ກອງປະຊຸມໃຫຍ່ຄັ້ງທີ VIII ຂອງອົງຄະນະພັກເມືອງປາກລາຍ ແຂວງ ໄຊຍະບູລີ ໄດ້ເປີດຂຶ້ນຢ່າງເປັນທາງການໃນຕອນເຊົ້າວັນທີ 29 ທັນວາ 2019 ທີ່ຫ້ອງປະຊຸມໃຫຍ່ຂອງເມືອງດັ່ງກ່າວ, ໂດຍການເປັນປະທານຂອງ ສະຫາຍ ສົມຈິດ ຈັນທະວົງ ກໍາມະການພັກແຂວງ, ເລຂາຄະນະບໍລິຫານງານພັກເມືອງ, ເຈົ້າເມືອງ ປາກລາຍ.
ເຂົ້າຮ່ວມເປັນກຽດມີ ສະຫາຍ ພົງສະຫວັນ ສິດທະວົງ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງ ໄຊຍະບູລີ; ມີປະທານສະພາປະຊາຊົນແຂວງ, ມີຄະນະປະຈຳພັກແຂວງ, ກຳມະການພັກແຂວງ, ຄະນະປະຈຳພັກເມືອງ, ກຳມະການພັກເມືອງ, ມີພະນັກງານອາວຸໂສບຳນານ, ນັກທຸລະກິດ, ຜູ້ປະກອບການ, ແຂກຮັບເຊີນຈາກເມືອງ ຊະນະຄາມ, ເມືອງ ແມດ ແຂວງ ວຽງຈັນ ແລະ ເມືອງອ້ອມຂ້າງເຂົ້າຮ່ວມ 200 ກວ່າຄົນ. ໃນນັ້ນຜູ້ແທນສົມບູນທີ່ມາຈາກຄະນະພັກຮາກຖານ ແລະ ໜ່ວຍພັກທົ່ວເມືອງ 165 ສະຫາຍ, ຍິງ 19 ສະຫາຍ, ທີ່ເປັນຕົວແທນໃຫ້ແກ່ສະມາຊິກພັກທັງໝົດ 2.447 ສະຫາຍ.
ກອງປະຊຸມຄັ້ງນີ້ບັນດາຜູ້ແທນແມ່ນຈະໄດ້ພ້ອມກັນທົບທວນຕີລາຄືນຜົນງານ ແລະ ໄຊຊະນະທີ່ຍາດມາໄດ້, ຈຸດອ່ອນຂໍ້ຄົງຄ້າງ ແລະ ສະຫຼຸບຖອດຖອນບົດຮຽນໃນການຈັດຕັ້ງປະຕິບັດແນວທາງນະໂຍບາຍຂອງພັກ ແລະ ມະຕິຜູ້ແທນອົງຄະນະພັກຄັ້ງທີ VII ແລະ ພ້ອມກັນກຳນົດທິດທາງຄາດໝາຍຍຸດທະສາດແຕ່ລະດ້ານໃນການປົກປັກຮັກສາ ແລະ ພັດທະນາເມືອງປາກລາຍແຕ່ນີ້ຮອດປີ 2024, ຈາກນັ້ນກອງປະຊຸມຈະໄດ້ພ້ອມກັນຄົ້ນຄວ້າ ແລະ ຮັບຮອງເອົາບັນດາເອກະສານສຳຄັນທີ່ເປັນຍຸດທະສາດຂອງຄະນະບໍລິຫານງານພັກຄັ້ງທີ VIII, ເລືອກຕັ້ງເອົາຄະນະບໍລິຫານງານພັກເມືອງຊຸດທີ VIII ແລະ ຕົວແທນໃຫ້ແກ່ອົງຄະນະພັກເມືອງ ໄປຮ່ວມກອງປະຊຸມໃຫຍ່ຄັ້ງທີ່ VII ຂອງອົງຄະນະພັກແຂວງ.
ໂອກາດດັ່ງກ່າວ ສະຫາຍ ສົມຈິດ ຈັນທະວົງ ກໍ່ໄດ້ກ່າວເປີດກອງປະຊຸມຢ່າງເປັນທາງການ, ພ້ອມທັງຜ່ານບົດລາຍງານການເມືອງທັງສອງພາກ, ເຊິ່ງສະຫາຍໄດ້ຍົກໃຫ້ເຫັນຜົນງານຈາກການຊີ້ນໍາໆພາຂອງອົງຄະນະພັກ ເມືອງ ປາກລາຍ ໃນໄລຍະ 5 ປີຜ່ານມາ , ໂດຍລວມແມ່ນສາມາດຮັກສາ ສະຖຽນລະພາບທາງດ້ານການເມືອງ, ມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍດ້ານສັງຄົມໂດຍພື້ນຖານ, ເສດຖະກິດ, ວັດທະນະທຳ-ສັງຄົມໄດ້ຮັບການພັດທະນາຢ່າງຕໍ່ເນື່ອງ, ການຜະລິດ ແລະ ຊີວິດການເປັນຢູ່ຂອງປະຊາຊົນບັນດາເຜົ່າໄດ້ຮັບການຊຸກຍູ້ສົ່ງເສີມນັບມື້ດີຂຶ້ນ, ການຂະຫຍາຍຕົວເສດຖະກິດຢູ່ໃນລະດັບ 9,5%, ລວມຍອດຜະລິດຕະພັນພາຍໃນບັນລຸ 1.695 ຕື້ກວ່າກີບ, ສະເລ່ຍຕໍ່ຫົວຄົນໜຶ່ງໄດ້ 22,68 ລ້ານກີບ ເທົ່າກັບ 2.766 ໂດລາຕໍ່ຄົນຕໍ່ປີ, ທຽບໃສ່ຄາດໝາຍປະຕິບັດໄດ້ 93,29% ທຽບໃສ່ປີ 2014 ເພີ້ມຂຶ້ນ 894 ໂດລາ.
ໂຄງປະກອບເສດຖະກິດໄດ້ມີການຫັນປ່ຽນ ຕາມທິດໜໍ່ແໜງອຸດສາຫະກໍາ ແລະ ທັນສະໄໝ, ການຜະລິດກະສິກຳ, ການບໍລິການໄດ້ຂະຫຍາຍຕົວເພີ້ມຂຶ້ນ, ການພັດທະນາຊົນນະບົດ ແລະ ລຶບລ້າງຄວາມທຸກຍາກໄດ້ບັນລຸຄາດໝາຍ, ສາມາດລືບລ້າງຄອບຄົວທຸກຍາກໄດ້ 100%, ການພັດທະນາຕົວເມືອງ, ຊົນນະບົດໄດ້ມີຫຼາຍປັດໃຈໃໝ່ເກີດຂຶ້ນ, ຊີວິດການເປັນຢູ່ທາງດ້ານວັດຖຸ ແລະ ຈິດໃຈໄດ້ມີການປ່ຽນແປງດ້ວຍບາດກ້າວໃໝ່ ແລະ ວຽກງານວັດທະນະທໍາ-ສັງຄົມກໍ່ໄດ້ຮັບການພັດທະນາ ແລະ ຍົກລະດັບດີຂຶ້ນເປັນກ້າວໆ.
ຈາກນັ້ນ ສະຫາຍ ບຸນຫຼາຍ ວົງດາລາ, ຄະນະປະຈໍາພັກເມືອງ, ຮອງເຈົ້າເມືອງ ໄດ້ຜ່ານຮ່າງແຜນພັດທະນາເສດຖະກິດ-ສັງຄົມ, ກອງປະຊຸມຍັງຈະໄດ້ຮັບຟັງການໂອ້ລົມຂອງ ສະຫາຍ ເລຂາພັກແຂວງ ແລະ ຈະໄດ້ດຳເນີນໄປເປັນເວລາ 2 ວັນຈິ່ງຈະສຳເລັດ.
ນັກຂ່າວ: ຫ້ອງວ່າການແຂວງ ໄຊຍະບູລີ, ຂ່າວ-ພາບໂດຍ: ອຸ່ນເຮືອນ ໂພທິລັກ
