ສຟລ ສະຫຼຸບຜົນງານ 1 ປີ ພ້ອມສະຫຼອງສົ່ງທ້າຍປີເກົ່າຕ້ອນຮັບປີໃໝ່ - Laoedaily

ສຟລ ສະຫຼຸບຜົນງານ 1 ປີ ພ້ອມສະຫຼອງສົ່ງທ້າຍປີເກົ່າຕ້ອນຮັບປີໃໝ່

ວັນທີ 27 ທັນວາ 2019 ຄະນະສະມາຄົມເຟີນີເຈີລາວ ( ສຟລ ) ນຳພາໂດຍ ທ່ານ ກອງມາລາ ພົມມະໄລ ຮອງປະທານສະມາຄົມເຟີນີເຈີລາວ ໄດ້ນຳກະຕ່າດອກໄມ້ ແລະ ຂອງຂວັນເຂົ້າອວຍພອນ ທ່ານ ຄຳໄພ ສົມຊະນະ ປະທານສະມາຄົມເຟີນີເຈີລາວ ເນື່ອງໂອກາດວັນສະເຫຼີມສະຫຼອງສົ່ງທ້າຍປີເກົ່າ 2019 ແລະ ຕ້ອນຮັບປີໃໝ່ສາກົນ 2020.

ເປັນພຽງພາບປະກອບຂ່າວເທົ່ານັ້ນ

ພ້ອມກັບສະຫຼຸບຄືນວຽກງານພາຍໃນສະມາຄົມໃນຕະຫຼອດ 1 ປີຜ່ານມາ ແລະ ແຜນທິດທາງໃນຕໍ່ໜ້າ ໂດຍສະເພາະແມ່ນການກະກຽມຈັດງານວາງສະແດງເຟີນີເຈີໄມ້ລາວ ຄັ້ງທີ 6 ທີ່ຈະຈັດຂຶ້ນໃນກາງເດືອນມັງກອນ ປີ 2020 ນີ້ທີ່ສູນການຄ້າ ລາວ – ໄອເຕັກ.

ເປັນພຽງພາບປະກອບຂ່າວເທົ່ານັ້ນ

ທ່ານ ຄຳໄພ ສົມຊະນະ ກ່າວວ່າ: ງານລ້ຽງສະຫຼອງດັ່ງກ່າວນີ້ແມ່ນມີຄວາມໝາຍສຳຄັນ ກ່ອນຈະກ້າວມາເຖິງຈຸດນີ້ໄດ້ນັບເປັນເວລາ 9 ກວ່າປີ ທັງໝົດນັ້ນແມ່ນຍ້ອນບັນດາສະມາຊິກສະມາຄົມ, ປະທານກໍມີຈິດໃຈກວ້າງຂວາງສົມຄວນບວກໃສ່ຄະນະມີຄວາມສະໝານສາມັກຄີຮັກແພງກັນ, ມີ ຄວາມຮູ້ – ຄວາມສາມາດ, ຮັກອາຊີບຈັບມືກັນເຮັດໃຫ້ສະມາຄົມເຕີບໃຫຍ່ຂະຫຍາຍຕົວມາໄດ້ຮອດປັດຈຸບັນ, ໃນນາມປະທານຮູ້ສຶກເປັນກຽດ ແລະ ຂໍຍົກຍ້ອງນ້ຳໃຈເສຍສະຫຼະໃນຜ່ານມາເພື່ອສ່ວນລວມ ພ້ອມອວຍພອນໃຫ້ທຸກໂຮງງານທີ່ເປັນສະມາຊິກຈົ່ງມີແຕ່ສິ່ງດີໆເຂົ້າມາໃນປີ 2020 ແລະ ຈາກຄຳອວຍພອນຂອງສະມາຊິກຕໍ່ຈາກນີ້ ຕົນເອງກໍຈະຂໍຕອບແທນດ້ວຍຄວາມດຸຄວາມໝັ່ນ, ຫ້າວຫັນ, ຮັກບ້ານເກີດເມືອງນອນ, ຈົງຮັກພັກດີຕໍ່ອຸດົມການຂອງພັກ – ລັດ, ຮັກປະຊາຊົນ, ພັກ – ລັດເພິ່ງນັກທຸລະກິດ, ນັກທຸລະກິດກໍເພິ່ງ ພັກ – ລັດ.

ເປັນພຽງພາບປະກອບຂ່າວເທົ່ານັ້ນ

ສະນັ້ນ, ເມື່ອເຮົາມີຢູ່ມີກິນໃຫ້ເຮົາທຸກຄົນຄິດເຖິງຜູ້ທຸກຜູ້ຍາກ ຊ່ວຍກັນບິແບ່ງຍົກລະດັບຊີວິດໃຫ້ປະຊາຊົນຫຼຸດພົ້ນອອກຈາກຄວາມທຸກຍາກຕາມແຜນພັດທະນາຂອງລັດຖະບານວາງໄວ້ໃຫ້ປາກົດຜົນເປັນຈິງ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ