ຫຼວງນ້ຳທາ ທຳລາຍສິນຄ້າໝົດອາຍຸສິນຄ້ານຳເຂົ້າບໍ່ຖືກຕ້ອງ

69

ຕອນເຊົ້າວັນ 19 ທັນວາ 2019 ນີ້ ທີ່ສະໜາມຂີ້ເຫຍື້ອ ແຂວງຫຼວງນ້ຳທາ ໄດ້ທຳລາຍສິນຄ້າໝົດອາຍຸ, ສິນຄ້າເສື່ອມຄຸນ, ສິນຄ້າປອມແປງຮຽນແບບ ແລະ ສິນຄ້າທີ່ນຳເຂົ້າບໍ່ຖືກຕ້ອງ.

ເຂົ້າຮ່ວມໂດຍ ທ່ານ ແສງພອນ ເຈື້ອຫຼວງຄຳມີ ຫົວໜ້າຂະແໜງການຄ້າພາຍໃນ ພະແນກອຸດສາຫະກຳ ແລະ ການຄ້າ ແຂວງຫຼວງນ້ຳທາ, ມີອຸດສາຫະກຳ ແລະ ການຄ້າ ເມືອງ 5 ເມືອງ ແລະ ພາກສ່ວນທີ່ກ່ຽວຂ້ອງພາຍໃນແຂວງເຂົ້າຮ່ວມ.

ທ່ານ ແສງພອນ ເຈື້ອຫຼວງຄຳມີ ກ່າວວ່າ: ໃນໄລຍະຜ່ານມາ ພະແນກອຸດສາຫະກຳ ແລະ ການຄ້າ ໂດຍສະເພາະແມ່ນຂະແໜງການຄ້າພາຍໃນ ໄດ້ເປັນເຈົ້າການເອົາໃຈໃສ່ປະສານສົມທົບກັບບັນດາຂະແໜງການທີ່ກ່ຽວຂ້ອງ ແລະ ຫ້ອງການອຸດສາຫະກຳ ແລະ ການຄ້າເມືອງ ພ້ອມກັນເປັນເຈົ້າການຈັດຕັ້ງປະຕິບັດຕາມລະບຽບກົດໝາຍທີ່ກ່ຽວຂ້ອງກັບການກວດກາສິນຄ້າບໍ່ຖືກຕ້ອງ, ສິນຄ້າໝົດອາຍຸການນຳໃຊ້ ແລະ ສິນຄ້າປອມແປງຮຽນແບບ ທີ່ລະເມີດລິຂະສິດຂອງຜູ້ອື່ນເຂົ້າມາຈຳໜ່າຍພາຍໃນແຂວງຫຼວງນ້ຳທາ.

ຈຸດປະສົງການທຳລາຍສິນຄ້າໃນຄັ້ງນີ້ ກໍເພື່ອແນໃສ່ປົກປ້ອງຜູ້ດຳເນີນທຸລະກິດທີ່ຖືກຕ້ອງຕາມລະບຽບກົດໝາຍ ແລະ ເປັນການປົກປ້ອງຜູ້ຊົມ ໃຊ້, ຜູ້ບໍລິໂພກໃນສັງຄົມໃຫ້ໄດ້ຊົມໃຊ້ສິນຄ້າທີ່ຖືກຕ້ອງ ແລະ ມີຄຸນນະພາບດີ.

ສິນຄ້າທີ່ນຳມາທຳລາຍໃນຄັ້ງນີ້ ປະກອບມີ: ສິນຄ້າອຸປະໂພກ – ບໍລິໂພກໝົດອາຍຸການນຳໃຊ້ ເຊິ່ງໄດ້ລົງໄປກວດກາ 240 ຮ້ານ. ໃນນີ້, ກວດພົບສິນຄ້າໝົດອາຍຸການນຳໃຊ້ ຈຳນວນ 47 ຮ້ານ ມີ 82 ລາຍການ; ຈານດາວທຽມກວດພົບມີທັງໝົດ 19 ຮ້ານ ຢຶດຈານດາວທຽມໄດ້ 63 ແຜ່ນ, ກ່ອງຮັບສັນຍານ 81 ກ່ອງ ແລະ ຫົວດູດສັນຍານ 10 ຫົວ, ແຟັບແອັກແທັກອີຊີປອມ ກວດພົບຢູ່ເມືອງຫຼວງນ້ຳທາ, ເມືອງສິງ ແລະ ເມືອງລອງ ມີ 22 ຮ້ານ ຢຶດໄດ້ທັງໝົດ 279 ແກັດ ແລະ 242 ຖົງ; ເຄື່ອງດື່ມ M – 150 ກວດພົບທັງໝົດ 70 ຮ້ານ ທີ່ນຳເຂົ້າບໍ່ຖືກຕ້ອງຕາມກົດໝາຍ 1 ພັນກວ່າແກັດ ລວມມູນຄ່າທັງໝົດ 40 ລ້ານກວ່າກີບ.

ພ້ອມນີ້, ເຈົ້າໜ້າທີ່ທີ່ລົງກວດກາພົບເຫັນສິນຄ້າໝົດອາຍຸ, ສິນຄ້າເສື່ອມຄຸນ, ສິນຄ້າປອມແປງຮຽນແບບ ແລະ ສິນຄ້າທີ່ນຳເຂົ້າບໍ່ຖືກຕ້ອງ ກໍໄດ້ສຶກສາອົບຮົມ ແລະ ກ່າວເຕືອນຕໍ່ຜູ້ປະກອບການຄ້າຂາຍຍ້ອນເປັນຄັ້ງທຳອິດ, ສ່ວນສິນຄ້າທີ່ຢຶດໄດ້ທາງເຈົ້າໜ້າທີ່ໄດ້ນຳເອົາໄປທຳລາຍຖິ້ມ.

ຂ່າວ: ອຸ້ມ