ເຂຶ່ອນໄຟຟ້ານ້ຳອູຖືເປັນໂຄງການແຫ່ງຄວາມຫວັງໜຶ່ງຂອງປະເທດເຮົາ ເພາະມີເຖິງ 7 ເຂື່ອນ ເມື່ອເປີດເດີນເຄື່ອງຢ່າງເຕັມຮູບແບບຈະສາມາດຜະລິດກະແສໄຟຟ້າໄດ້ທັງໝົດ 1.272.000 KW ເທົ່າກັບ 12% ຂອງຍອດຜະລິດໄຟຟ້າລວມຂອງລາວ.
ຕາມຂ່າວCRI: ວັນທີ 26 ທັນວາ 2019 ທີ່ແຂວງຫຼວງພະບາງ, ກຸ່ມບໍລິສັດພະລັງງານໄຟຟ້າຈີນ ໄດ້ຈັດພິທີສະເຫຼີມສະຫຼອງຜົນສໍາເລັດການຜະລິດພະລັງງານໄຟຟ້າຈາກເຄື່ອງຈັກເຄື່ອງທໍາອິດ ຂອງໂຄງການເຂື່ອນໄຟຟ້ານໍ້າອູໄລຍະ II. ໃຫ້ກຽດເຂົ້າຮ່ວມໂດຍທ່ານ ຄໍາມະນີ ອິນທິລາດ ລັດຖະມົນຕີກະຊວງພະລັງງານ ແລະບໍ່ແຮ່, ທ່ານ ຈ່ຽງຈ່າຍຕຸ່ງ ເອກອັກຄະລັດຖະທູດ ສປ ຈີນປະຈໍາ ສປປ ລາວ, ທ່ານ ຫຼີຢ້ຽນໝິງ ຮອງຜູ້ອໍານວຍ ການກຸ່ມບໍລິສັດພະລັງງານໄຟຟ້າຈີນແລະມີບັນດາລັດຖະມົນຕີ, ຜູ້ຕາງໜ້າພາກສ່ວນຮັບຜິດຊອບ ທີ່ກ່ຽວຂ້ອງຂອງສອງປະເທດລາວ-ຈີນເຂົ້າຮ່ວມ.
ທ່ານ ຄໍາມະນີ ອິນທິລາດກ່າວວ່າ: ໂຄງການເຂື່ອນໄຟຟ້ານໍ້າອູແມ່ນໂຄງການພັດທະນາອຸດສາຫະກໍາພະລັງງານໄຟຟ້າທີ່ມີຄວາມສໍາຄັນ, ມີລັກສະນະຍຸດທະສາດ ຂອງ ສປປ ລາວ ແລະໄດ້ຖືກກໍານົດຢູ່ໃນແຜນຍຸດທະສາດການພັດທະນາອຸດສາຫະກໍາພະລັງງານຮອດປີ 2020 ແລະຮອດປີ 2025, ນອກນັ້ນ ຍັງແມ່ນໂຄງການທີ່ເປັນມິດກັບສິ່ງແວດລ້ອມ ແລະເມື່ອສ້າງສໍາເລັດທຸກໂຄງການ ກໍ່ຈະເປັນການຜະລິດ ພະລັງງານໄຟຟ້າທີ່ມີປະລິມານສູງ, ໄດ້ມາດຕະຖານ ແລະແມ່ນການຜະລິດພະລັງງານໄຟຟ້າທີ່ມີຄວາມຍືນຍົງ.
ທ່ານ ຈ່ຽງຈ້າຍຕຸ່ງ ໄດ້ສະແດງຄວາມຂອບໃຈມາຍັງລັດຖະບານ ກໍຄືປະຊາຊົນລາວທີ່ ໄດ້ໃຫ້ການສະໜັບສະໜູນ ແລະຊ່ວຍເຫຼືອໃນການສ້າງໂຄງການດັ່ງກ່າວ, ທ່ານກ່າວວ່າ: ການຜະລິດພະລັງງານໄຟຟ້າໃນຄັ້ງນີ້ເປັນຜົນສຳເລັດແຫ່ງການຈັດຕັ້ງປະຕິບັດຂໍ້ຕົກລົງທີ່ສຳຄັນ ລະຫວ່າງການນຳສູງສຸດຂອງສອງປະເທດຈີນ-ລາວ ກໍຄືການສົ່ງເສີມການສ້າງຄູ່ ຮ່ວມຊາຕາກຳຈີນ-ລາວນຳກັນອີກດ້ວຍ. ຫວັງວ່າ ວິສາຫະກິດຈີນຢູ່ລາວຈະຖືເອົາຜົນສຳເລັດໃນຄັ້ງນີ້ ເປັນຈຸດເລີ່ມຕົ້ນໃໝ່ ແລະສືບຕໍ່ເສີມຂະຫຍາຍບົດບາດຢ່າງຕັ້ງໜ້າ ກວ່າເກົ່າ.
ຕາມຂໍ້ມູນຍັງໃຫ້ຮູ້ວ່າ ເຂື່ອນໄຟຟ້ານ້ຳອູເປັນການລົງທຶນກໍ່ສ້າງໂດຍບໍລິສັດພະລັງງານໄຟຟ້າຈີນຈຳກັດ ເຊິ່ງມີກໍາລັງຕິດຕັ້ງໄຟຟ້າທັງໝົດ 1.272.000 KW, ມີມູນຄ່າການລົງທຶນປະມານ 2,8 ຕື້ໂດລາສະຫະລັດ ໂດຍໄດ້ພັດທະນາການກໍ່ສ້າງເຂື່ອນໄຟຟ້າ 7 ເຂື່ອນແບ່ງອອກເປັນ 2 ໄລຍະ, ໄລຍະທີ I ລວມມີ ເຂື່ອນໄຟຟ້ານ້ຳອູ 2, 5 ແລະ6, ທີ່ເຫຼືອເປັນໄລຍະທີ II. ຄາດວ່າຮອດປີ 2020 ຈະສາມາດເປີດນຳໃຊ້ໄດ້ອີກ 4 ເຂື່ອນຂອງ ໂຄງການໄລຍະທີ II.
ພາຍຫຼັງເຂື່ອນໄຟຟ້ານ້ຳອູທັງ 7 ເຂື່ອນສ້າງສຳເລັດ ແລ້ວ ຈະສາມາດຜະລິດພະລັງງານໄຟຟ້າໄດ້ 12% ຂອງພະລັງງານໄຟຟ້າທົ່ວປະເທດລາວ ຜົນສໍາເລັດ ເຫຼົ່ານີ້ບໍ່ພຽງແຕ່ຈະສາມາດຫຼຸດຜ່ອນສະພາບຂາດແຄນໄຟຟ້າຢູ່ພາກເໜືອຂອງລາວເທົ່ານັ້ນ ແຕ່ຍັງຈະສາມາດຍົກລະດັບການສ້າງຕະໜ່າງໄຟຟ້າ ກໍຄືການສົ່ງເສີມການສົ່ງອອກໄຟຟ້າສູ່ຕ່າງປະເທດອີກດ້ວຍ.
ຂ່າວຈາກ : CRI