ພິທີເຊັນສັນຍາໂຄງການສໍາປະທານເກັບຊື້ ແລະ ສົ່ງເສີມການປູກຕົ້ນໃບຊາໝ້ຽງ ຢູ່ແຂວງໄຊຍະບູລີ ໄດ້ຈັດຂຶ້ນໃນວັນທີ 19 ທັນວາ 2019 ນີ້ຢູ່ທີ່ຫ້ອງປະຊຸມພະແນກແຜນການ ແລະ ການລົງທຶນແຂວງໄຊຍະບູລີ ລະຫວ່າງ ທ່ານ ນາງ ຄໍາມີ ຈັນທິບ ຫົວໜ້າພະແນກແຜນການ ແລະ ການລົງທຶນແຂວງໄຊຍະບູລີ ແລະ ທ່ານ ເຊຍ ຈຸນລຸຍ ປະທານ ບໍລິສັດ ທຽນຜິນ ຫົງ ເຕັກໂນໂລຊີ – ຊີວະພາບກະສິກໍາ ຈໍາກັດ.
ໂດຍການເຂົ້າຮ່ວມຂອງ ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ, ມີເຈົ້າເມືອງໄຊຍະບູລີ, ເມືອງບໍ່ແຕນ ພ້ອມດ້ວຍພະແນກການທີ່ກ່ຽວຂ້ອງ ແລະ ວິຊາການທັງສອງຝ່າຍເຂົ້າຮ່ວມ.
ໂຄງການສໍາປະທານເກັບຊື້ ແລະ ສົ່ງເສີມການປູກຕົ້ນໃບຊາໝ້ຽງຂອງ ບໍລິສັດ ທຽນ ຜີນ ຫົງ ເຕັກໂນໂລຊີຊີວະພາບກະສິກໍາ ຈໍາກັດ ຢູ່ແຂວງໄຊຍະບູລີ ຈະໄດ້ລົງມືແຕ່ປີ 2020 ເປັນຕົ້ນໄປກໍານົດ 25 ປີ ເຊິ່ງຈະປະຕິບັດຢູ່ 2 ເມືອງ ຄື: ເມືອງໄຊຍະບູລີ ຢູ່ບ້ານນໍ້າຄາ ສໍາປະທານທີ່ດິນລັດເພື່ອບົວລະບັດຮັກສາຕົ້ນຊາໝ້ຽງທໍາມະຊາດ ແລະ ສົ່ງເສີມການປູກ, ເກັບຊື້ ແລະ ສ້າງຕັ້ງໂຮງງານໃນເນື້ອທີ່ 75,7 ເຮັກຕາ. ໃນນີ້, ມີຕົ້ນຊາໝ້ຽງທໍາມະຊາດ ມີຢູ່ 3.346 ຕົ້ນ, ຄາດຄະເນທຶນທີ່ຈະນໍາໃຊ້ເຂົ້າດໍາເນີນກິດຈະການທັງໝົດ 4 ຕື້ 109 ລ້ານກວ່າກີບ.
ສ່ວນເມືອງບໍ່ແຕນ ແມ່ນກໍານົດເອົາບ້ານໜອງປາຈີດ, ບ້ານກຸ່ມ ມີເນື້ອທີ່ທັງໝົດ 84 ເຮັກຕາ, ມີຕົ້ນຊາໝ້ຽງທໍາມະຊາດທັງໝົດ 5.379 ຕົ້ນ, ມີທຶນທັງໝົດ 2 ຕື້ 388 ລ້ານກວ່າກີບ.
ລວມທຶນທັງໝົດທີ່ທາງ ບໍລິສັດ ທຽນ ຜີນ ຫົງ ເຕັກໂນໂລຊີຊີວະພາບກະສິກໍາ ຈໍາກັດ ຂອງບໍລິສັດຈີນທີ່ລົງທຶນຢູ່ແຂວງໄຊຍະບູລີ ມີທັງໝົດ 6,5 ຕື້ກີບ. ນອກຈາກການນໍາໃຊ້ຊາທໍາມະຊາດທີ່ມີຢູ່ແລ້ວ ທາງບໍລິສັດຍັງໄດ້ວາງແຜນຂະຫຍາຍເນື້ອທີ່ປູກຊາ, ກະກຽມເບ້ຍຊາ, ປຸ໋ຍ ໂດຍຈະນໍາໃຊ້ແຮງງານຂອງປະຊາຊົນທີ່ເໝາະສົມ.
ຂ່າວ: ບຸນທີ
