ໃນວັນທີ 4 ທັນວາ 2019 ນີ້ຢູ່ທີ່ຫ້ອງປະຊຸມຊັ້ນສອງ VIP ສະໂມສອນໃຫຍ່ຂອງແຂວງສາລະວັນ ໄດ້ຈັດກອງປະຊຸມສະຫຼຸບວຽກງານແກ້ໄຂບັນຫາໄພພິບັດ ( ນ້ຳຖ້ວມ ) ໃນເດືອນກັນຍາ 2019 ທີ່ຜ່ານມາ, ເປັນປະທານໂດຍ ທ່ານ ພູທົງ ຄໍາມະນີວົງ ຮອງເຈົ້າແຂວງສາລະວັນ, ຜູ້ຊີ້ນໍາວຽກງານວັດທະນະທໍາ – ສັງຄົມ, ທັງເປັນປະທານຄະນະກໍາມະການປ້ອງກັນ ແລະ ຄວບຄຸມໄພພິບັດຂັ້ນແຂວງ; ມີຮອງເຈົ້າແຂວງ, ຫົວໜ້າພະແນກ – ຮອງພະແນກ, ເຈົ້າເມືອງ – ຮອງເຈົ້າເມືອງ ເຂົ້າຮ່ວມ.
ທ່ານ ຄໍາຕາ ໂຮຊົງເລືອງ ຫົວໜ້າພະແນກແຮງງານ, ສະຫວັດດີການ ແລະ ສັງຄົມ, ຮອງປະທານຄະນະກໍາມະການປ້ອງກັນ ແລະ ຄວບຄຸມໄພພິບັດຂັ້ນແຂວງ ໄດ້ຂຶ້ນຜ່ານບົດສະຫຼຸບການແກ້ໄຂໄພພິບັດນໍ້າຖ້ວມຂອງແຂວງສາລະວັນ ແຕ່ວັນທີ 1 – 15 ກັນຍາ 2019 ໃຫ້ຮູ້ວ່າ: ສະພາບນໍ້າຖ້ວມຢູ່ແຂວງສາລະວັນ ໃນລະຫວ່າງຕົ້ນເດືອນກັນຍາຜ່ານມານີ້ ໄດ້ສົ່ງຜົນກະທົບຕໍ່ຊີວິດ, ຊັບສິນຂອງປະຊາຊົນບັນດາເຜົ່າໃນ 8 ເມືອງ, ມີ 579 ບ້ານ. ໃນນັ້ນ, ເສຍຫາຍຈໍານວນ 219 ບ້ານ, ມີ 35.698 ຄອບຄົວ, ພົນລະເມືອງ 139.221 ຄົນ ຄື: ເມືອງສາລະວັນ ຖືກນ້ຳຖ້ວມ 93 ບ້ານ, ມີ 17.771 ຄອບຄົວ, ພົນລະເມືອງ 71.083 ຄົນ, ຖ້ວມໜັກ 43 ບ້ານ, ມີ 8.346 ຄອບຄົວ, ພົນລະເມືອງ 39.649 ຄົນ, ເສັ້ນທາງຖືກຕັດຂາດ 6 ບ້ານ, ຜົນກະທົບເນື້ອທີ່ນາ 18.240 ເຮັກຕາ, ເນື້ອທີ່ສວນ 3.085 ເຮັກຕາ, ສັດລ້ຽງ 408.755 ໂຕ, ຊົນລະປະທານ 20 ແຫ່ງ, ເສັ້ນທາງ 36 ເສັ້ນ, ຂົວ 9 ແຫ່ງ, ສໍານັກງານຫ້ອງການຂອງລັດ 44 ແຫ່ງ ( ແຂວງ 17 ຫ້ອງການ, ເມືອງ 27 ຫ້ອງການ ແລະ ລັດວິສາຫະກິດ 4 ຫ້ອງການ, ທະນາຄານ 3 ແຫ່ງ ) ໂຮງຮຽນ 90 ແຫ່ງ, ສຸກສາລາ 9 ແຫ່ງ, ຕະຫຼາດ 5 ແຫ່ງ, ຄົນເສຍຊີວິດ 2 ຄົນ.
ເມືອງວາປີ ຖືກຜົນກະທົບທັງໝົດ 55 ບ້ານ, ມີ 3.653 ຄອບຄົວ, ພົນລະເມືອງ 18.263 ຄົນ, ເນື້ອທີ່ຖ້ວມທັງໝົດ 15.177 ເຮັກຕາ. ໃນນັ້ນ, ເນື້ອທີ່ນາ 12.100 ເຮັກຕາ, ຊົນລະປະທານ 3 ແຫ່ງ, ເສັ້ນທາງ 23 ເສັ້ນ, ຂົວ 11 ແຫ່ງ, ກົງເຕີນໍ້າປະປາ 703 ກົງເຕີ, ໄຟຟ້າ ແລະ ການສື່ສານຕັດຂາດ 23 ບ້ານ, ໂຮງຮຽນ 33 ແຫ່ງ, ສຸກສາລາ 1 ແຫ່ງ.
ເມືອງຄົງເຊໂດນ ຖືກນໍ້າຖ້ວມ 71 ບ້ານ, ຖ້ວມໜັກ 47 ບ້ານ, 10.147 ຄອບຄົວ, ພົນລະເມືອງ 49.515 ຄົນ, ສໍານັກງານຫ້ອງການ 12 ແຫ່ງ, ກົມກອງທະຫານ 2 ກົມກອງ, ຄ້າຍຄຸມຂັງ 1 ແຫ່ງ, ເນື້ອທີ່ຖືກຖ້ວມລວມ 16.900 ເຮັກຕາ. ໃນນັ້ນ, ເນື້ອທີ່ນາ 15.300 ເຮັກຕາ, ຊົນລະປະທານ 33 ແຫ່ງ, ຈັກສູບນໍ້າ 33 ແຫ່ງ, ໜອງປາ 650 ໜອງ, ເສັ້ນທາງ 25 ເສັ້ນ, ຂົວ 9 ແຫ່ງ, ນ້ຳປະປາຖືກຕັດຂາດໝົດ, ໄຟຟ້າຖືກຕັດຂາດ 65 ບ້ານ, ໂຮງຮຽນ 62 ແຫ່ງ, ໂຮງໝໍ 1 ແຫ່ງ, ສຸກສາລາ 4 ແຫ່ງ. ນອກຈາກນັ້ນ, ຍັງມີ 5 ຕົວເມືອງທີ່ໄດ້ຮັບຜົນກະທົບຈາກດິນເຈື່ອນທັບທາງ, ເສັ້ນທາງມີຜົນກະທົບ ແລະ ນໍ້າຖ້ວມເລັກໜ້ອຍ.
ຈາກການສະຫຼຸບຜົນເສຍຫາຍທັງໝົດມີມູນຄ່າ 730,39 ຕື້ກີບ, ໃນເຫດການນໍ້າຖ້ວມຄັ້ງນີ້ຫຼາຍພາກສ່ວນກໍໄດ້ເອົາໃຈໃສ່ເຂົ້າມາຊ່ວຍເຫຼືອ ເຊິ່ງສາມາດສັງລວມຜົນໄດ້ຮັບຈາກການຊ່ວຍເຫຼືອທັງໝົດເປັນເງິນ 8,42 ຕື້ກີບ, 1,35 ຕື້ດົງ. ພ້ອມນີ້, ຍັງໄດ້ສຸມທຸກກໍາລັງເຫື່ອແຮງ, ກໍາລັງໃຈ, ວັດຖຸ, ເງິນຄໍາເປັນຈໍານວນຫຼາຍຊ່ວຍພໍ່ແມ່ປະຊາຊົນ ໂດຍສະເພາະແມ່ນກໍາລັງປ້ອງກັນຊາດ – ປ້ອງກັນຄວາມສະຫງົບເຮົາ ຈຶ່ງສາມາດເຮັດໃຫ້ກອບກູ້ເອົາຊີວິດ ແລະ ຊັບສິນຂອງພໍ່ແມ່ປະຊາຊົນເຮົາສ່ວນໃດສ່ວນໜຶ່ງ.
( ຂ່າວ – ຮູບ: ກິນດາວັນ )
