ແຕ່ງຕັ້ງທ່ານ ທອງສຸກ ເປັນຫົວໜ້າຫ້ອງການສຶກສາທິການ ແລະ ກິລາເມືອງຫົງສາຜູ້ໃໝ່ - Laoedaily

ແຕ່ງຕັ້ງທ່ານ ທອງສຸກ ເປັນຫົວໜ້າຫ້ອງການສຶກສາທິການ ແລະ ກິລາເມືອງຫົງສາຜູ້ໃໝ່

ພິທີມອບ – ຮັບໜ້າທີ່ ຫົວໜ້າຫ້ອງການສຶກສາທິການ ແລະ ກິລາເມືອງຫົງສາ ລະຫວ່າງຜູ້ເກົ່າ ແລະ ຜູ້ໃໝ່ ໄດ້ຈັດຂື້ນໃນທ້າຍເດືອນ ທັນວາ 2019 ຜ່ານມາ, ຢູ່ທີ່ຫ້ອງການດັ່ງກ່າວ, ໂດຍການໃຫ້ກຽດເຂົ້າຮ່ວມເປັນປະທານຂອງທ່ານ ນາງ ດາວວິນ ລາດຊະກິດ ຮອງເລຂາພັກເມືອງ ຜູ້ຊີ້ນໍາວຽກງານແນວຄິດ ແລະ ວຽກງານພັກ – ພະນັກງານຂອງເມືອງ, ມີແຂກຖືກເຊີນ, ມີອໍານວຍການໂຮງຮຽນທົ່ວເມືອງ ແລະ ພະນັກງານຫ້ອງການສຶກສາທິການ ແລະ ກິລາເມືອງເຂົ້າຮ່ວມ.

ໂດຍອີງຕາມຂໍ້ຕົກລົງຂອງທ່ານເຈົ້າເມືອງຫົງສາວ່າດ້ວຍການ ໂຍກຍ້າຍທ່ານປຽ່ນ ຈິນດາ ຫົວໜ້າຫ້ອງການສຶກສາທິການ ແລະ ກິລາເມືອງ ໄປເປັນຫົວໜ້າຫ້ອງວ່າການເມືອງ, ສະບັບເລກທີ 602/ ຈມ. ຫສ,ລົງວັນທີ 10 ທັນວາ 2019, ຂໍ້ຕົກແຕ່ງຕັ້ງທ່ານ ທອງສຸກ ປ້ອງຄໍາ ເປັນຫົວໜ້າຫ້ອງການສຶກສາທິການ ແລະ ກິລາເມືອງຜູ້ໃໝ່ ສະບັບທີ 606/ຈມ. ຫສ ລົງວັນທີ 10 ທັນວາ 2019.

ພ້ອມນັ້ນ, ກໍ່ໄດ້ເຊັນບົດບັນທຶກປ່ຽນມອບໜ້າທີ່ກັນ. ຫຼັງຈາກນັ້ນ, ທ່ານນາງ ດາວວິນ ລາດຊະກິດ ກໍ່ໄດ້ກ່າວສະແດງຄວາມຊົມເຊີຍຕໍ່ກັບ ຜົນງານທີ່ຍາດມາໄດ້ໃນໄລຍະຜ່ານມາພ້ອມທັງໃຫ້ທິດຊີ້ນໍາ ແລະ ໃຫ້ກຽດໂອ້ລົມ ເຊິ່ງທ່ານໄດ້ກ່າວວ່າ ການໂຍກຍ້າຍ ແລະ ການຊັບປ່ຽນບ່ອນປະຈໍາການ ຂອງພະນັກງານ-ລັດຖະກອນ ເຊິ່ງຖືເປັນເລື່ອງປົກກະຕິ ທີ່ທາງພັກ – ລັດມີຄວາມຮຽກຮ້ອງຕ້ອງການ ເຂົ້າໃນວຽກງານໃນໄລຍະໃໝ່ ແລະ ໃຫ້ພ້ອມກັນເອົາໃຈໃສ່ສືບຕໍ່ຈັດຕັ້ງປະຕິບັດບັນດາໜ້າວຽກທີ່ຍັງຄົງຄ້າງ ໃຫ້ມີຜົນສຳເລັດຕາມລະດັບຄາດໝາຍ.

ທີ່ມາ: ສະຖານີວິທະຍຸໂທລະໂຄ່ງເມືອງຫົງສາ

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ