປັນເບຕົງເສີມເຫຼັກ, ກໍ່ດ້ວຍດິນຈີ່, ໂຄງເຫຼັກມຸງດ້ວຍສັງກະສີ, ເພດານເຮັດດ້ວຍ, ພື້ນປູດ້ວຍກະໂລ, ອາຄານຫຼັງນີ້ມີເນື້ອທີ່ທັງໝົດ 200 ຕາແມັດ, ຂະໜາດ 20 x 10 ແມັດ, ມີ 4 ຫ້ອງນອນ, ມີ 1 ຫ້ອງແພດ ແລະ ມີຫ້ອງນໍ້າຕິດກັບ ຈໍານວນ 5 ຫ້ອງ.


ສ່ວນງົບປະມານໃນການກໍ່ສ້າງແມ່ນໄດ້ຈາກກອງທຶນພັດທະນາສົງພາຍໃນເມືອງ ຈໍານວນ 631 ລ້ານກວ່າກີບ, ທຶນລະດົມຈາກວັດຕ່າງໆພາຍໃນເມືອງ ຈໍານວນ 69 ລ້ານກີບ ລວມທຶນທັງໝົດ 700 ລ້ານກວ່າກີບ ເຊິ່ງລວມມູນຄ່າກໍ່ສ້າງຕຶກສົງ ທັງໝົດ 810 ລ້ານກວ່າກີບ. ພ້ອມນັ້ນ, ຍັງໄດ້ມອບ – ຮັບໃບກຽດຕິຄຸນເຈົ້າຄະນະ ອພສ ເມືອງ ຈໍານວນ 35 ໃບ.

 

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ