ສານປະຊາຊົນສູງສຸດຫາລືວຽກງານ 3 ສ້າງ ຕິດພັນການຕັດສິນຄະດີ - Laoedaily

ສານປະຊາຊົນສູງສຸດຫາລືວຽກງານ 3 ສ້າງ ຕິດພັນການຕັດສິນຄະດີ

ສານປະຊາຊົນສູງສຸດ (ສປສສ) ໄດ້ຈັດກອງປະຊຸມສະຫຼຸບວຽກງານ 3 ສ້າງ ຕິດພັນກັບການຕັດສິນຄະດີ 3 ຂັ້ນ ຂອງສານປະຊາຊົນນະຄອນຫຼວງວຽງຈັນ ຂຶ້ນໃນວັນທີ 31 ທັນວາ 2019 ທີ່ ຫໍປະຊຸມແຫ່ງຊາດ, ນະຄອນຫຼວງວຽງຈັນ ໂດຍການເປັນປະທານຂອງ ທ່ານ ຄຳພາ ແສງດາຣາ ປະທານສານປະຊາຊົນສູງສຸດ, ທ່ານ ສີຫຸນ ສິດທິລືໄຊ ຮອງເຈົ້າຄອງນະຄອນຫຼວງວຽງຈັນ ພ້ອມດ້ວຍບັນດາປະທານສານ ພ້ອມດ້ວຍຜູ້ຕາງໜ້າຈາກສ່ວນກ່ຽວຂ້ອງເຂົ້າຮ່ວມ.


ທ່ານ ຄຳພາ ແສງດາຣາ ກ່າວວ່າ: ກອງປະຊຸມຄັ້ງນີ້ ຈະເນັ້ນ 4 ບັນຫາຫຼັກເຊັ່ນ: 1) ພ້ອມກັນສະຫຼຸບສັງເກດຕີລາຄາຄືນວຽກງານ 3 ສ້າງໃນໄລຍະຜ່ານມາ ຊອກດ້ານດີ, ດ້ານອ່ອນ, ຖອດຖອນບົດຮຽນທີ່ດີເພື່ອສົ່ງເສີມ ແລະ ແກ້ໄຂຂໍ້ຄົງຄ້າງໃນການເຮັດວຽກຜ່ານມາ, ພ້ອມວາງທິດທາງແຜນການຕໍ່ໜ້າ ເພື່ອຫັນວຽກງານ 3 ສ້າງຕິດພັນກັບການຕັດສິນຄະດີ 3 ຂັ້ນເຂົ້າສູ່ລວງເລິກ ແລະ ດໍາເນີນຄະດີຢ່າງກວ້າງຂວາງ; 2) ຮັບຟັງການປະກອບຄຳເຫັນຂອງ ສານປະຊາຊົນນະຄອນຫຼວງວຽງຈັນ (ສປນວ) ແລະ ຄໍາເຫັນຂອງສານປະຊາຊົນ 4 ເຂດ. 3) ປະກາດຄະນະຮັບຜິດຊອບວຽກງານ 3 ສ້າງຂອງສານປະຊາຊົນພາກກາງ, ສປນວ ແລະ ສານປະຊາຊົນ 4 ເຂດ; ແລະ 4) ຮັບຟັງການໂອ້ລົມຂອງຮອງປະທານສະພາແຫ່ງຊາດ.


ໂອກາດນີ້, ທ່ານກ່າວຕື່ມວ່າ: ການລົງເຮັດວຽກ 3 ສ້າງ ແມ່ນການກໍ່ສ້າງຮາກຖານການເມືອງ ແມ່ນວຽກງານໜຶ່ງທີ່ມີຄວາມສຳຄັນ, ຈຳເປັນພາວະວິໄສ, ແມ່ນວຽກງານຍຸດທະສາດທັງໃນສະເພາະໜ້າ ແລະ ຍາວນານ, ທັງເປັນວິທີປະຕິວັດຂອງພັກ ແມ່ນໜ້າທີ່ຄວາມຮັບຜິດຊອບຂອງຄະນະພັກ ຂອງຄະນະນຳສານປະຊາຊົນທຸກຂັ້ນ ຕ້ອງເຮັດເປັນປະຈຳ, ປົກກະຕິ ແລະ ຕໍ່ເນື່ອງ.

ດັ່ງນັ້ນ, ສານປະຊາຊົນ ຈຶ່ງຖືວຽກງານ 3 ສ້າງ ເປັນວຽກງານກໍ່ສ້າງຄົນ,ກໍ່ສ້າງຜູ້ພິພາກສາ ພະນັກງານຂອງສານ. ເຊິ່ງຮາກຖານ 3 ສ້າງທີ່ສຸມໃສ່ໃນປັດຈຸບັນນີ້ ແມ່ນສານຂັ້ນຕົ້ນ, ສານຂັ້ນອຸທອນ ແລະ ສານຂັ້ນລົບລ້າງຢູ່ສານເຂດ ສານນະຄອນຫຼວງ, ສານພາກ. ເຊິ່ງສານປະຊາຊົນເຂດ ແມ່ນມີໜ້າທີ່ຕັດສິນຄະດີເປັນຂັ້ນຕົ້ນ, ເຊິ່ງຂັ້ນທຳອິດແມ່ນຫົວໜ່ວຍ ພື້ນຖານຕໍ່າສຸດຂອງສານປະຊາຊົນ ໂດຍຕິດພັນກັບບັນຫາ, ຂໍ້ຂັດແຍ່ງທີ່ເກີດຂຶ້ນ, ຕິດພັນກັບປະຊາຊົນ (ຄູ່ຄວາມໂດຍກົງ) ໝາຍວ່າຕິດພັນກັບບ້ານ, ກັບກຸ່ມບ້ານໂດຍກົງ. ຖ້າສານຂັ້ນຕົ້ນບ່ອນດັ່ງກ່າວເຮັດໄດ້ດີ, ຖືກຕ້ອງ, ເປັນທຳ, ມີຂໍ້ມູນຫຼັກຖານ, ພະນັກງານ ມີຄຸນທາດການເມືອງ, ຄຸນສົມບັດສິນທຳປະຕິວັດ, ໜັກແໜ້ນ, ມີຈັນຍາບັນ, ຈັນຍາທຳ ກໍ່ຈະເປັນເງື່ອນໄຂອັນດີໃຫ້ແກ່ ການເຄື່ອນໄຫວວຽກງານຂອງສານດີຂຶ້ນ.

 

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ