ອຸດົມໄຊ ໄດ້ຮັບງົວພໍ່ແມ່ພັນ 100 ໂຕ - Laoedaily

ອຸດົມໄຊ ໄດ້ຮັບງົວພໍ່ແມ່ພັນ 100 ໂຕ

ວັນທີ 28 ທັນວາ 2019 ນີ້ ຄະນະຮັບຜິດຊອບໂຄງການສົ່ງເສີມລ້ຽງສັດໃຫຍ່ຂອງແຂວງອຸດົມໄຊ ໄດ້ເດີນທາງໄປແຂວງບໍ່ແກ້ວ ເພື່ອຮັບເອົາງົວພໍ່ແມ່ພັນ ໃນຊຸດທີ 2 ຈໍານວນ 112 ໂຕ.

ທ່ານ ບຸນຊູ ດວງພະສິດ ຮອງຫົວໜ້າພະແນກກະສິກຳ ແລະ ປ່າໄມ້ ແຂວງອຸດົມໄຊ ກ່າວອີກວ່າ: ງົວພໍ່ແມ່ພັນທີ່ແຂວງອຸດົມໄຊ ໄດ້ຮັບໃນຄັ້ງນີ້ແມ່ນໄດ້ຮັບການຊ່ວຍເຫຼືອລ້າຈາກ ບໍລິສັດ ດອກງິ້ວຄຳ ໃນຈຳນວນທັງໝົດ 205 ໂຕ, ຜູ້ 5 ໂຕ ເພື່ອນໍາມາຈັດແບ່ງ ແລະ ແຈກຢາຍໃຫ້ກັບປະຊາຊົນໃນຂອບເຂດ 7 ເມືອງທົ່ວແຂວງອຸດົມໄຊ ໂດຍແນໃສ່ໃນການສ້າງເປັນກອງທຶນຂັ້ນເມືອງ, ແຂວງ ເຮັດໃຫ້ປະຊາຊົນມີລາຍຮັບ ແລະ ກ້າວໄປສູ່ການຫຼຸດພົ້ນອອກຈາກຄວາມທຸກຍາກ.

ການເດີນທາງໄປຮັບເອົາງົວແມ່ນແບ່ງເປັນ 2 ຊຸດ ເຊິ່ງຊຸດທຳອິດແມ່ນວັນທີ 13 ທັນວາ 2019 ຈຳນວນ 93 ໂຕ, ຜູ້ 4 ໂຕ ແລະ ໄດ້ຈັດແບ່ງໃຫ້ກັບບາງເມືອງແລ້ວ ເປັນຕົ້ນແມ່ນເມືອງໄຊ ໄດ້ຮັບ 30 ໂຕ,ເມືອງຫຼາ 30 ໂຕ ແລະ ເມືອງນາໝໍ້ 31 ໂຕ, ສ່ວນຊຸດທີ 2 ນີ້ ໄດ້ຮັບມາທັງໝົດ ຈຳນວນ 112 ໂຕ, ຜູ້ 1 ໂຕ ແລະ ໄດ້ຈັດແບ່ງໃຫ້ກັບເມືອງແບ່ງ ຈໍານວນ 35 ໂຕ, ເມືອງຮຸນ 16 ໂຕ, ປາກແບງ 26 ໂຕ, ເມືອງງາ 15 ໂຕ, ສູນ 9 ແຂວງ 10 ໂຕ ແລະ ເມືອງໄຊ ອີກ 10 ໂຕ ລວມມູນຄ່າງົວທັງໝົດ 2 ຕື້ກວ່າກີບ.

ສະເພາະປະຊາຊົນຜູ້ທີ່ຈະຮັບເອົາງົວພໍ່ແມ່ພັນໄປລ້ຽງນັ້ນ ຕ້ອງມີບາງເງື່ອນໄຂ ໂດຍສະເພາະແມ່ນມີຄວາມດຸໝັ່ນ, ມັກຮັກໃນອາຊີບການລ້ຽງສັດໃຫຍ່, ມີສະຖານທີ່ເໝາະສົມທີ່ຈະຂະຫຍາຍຕໍ່ໄປ, ມີສະຖານທີ່ປູກຫຍ້າ ແລະ ອາຫານສັດພຽງພໍ. ຫຼັງຈາກທີ່ມອບຕໍ່ໃຫ້ກັບບັນດາປະຊາຊົນໃນແຕ່ລະເມືອງແລ້ວ ທາງຄະນະຮັບຜິດຊອບ ກໍຄືວິຊາການຈະໄດ້ລົງຊຸກຍູ້ ແລະ ຕິດຕາມອາການຂອງງົວຢ່າງເປັນປົກກະຕິ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ
error: Content is protected !!