ງານໄທແລນ ອິນເຕີເນຊັນນໍ ມໍເຕີເອັກໂປ ເປັນງານທີ່ລໍຄອຍຂອງຜູ້ທີ່ມັກລົດຫຼາຍຄົນ ເນື່ອງຈາກມີລົດຫຼາກຫຼາຍຍີ່ຫໍ້ຈາກຫຼາຍປະເທດເຂົ້າຮ່ວມ, ດຳເນີນມາຮອດປີ 2019 ເປັນຄັ້ງທີ 36 ແລ້ວ ຖືເປັນງານວາງສະແດງລົດທີ່ຍິ່ງໃຫຍ່ທີ່ສຸດຂອງປະເທດໄທ ປີໜຶ່ງມີຄັ້ງດຽວ.
ທາງບໍລິສັດ ສື່ສາກົນ ຈໍາກັດ ຜູ້ຈັດງານວາງສະແດງລົດ ຄັ້ງທີ 36 ຫຼື Thailand International Motor Expo 2019 ຈັດງານໃນປີນີ້ ນອກຈາກຈະນຳເອົາລົດໃໝ່ຫຼາກຫຼາຍຮູບແບບມານຳສະເໜີແລ້ວ ຍັງເປີດໃຫ້ທົດລອງຂັບຂີ່ໄດ້ຖ້າມັກຈຶ່ງຈອງຊື້ເປັນເຈົ້າຂອງ, ຕັ້ງເປົ້າຍອດຂາຍລົດໃຫຍ່ 50 ພັນຄັນ, ລົດຈັກ 9 ພັນຄັນ.
ທ່ານ ຂວັນໄຊ ປະພັດພົງ ປະທານ ບໍລິສັດ ສື່ສາກົນ ຈໍາກັດຜູ້ດຽວ ຜູ້ຈັດງານກ່າວວ່າ: ພາຍໃນງານນອກຈາກຈະມີລົດຫຼາກຫຼາຍຍີ່ຫໍ້ໃຫ້ທ່ານໄດ້ສໍາຜັດແລ້ວ ຍັງມີກິດຈະກຳຂອງແຈກຂອງແຖມ ແລະ ສິນຄ້າອື່ນໆທີ່ຕິດພັນກັບແວດວົງລົດ ໃຫ້ທ່ານທີ່ມາຮ່ວມງານໄດ້ເພີດເພີນຕະຫຼອດງານ, ພິເສດກວ່ານັ້ນຍັງຈະໄດ້ພົບກັບຊ່ຽວຊານລົດຍົນຈາກຕ່າງປະເທດ ມາໃຫ້ຄໍາແນະນໍາທີ່ເປັນປະໂຫຍດຕໍ່ການນຳໃຊ້ລົດນຳອີກ.
ທ່ານ ຂວັນໄຊ ປະພັດພົງ ກ່າວຕື່ມວ່າ: ງານໄທແລນ ອິນເຕີເນຊັນນໍ ມໍເຕີເອັກໂປ 2019 ( Thailand International Motor Expo 2019) ຈະຊ່ວຍກະຕຸ້ນຍອດຈໍາໜ່າຍລົດໃຫ້ມີບັນຍາກາດດີຂຶ້ນ ກວ່າເກົ່າ ໂດຍຕັ້ງເປົ້າພາຍໃນງານຈະມີຍອດຈອງລົດໃຫຍ່ 50 ພັນຄັນ ແລະ ລົດຈັກ 9 ພັນຄັນ ຄິດເປັນມູນຄ່າປະມານ 56.000 ລ້ານບາດ ( ສະກຸນເງິນໄທ ).
ສໍາລັບໃຜທີ່ມີເງື່ອນໄຂຕ້ອງຍາດໂອກາດມາໃຫ້ໄດ້ ງານເລີ່ມຕັ້ງແຕ່ວັນທີ 30 ພະຈິກ ຫາ 10 ທັນວາ 2019 ທີ່ອາຄານຊາເລັນເຈີ ອິມແພັກ ເມືອງທອງທານີ ປະເທດໄທ.