ຕອນບ່າຍວັນທີ 30 ທັນວາ 2019 ນີ້ ກອງບັນຊາການ ປກສ ແຂວງໄຊຍະບູລີ ໄດ້ຈັດພິທີປະກາດການເລື່ອນຊັ້ນຢ່າງສົມກຽດໃຫ້ນາຍ ແລະ ພົນຕຳຫຼວດ ຜູ້ທີ່ມີຜົນງານດີເດັ່ນ ແລະ ຮອດກຳນົດການເລື່ອນຊັ້ນ ທີ່ສະໂມສອນກອງບັນຊາການ ປກສ ແຂວງ ໂດຍການໃຫ້ກຽດເຂົ້າຮ່ວມຂອງ ທ່ານ ພັນເອກ ບຸນຫຼ້າ ສຸລິຍາ ຮອງຫົວໜ້າກອງບັນຊາການ ປກສ ແຂວງໄຊຍະບູລີ, ມີຄະນະ ພັກ – ຄະນະບັນຊາ, ແຂກຖີກເຊີນ, ພະນັກງານຫຼັກແຫຼ່ງພ້ອມດ້ວຍພະນັກງານ – ນັກຮົບເຂົ້າຮ່ວມ.
ທ່ານ ພັນໂທ ຄຳສິນ ຜິວວັນນາ ຫົວໜ້າຫ້ອງການເມືອງ ໄດ້ຜ່ານຂໍ້ຕົກລົງຂອງຫົວໜ້າກົມ ໃຫຍ່ການເມືອງ ກະຊວງປ້ອງກັນຄວາມສະຫງົບ ເລກທີ 4308/ກມປສສ ລົງວັນທີ 17 ທັນວາ 2019 ວ່າດ້ວຍການເລື່ອນຊັ້ນໃຫ້ນາຍຕຳຫຼວດທີ່ຂຶ້ນກັບກອງບັນຊາການ ປກສ ແຂວງໄຊຍະບູລີ ແລະ ຂໍ້ຕົກລົງຂອງຫົວໜ້າກອງບັນຊາການ ປກສ ແຂວງໄຊຍະບູລີ ສະບັບເລກທີ 7197/ປຊຍ ລົງວັນທີ 27 ທັນວາ 2019 ວ່າດ້ວຍການເລື່ອນຊັ້ນໃຫ້ພົນຕໍາຫຼວດໃນກຳລັງປ້ອງກັນຄວາມສະຫງົບ ແຂວງໄຊຍະບູລີ ເຊິ່ງມີຜູ້ໄດ້ຮັບການຍ້ອງຍໍເລື່ອນຊັ້ນທັງໝົດ 46 ສະຫາຍ.
ໃນນີ້, ເລື່ອນຮ້ອຍຕີຂຶ້ນເປັນຮ້ອຍໄທ 24 ສະຫາຍ, ຊັ້ນວາທີຮ້ອຍຕີຂຶ້ນເປັນຊັ້ນຮ້ອຍຕີ 2 ສະຫາຍ, ສິບເອກຂຶ້ນເປັນຊັ້ນວາທີຮ້ອຍຕີ 12 ສະຫາຍ, ສິບໂທຂຶ້ນເປັນຊັ້ນສິບເອກ 7 ສະຫາຍ, ສິບຕີຂຶ້ນສິບໂທ 1 ສະຫາຍ. ໂອກາດນີ້, ທ່ານ ພັນເອກ ບຸນຫຼ້າ ສຸລິຍາ ຮອງຫົວໜ້າກອງບັນຊາການ ປກສ ແຂວງໄຊຍະບູລີ ໄດ້ໃຫ້ກຽດປະດັບຊັ້ນຢ່າງສົມກຽດໃຫ້ນາຍ ແລະ ພົນຕຳຫຼວດທີ່ໄດ້ຮັບການເລື່ອນຊັ້ນ.
ພ້ອມທັງສະແດງຄວາມຍ້ອງຍໍຊົມເຊີຍຕໍ່ບັນດານາຍ ແລະ ພົນຕຳຫຼວດ ທີ່ໄດ້ຮັບການຍ້ອງຍໍເລື່ອນຊັ້ນໃນຄັ້ງນີ້ ເຊິ່ງເປັນການປະຕິບັດຕາມແນວທາງນະໂຍບາຍຂອງ ພັກ – ລັດທີ່ມີຕໍ່ບັນດານາຍ ແລະ ພົນຕຳຫຼວດທີ່ມີຜົນງານດີເດັ່ນ, ໄດ້ຮັບຄວາມໄວ້ເນື້ອເຊື່ອໃຈຈາກການຈັດຕັ້ງພັກ – ລັດ, ມີຜົນສໍາເລັດໃນໜ້າທີ່ວຽກງານ ພ້ອມທັງຮຽກຮ້ອງໃຫ້ບັນດານາຍ ແລະ ພົນຕຳຫຼວດເຫຼົ່ານັ້ນຈົ່ງສືບຕໍ່ຝຶກຝົນຫຼໍ່ຫຼອມຕົນເອງໃຫ້ມີຄວາມຮູ້ – ຄວາມສາມາດ, ຍົກສູງສະຕິລະວັງຕົວຕໍ່ກົນອຸບາຍຂອງສັດຕູ ແລະ ກຸ່ມຄົນບໍ່ດີ, ເອົາໃຈໃສ່ສຶກສາອົບຮົມການເມືອງ – ແນວຄິດ, ເຕົ້າໂຮມຄວາມສາມັກຄີພາຍໃນໃຫ້ໜັກແໜ້ນ, ເພີ່ມທະວີຍົກສູງຄວາມຮັບຜິດຊອບຕໍ່ໜ້າທີ່ວຽກງານທີ່ການຈັດຕັ້ງມອບໝາຍ ແລະ ສ້າງຜົນງານໃໝ່ຍິ່ງໃຫຍ່ກວ່າເກົ່າ.
( ກອງແກ້ວ ຈັນທະລັງສີ )
